ގަމުގައި ބިދޭސީއަކު މަރައިލި މީހާ އުމުރަށް ޖަލަށްލުމުން ހައި ކޯޓަށް

ލ. ގަމުގައި ބިދޭސީއަކު މަރައިލި މީހާ އުމުރަށް ޖަލަށްލައި، 1.3 މިލިއަން ރުފިޔާ މަރުގެ ދިޔައިގެ ގޮތުގައި ދައްކަން އެންގި މައްސަލަ ހައި ކޯޓުގައި އިސްތިއުނާފްކޮށްފި އެވެ.

ބަންގްލަދޭޝްގެ މީހަކު ނިދާފައި އޮއްވައި 2015 ވަނަ އަހަރު މަރާލި މައްސަލައިގައި މިދިޔަ ފެބްރުއަރީ މަހު ކްރިމިނަލް ކޯޓުން އުމުރު ދުވަހުގެ ޖަލު ހުކުމެއް އިއްވީ އެ ރަށު ރެޑްފިޝް، އަލީ ހަމްޒާގެ މައްޗަށެވެ.

އެ މައްސަލަ އިސްތިއުނާފް ކުރަން ހަމްޒާގެ ފަރާތުން ހުށަހެޅި މައްސަލަ ހައި ކޯޓުން ވަނީ ބަލައިގެންފަ އެވެ.

ހަމްޒާގެ މައްޗަށް ދައުލަތުން ކުރީ ގަސްދުގައި މީހަކު މެރުމުގެ ދައުވާ ކަމަށް ވިޔަސް، ކްރިމިނަލް ކޯޓުން ނިންމީ އޭނާގެ މައްޗަށް ސާބިތުވަނީ ގަސްދަކާ ނުލައި މީހަކު މެރިކަން ކަމަށެވެ.

އެއީ މެރުމުގެ ނިޔަތް އޮތްކަން އެނގެން ނެތުމުންނެވެ.

ހަމްޒާ ޖަލަށްލާން ހުކުމް ކުރުމުން ކްރިމިނަލް ކޯޓުގައި ހަޑިހުތުރު ބަހުން ވާހަކަ ދައްކާފައިވާތީ ކޯޓު ހުރުމަތް ކެނޑުމުގެ އަދަބެއްގެ ގޮތުން 15 ދުވަހުގެ ޖަލު ހުކުމެއް ވެސް އޭނާގެ މައްޗަށް އެދުވަހު އިއްވި އެވެ.