ރަށްރަށުގެ މީހުންގެ ގެދޮރު ލޯނަށް ހުޅުވާލައިފި

މާލެ ސަހައްދު ފިޔަވައި އެހެން ރަށްރަށުގައި ދިރިއުޅޭ މީހުން ގެދޮރު އަޅަން ފަސޭހަކޮށްދިނުމަށް ސަރުކާރުން ދޫކުރަން ނިންމާފައިވާ "ގެދޮރުވެރިޔާ" ލޯނަށް ކުރިމަތިލާން މިއަދު ހުޅުވާލައިފި އެވެ.

މި ސަރުކާރުގެ ގެދޮރުވެރިކަމުގެ ސިޔާސަތުގެ ދަށުން ރަށްރަށުގެ މީހުންނަށް ގެދޮރު އެޅުމަށް، ހަ ޕަސެންޓްގެ އިންޓަރެސްޓް ރޭޓުގައި ހަތް ލައްކަ ރުފިޔާއާ ހަމަ އަށް ލޯނު ދޫކުރަން "ގެދޮރުވެރިޔާ" ގެ ނަމުގައި ރައީސް އިބްރާހިމް މުހައްމަދު ސޯލިހު ރޭ ވަނީ ސްކީމެއް އިފުތިތާހު ކޮށްދެއްވައިފަ އެވެ.

މިއަދު ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާނު މަބްރޫކު އަޒީޒް ވިދާޅުވީ، އެ ލޯނަށް ކުރިމަތިލުމަށް ފޯމު ހުށަހަޅަން މިހާރު ހުޅުވާލާފައިވާ ކަމަށެވެ.

ހައުސިން ޑިވެލޮޕްމަންޓް ފައިނޭންސް ކޯޕަރޭޝަން (އެޗްޑީއެފްސީ) މެދުވެރިކޮށް ދޫކުރާ އެ ލޯނަށް އެދި ހުށަަޅާ ފޯމު ލިބޭނީ އެޗްޑީއެފްސީގެ ވެބްސައިޓުން ކަމަށް މަބްރޫކު ވިދާޅުވި އެވެ.

މި ލޯނަށް ޝަރުތު ހަމަވަނީ، އެހެން ބިމެއް ރަޖިސްޓަރީ ވެފައި ނެތް، ބިން ރަޖިސްޓަރީ ވެފައިވާ ރަށުގެ ރަށްވެއްސަކަށް ވެފައި، ރަށްވެހި ވެފައިވާ ރަށުގައި ލޯނަށް އެދޭ މީހާ ނުވަތަ އެ މީހެއްގެ އާއިލާ ދިރިއުޅޭތާ މަދުވެގެން ތިން އަހަރު ވެފައިވާ މީހުންނަށެވެ.

އެ ސްކީމުގެ ދަށުން ލޯނު ދޫކުރާނީ އަމިއްލަ ގޯތީގައި އަލަށް ގެ އެޅުމަށް ނުވަތަ މަރާމާތު ކުރުމަށް ނުވަތަ ހަދަން ފަށާފައި ހުރި ތަނެއް ނިންމުމަށެވެ.

ލޯނު އަނބުރާ ދައްކަން އެންމެ ގިނަވެގެން 20 އަހަރު ލިބޭއިރު، އެންމެ ގިނަވެގެން އެއް ފަހަރާ ލޯނުގެ ގޮތުގައި ލިބޭނީ 700،000ރ. އެވެ.

އިމާރާތް ކުރުމަށް 12-15 މަސް ދުވަހުގެ ގްރޭސް ޕީރިއަޑެއް ލިބޭނެ އެވެ. އިމާރާތް ކުރާ ބިން މޯގޭޖް ކުރެވޭނެ ވެސް އެވެ.

ލޯނަށް އެދުމުގައި މަދުވެގެން ދެ ފަރާތް ހިމަނަން ޖެހެ އެވެ. ލޯނުގެ ގޮތުގައި ދޫކުރާނީ ޕްރޮޖެކްޓްގެ 80 ޕަސެންޓެވެ. ބާކީ 20 ޕަސެންޓް ދައްކަން ޖެހޭނީ ލޯނު ނަގާ ފަރާތެވެ.