ދޯނީގައި ބިދޭސީމީހާ މަރާލި މައްސަލައިގައި ދައުވާކޮށްފި

މަސް ދޯންޏެއްގައި ހިނގި ހަމަނުޖެހުމެއްގައި ލިބުނު ޒަހަމްތަކަށް ފަރުވާ ހޯދަމުން ދަނިކޮށް ބަންގްލަދޭޝްގެ މީހަކު މިދިޔަ މާޗު މަހު މަރުވި މައްސަލައިގައި ދައުވާކޮށްފި އެވެ.

ޕްރޮސެކިއުޓާ ޖެނެރަލް (ޕީޖީ) އޮފީހުގެ މީޑިއާ އޮފިޝަލް އަދި ޕަބްލިކް ޕްރޮސެކިއުޓާ އަހުމަދު ޝަފީއު މިއަދު ވިދާޅުވީ ދ. މީދޫ "ޖިހާދު" ދޯނީގައި މަސައްކަތްކުރި މުހައްމަދު ޝާހީނަށް ވަޅިން ހަމަލާދީ މަރައިލި މައްސަލައިގައި، މުހައްމަދު މަސްއޫދު ނަމަކަށް ކިޔާ މީހެއްގެ މައްޗަށް ދައުވާކޮށް، މި މަހުގެ ފަސް ވަނަ ދުވަހު ކޯޓަށް ހުށަހަޅާފައިވާ ކަމަށެވެ.

މާޗު، 7 ގައި ހިނގި ހާދިސާއާ ގުޅިގެން، ބަންގްލަދޭޝްގެ ރައްޔިތެއް ކަމަށްވާ މަސްއޫދުގެ މައްޗަށް ދައުވާކުރަނީ ގަސްދުގައި މީހަކު މެރުމުގެ ކުށުގެ ދައުވާ އެވެ. ތ. ގުރައިދޫ ކައިރީގައި ދޯނި އޮއްވައި ހިނގި ހަމަނުޖެހުމުގައި ޝާހީނަށް ޒަހަމްވުމުން ފަރުވާ ދޭން އެންމެ ފުރަތަމަ ގެންދިޔައީ އެ އަތޮޅު ވޭމަންޑޫ ހޮސްޕިޓަލަށް ގެންގޮސްފަ އެވެ. ނަމަވެސް ފަރުވާ ދެމުންދަނިކޮށް އެ ދުވަހުގެ މެންދުރު 11:59 ހާއިރު އެ މީހާ ވަނީ މަރުވެފަ އެވެ. އެ މައްސަލައާ ގުޅިގެން އޭރު 42 އަހަރުގެ ފިރިހެނަކު ހައްޔަރު ވެސް ކުރި އެވެ. ހަމަލާ ދިންއިރު ދޯނީގައި ތިބި 12 މީހުންގެ ތެރެއިން އަށް މީހުންނަކީ ބިދޭސީންނެވެ.