އެމްޓީސީސީން ހިއްސާއަކަށް 3ރ. ބަހަން ނިންމައިފި

އެމްޓީސީސީ އަށް މިދިޔަ އަަހަރު ލިބުނު ފައިދާއިން ހިއްސާއަކަށް 3ރ. ބަހަން މިއަދު ނިންމައިފި އެވެ. ވާޗުއަލްކޮށް މިއަދު ބޭއްވި އަހަރީ އާއްމު ޖަލްސާގައި މިގޮތަށް ފާސްކުރީ، އެމްޓީސީސީގެ އަހަރީ އާންމު ޖަލްސާގައި ބައިވެރިވި ހިއްސާދާރުންގެ 86 ޕަސެންޓުގެ ވޯޓުންނެވެ. އެމްޓީސީސީން ހިއްސާގެ ފައިދާ ބަހާނީ މި މަހުގެ 19 ވަނަ ދުވަހާ ހަމައަށް އެ ކުންފުުނީގެ ހިއްސާދާރުންގެ ގޮތުގައި ރަޖިސްޓްރީވެފައިވާ ފަރާތްތަކަށެވެ.

އެމްޓީސީސީގެ ހުރިހާ ހަރަދެއް ކެނޑުމަށް ފަހު ހިއްސާއަކަަށް މިދިޔަ އަހަރު ޖެހުނު މިލްކުވެރިކަމުގެ އަގަކީ 145ރ. އެވެ. އޭގެ ކުރީ އަހަރު ހިއްސާއެއްގެ މިލްކުވެރިކަމުގެ އަގަކީ 123ރ. އެވެ. އަދި 2019 ވަނަ އަހަރު އެ އަދަދު އުޅެނީ 115.35.ރ ގަ އެވެ.

އެ ކުންފުނީގެ ހިއްސާއަކަށް 3ރ. ބަހަން ނިންމި އިރު އެމްޓީސީސީއަށް މިދިޔަ އަހަރު ސާފު ފައިދާގެ ގޮތުގަައި 191 މިލިއަން ރުފިޔާ ލިބިފައިވެ އެވެ. އޭގެ ކުރީ އަހަރު ފައިދާގެ ގޮތުގައި 53 މިލިއަން ރުފިޔާ ލިބުނެ އެވެ. މިއީ 258 ޕަސެންޓު އިތުރު އަދަދެކެވެ. މިދިޔަ އަހަރު އާމްދަނީގެ ގޮތުގައި 1.38 ބިލިއަން ރުފިޔާ ލިބުނެވެ.

އެމްޓީސީސީގެ އަހަރީ އާންމު ޖަލްސާގައި ކުންފުނީގެ އޮޑިޓަރެއްގެ ގޮތުގައި ޕްރައިޒް ވޯޓާ ހައުސް ކޫޕާސް ވަނީ ހޮވައިފަ އެވެ. އެ ކުންފުންޏަށް 385،500ރ. ދައްކަން ޖެހެ އެވެ.