ވޭލްސް އިން ސްވިޓްޒަލޭންޑް ހިފަހައްޓައިފި

ބާކޫ (12 ޖޫން) - ޔޫރޯ 2020ގެ ގުރޫޕް އޭގައި މިރޭ ސްވިޓްޒަލޭންޑާއި ވޭލްސް ބައްދަލުކުރި މެޗު 1-1 އިން އެއްވަރުވެއްޖެ އެވެ.

އަޒަރުބައިޖާންގެ ބާކޫގައި މިރޭ ކުޅުނު މެޗުގެ ދެވަނަ ހާފުގެ ކުރީކޮޅު ސްވިޓްޒަލޭންޑް އިން ލީޑު ނެގީ ބްރީލް އެމްބޯލޯ ޖެހި ލަނޑުންނެވެ. އެކަމަކު މެޗުގެ 74 ވަނަ މިނިޓުގައި ކިއެފާ މޯ ވަނީ ލަނޑު ޖަހައި، ވޭލްސް އަށް މެޗުގެ ނަތީޖާ ހަމަހަމަކޮށްދީފަ އެވެ.

މި ނަތީޖާއާމެދު ބޮޑަށް ހިތްހަމަޖެހޭނީ ވޭލްސް އެވެ. މުޅި މެޗަށް ބަލާއިރު، ގިނައިރު ބޯޅަ ގެންގުޅެ، ގިނަ ހަމާލަތައް އުފެއްދީ ސްވިޓްޒަލޭންޑުންނެވެ.

މެޗުގެ ދެވަނަ ހާފުގެ ކުރީކޮޅު އެމްބޯލޯ ސްވިޓްޒަލޭންޑަށް ލީޑު ހޯދައިދިނީ ޒެރްދާން ޝަކީރީ ކޯނަރަކުން ހުރަސްކޮށްލި ބޯޅަ ގޯލަށް އަމާޒުކޮށްލައިގެނެވެ.

މި ލަނޑަށް ފަހު، ވޭލްސް އިން ކުޅުން ރަނގަޅުކޮށް، މެޗުގެ ނަތީޖާ އެއްވަރުކުރަން މަސައްކަތް ކުރިތަން ފެނުނެވެ. ވޭލްސްގެ މަސައްކަތް ކާމިޔާބުވީ މެޗުގެ 74 ވަނަ މިނިޓުގައި މޯ ކާމިޔާބުކުރި ލަނޑުންނެވެ. ޖޯ މޮރެލް ހުރަސްކޮށްލި ބޯޅަ މޯ ބޮލުން ގޯލަށް އަމާޒުކޮށްލިއިރު، ސްވިޓްޒަލޭންޑްގެ ޑިފެންޑަރުންނަށް ތިބެވުނީ އޭނާ ދޫކޮށްލައިގެނެވެ.

ބަދަލު ކުޅުންތެރިއެއްގެ ގޮތުގައި ކުޅެންއެރި، ސްވިޓްޒަލޭންޑްގެ ފޯވަޑް މާރިއޯ ގަވްރަނޮވިޗް މެޗުގެ ފަހުކޮޅު ވޭލްސްގެ ގޯލަށް ބޯޅަ ފޮނުވާލި ނަމަވެސް، ވީއޭއާރް ބެލުމަށް ފަހު، އެ ލަނޑު އޮފްސައިޑް ކަމަށް ވަނީ ކަނޑައަޅައިފަ އެވެ.

މެޗުގެ ފަހުކޮޅު ސްވިޓްޒަލޭންޑް އިން ކުރިއަށް ޖެހި، ވޭލްސްގެ ޑިފެންސް ފޫއަޅުވާލުމަށް މަސައްކަތްކުރި ނަމަވެސް، ސްވިޓްޒަލޭންޑަށް ޖެހުނީ ޕޮއިންޓަކަށް ފުއްދާލާށެވެ.

ގުރޫޕް އޭގައި ރޭ ތުރުކީ އަތުން 3-0 އިން މޮޅުވެ މޮޅުވެ، އިޓަލީ އޮތީ ތާވަލްގެ އެއްވަނައިގަ އެވެ. ވޭލްސް އާއި ސްވިޓްޒަލޭންޑަށް ޕޮއިންޓެއް ލިބިފައިވާއިރު، ތުރުކީ އޮތީ ހުސްއަތާ ތާވަލްގެ ފުލުގަ އެވެ. -- އޭއެފްޕީ