ޖިންސީ ގޯނާގެ ތުހުމަތުކުރެވޭ ސްޕޭސީ އަށް ފިލްމެއް

އެތައް ބަޔަކު ޖިންސީ ފުރައްސާރައިގެ ތުހުމަތުކޮށްފައިވާ މަޝްހޫރު އެކްޓަރު ކެވިން ސްޕޭސީ ހޮލީވުޑުން އެކަހެރިކޮށްފައި ވަނިކޮށް، އޭނާ އަށް ފުރަތަމަ ފަހަރަށް ފިލްމަކުން ފުރުސަތު ލިބިއްޖެ އެވެ. އޭނާ އަށް ފުރުސަތު ލިބުނީ އިޓަލީގެ ފިލްމަކުންނެވެ.

އުމުރުން މިހާރު 61 އަހަރުގެ އެކްޓަރުގެ މައްޗަށް ތުހުމަތު ކުރެވުނު ބައެއް މައްސަލަތައް ކޯޓާ ހަމައަށް ގޮސްފައިވެ އެވެ. "ލުއޯމޯ ޗި ޑިޒެންގޯ ޑިއޯ" ކިޔާ މި ފިލްމަކީ އިޓަލީގެ އެކްޓަރު ފްރާންކޯ ނީރޯ ޑައިރެކްޓްކޮށް، މުހިއްމު ރޯލެއް ވެސް ކުޅޭ ސްޕައި ތުރިލާއެކެވެ. އޭނާގެ އަންހެނުން ވަނެސާ ރެޑްގްރޭވް ބަތަލާގެ ރޯލު ކުޅޭ ފިލްމުން ސްޕޭސީ އަށް ދީފައި ވަނީ ޑިޓެކްޓިވެއްގެ ރޯލެވެ.

ނީރޯ މި ފިލްމާ ބެހޭ ގޮތުން ސީއެންއެން އަށް ދިން ފޯނު އިންޓަވިއުއެއްގައި ބުނީ ހޮލީވުޑުން އެކަހެރިވެފައިވާ ކުޅަދާނަ އެކްޓަރަށް ފުރުސަތު ދިނީ އެއީ ވަރަށް މޮޅު އެކްޓްރަކަށްވާތީ ކަމަށެވެ. އެކަމަކު ސްޕޭސީގެ މައްޗަށް ޖިންސީ ގޯނާގެ ތުހުމަތުތަކެއް ކުރެވިފައި ވަނިކޮށް ފުރުސަތު ދިނުމަކީ އެންމެ ރަނގަޅު ނިންމުންތޯ ސުވާލުކުރުމުން ނީރޯ ބުނީ އެފަދަ އެއްވެސް މައްސަލައެއް ސްޕޭސީގެ މައްޗަށް މިހާތަނަށް ކޯޓަކުން ސާބިތުވެ، ހުކުމެއް ވެސް އައިސްފައި ނެތް ކަމަށެވެ.

"އެހެންވެ އަހަންނަކަށް ގަބޫލެއް ނުކުރެވޭ އޭނަގެ މައްޗަށް ކުރާ ތުހުމަތުތަކުގައި އެއްވެސް ހަގީގަތެއް އޮތް ކަމަކަށް،" މިހާތަނަށް ގިނަ ފިލްމުތަކެއްގައި މަސައްކަތްކޮށްފައިވާ ނީރޯ، 79، ބުންޏެވެ. "އަހަރެން ގަބޫލުކުރަނީ އެއީ މުޅިން ދޮގު ތުހުމަތުތަކެއް ކަމަށް."

"އެމެރިކަން ބިއުޓީ" އާއި "ދި އަންޔޫޝުއަލް ސަސްޕެކްޓްސް" އާއި "އެލްއޭ ކޮންފިޑެންޝަލް" އަދި "ބޭބީ ޑްރައިވާ" ފަދަ މަޝްހޫރު އެތައް ފިލްމެއް ކުޅެފައިވާ ސްޕޭސީގެ މައްޗަށް އެންމެ ފުރަތަމަ ޖިންސީ ގޯނާގެ ތުހުމަތު 2017 ގައި ކުރީ އެކްޓަރު އެންތަރީ ރެޕެވެ. އެންތަނީ ބުނެފައިވާ ގޮތުގައި ސްޕޭސީ އޭނާއާ ބެހުނީ އުމުރުން 14 އަހަރުގައި 1986 ގަ އެވެ. އެކަމަކު އެ ތުހުމަތާ ގުޅިގެން ސްޕޭސީ ބުނީ އެފަދަ ކަމެއް ހިނގިކަން ހަދާން ނެތް ކަމަށެވެ.

ފަހުން އޭނާގެ މައްޗަށް ޖިންސީ ގޯނާގެ ތުހުމަތުކުރި މީހުންގެ ތެރޭގައި ސްޕޭސީ ވަރުގަދަ ރޯލެއް ކުޅުނު ނެޓްފްލިކްސްގެ ސީރީޒް "ހައުސް އޮފް ކާޑްސް" ގެ ބައެއް އެކްޓަރުން ހިމެނެ އެވެ. އެ މައްސަލައާ ގުޅިގެން ސްޕޭސީން އެ ސީރީޒުން ވަކިކުރި އެވެ.

ޖިންސީ ގޯނާގެ ތުހުމަތުތަކުން ކެރިއަރަށް އެޅުނު ހިޔަންޏާ އެކު އޭނާ އަށް އެތައް ފުރުސަތެއް ގެއްލި، ހޮލީވުޑުން އެކަހަރިކުރި އެވެ. އެގޮތުން ކުޅެ ގާތްގަނޑަކަށް ނިމިފައި އޮތް 2017 ގެ ފިލްމު "އޯލް ދަ މަނީ އިން ދަ ވޯލްޑް" ގައި ވެސް ސްޕޭސީ ނުހިމަން ނިންމައި ފިލްމު ރިލީޒްކުރީ، އޭނާ ކުޅުނު ކެރެކްޓާ ކްރިސްޓޯފާ ޕްލަމާ ލައްވައި ކުޅުވައިގެންނެވެ.

ސްޕޭސީގެ ފިލްމަކަށް އެންމެ ފަހުން ރިލީޒްކުރި ފިލްމަކީ 2018 ގެ ބައޮގްރަފިކަލް ކްރައިމް ޑްރާމާ "ބިލިއަނާ ބޯއިޒް ކުލަބް" އެވެ.

އޭނާ ސޮއިކުރި އިޓަލީގެ ފިލްމާ ބެހޭ ގޮތުން ޑައިރެކްޓަރު ބުނީ އެއީ އިޓަލީ ބަހުން ހަދާ ފިލްމެއް ނަމަވެސް ސްޕޭސީގެ ކެރެކްޓާ ވާހަކަ ދައްކާނީ އިނގިރޭސިން ކަމަށެވެ. މިހާރު ޝޫޓިން ވެސް ފަށާފައިވާ ފިލްމު ރިލީޒްކުރާނީ އަންނަ އަހަރު އެވެ.

ފިލްމާ ބެހޭ ގޮތުން ސްޕޭސީ އެއްވެސް ވާހަކައެއް ނުދައްކަ އެވެ.