ޕޯޗުގަލްގެ ކްލަބަކުން ބުފޯން އަށް ހުށަހެޅީ ފޮނި ކާއެއްޗެއްސާއި ދާރުލްއާސާރުގެ ޓިކެޓު!

ލިޒްބަން (23 މެއި) - ޕޯޗްގަލްގެ ފަސް ވަނަ ޑިވިޝަންގެ ކުލަބު އޯސް ބެލެނެންސެސް އިން، އިޓަލީގެ ލެޖެންޑްރީ ކީޕަރު ޖިއާލުއީޖީ ބުފޯން އަށް ތަފާތު ކޮންޓުރެކްޓެއް ހުށަހަޅައިފި އެވެ. އެ ކްލަބުން "ސަމާސާ" އަކަށް ބުފޯން އަށް ހުށަހަޅާފައިވާ ކޮންޓުރެކްޓްގައި ފޮނި ކާއެއްޗެއްސާއި ދާރުލްއާސާރަށް ވަނުމުގެ ޓިކެޓު ހިމެނެ އެވެ.

މި ސީޒަނަށް ފަހު ޔުވެންޓަސް ދޫކޮށްލާނެ ކަމަށް ބުފޮން ،43، ވަނަ މިދިޔަ ހަފުތާގައި އިއުލާންކޮށްފަ އެވެ. އެއާއެކު އޭނާ ގެންދަން ބޭނުންވާ ކްލަބަކަށް ހިލޭ އޭނާ ލައްވައި ސޮއި ކުރުމުގެ ފުރުސަތު އެބައޮތެވެ.

މި ދަނޑިވަޅުގެ ބޭނުން ހިފައި، ބެލެނެންސެސް އިން ވަނީ ބުފޯން އަށް ސަމާސާއަކަށް ތަފާތު ހުށަހެޅުމެއް ދީފަ އެވެ. ބެލެނެންސެސް އިން ބުފޮން އަށް ފޮނުވި ހުޅުވާލެވިފައިވާ ސިޓީއެއްގައި ބުނެފައި ވަނީ، އޭނާ ކުޅޭނެ ކްލަބެއް ބަލަމުންދާ ކަމަށް އެނގިފައިވާ ކަމަށެވެ. އަދި އޭނާ ބޭނުންނަމަ ބެލެނޭންސެސް އިން ކޮންޓްރެކްޓެއް ހުށަހަޅަން ތައްޔާރަށް ތިބި ކަމަށް އެ ކަލްބުގެ ސިޓީގައި ބުނެފައި ވެއެވެ.

"އެހެންވެ އަހަރެމެން މިތިބީ ވަރަށް ޝައުގުވެރި ކޮންޓްރެކްޓެއް ހުށަހަޅަން ތައްޔާރު ވެގެން،" އެ ކްލަބުން ބުނެފައި ވެއެވެ.

"މި ހުށަހެޅުން ގަބޫލުކޮށް ލިޒްބަން އަށް ބަދަލުވެ މި ކްލަބުގެ ހަގީގީ މަގާމު ކަމަށްވާ ޕޯޗްގަލްގެ ޓޮޕް ލީގަށް (ފުރަތަމަ ޑިވިޝަނަށް) އަހަރެމެން ޕްރޮމޯޓް ކޮށްދިނުމުގައި އެހީތެރިކަން ވެ ދިނުން އެދެން."

އެ ކްލަބުގެ ހުށަހެޅުމުގައި ވަނީ، ލިޒްބަންގެ ޓުއަރިސްޓް އޭރިއާތަކަށް ޒިޔާރަތް ކުރުމުގައި ހިލޭ ޓިކެޓް ދޭނެ ކަމަށް ބުނެފަ އެވެ. އަދި ލިޒްބަންގެ ދާރުލްއާސާރުތަކަށް ޒިޔާރްތް ކުރުމުގައި އެނައުލް ޓިިކެޓް ދިނުމަށްވެސް ހުށަހަޅައިފައި ވެއެވެ.

ބެލެނެންސެސްގެ އެންމެ ހެއްވާ ހުށަހެޅުމަކީ ޕޯޗުގަލްގައި މަގްބޫލު ހަ ވައްތަރެއްގެ ކަސްޓަޑް ޓާޓް ވެސް ބުފޯން އަށް ލިބޭނެ ކަމަށް ބުނެފައި އޮތުމެވެ.

"މިއީ ޕޯޗުގަލްގެ އެންމެ މަގްބޫލު ފޮނި ކާއެއްޗެހީގެ ތެރޭގައި ހިމެނޭ އެއްޗެއް. ޔަގީނުން ވެސް ބުފޯން އަށް މި ވަރަށް ކަމުދާނެ،" ބެލެނެންސެސްގެ ސިޓީގައި ބުނެފައިވެ އެވެ.

ބެލެނެންސެސް އަކީ ޕޯޗްގަލްގެ އެންމެ ދުވަސްވީ އެއް ކްލަބެވެ. ނަމަވެސް 2018 ގައި އެ ކުލަބު ދެ ފަޅިވެ ޕޯޗްގަލްގެ ފުޓްބޯޅައިގެ އެންމެ ފަހަތުން ފަށަން މަޖުބޫރުވި އެވެ. އެ ޓީމުން ވަނީ ޕޯޗަގަލްގެ ލީގު 1946 ގައި ހޯދާފަ އެވެ. އަދި ޕޯޗްގަލް ކަޕްވެސް ތިން ފަހަރު ހޯދި އެވެ.