އެލްޖީއޭގެ އާ ބޯޑުގެ ރައީސަކަށް އިމްރާން، ސީއީއޯއަކީ އަފްޝަން

މިދިޔަ މަހުގެ 10 ގައި ބޭއްވި ލޯކަލް ކައުންސިލްތަކުގެ އިންތިހާބުގައި ހޮވި އާ ކައުންސިލަރުން މަގާމުގެ ހުވާ މިއަދު ކުރެއްވުމާ ގުޅިގެން، ލޯކަލް ގަވަމެންޓް އޮތޯރިޓީ (އެލްޖީއޭ) ގެ ބޯޑު އަލުން އެކުލަވާލައްވައި، އެ ބޯޑުގެ ރައީސަކަށް ހޯމް މިނިސްޓަރު އިމްރާން އަބްދުﷲ އައްޔަން ކުރައްވައިފި އެވެ.

ރައީސް އިބްރާހިމް މުހައްމަދު ސޯލިހު މި ބޯޑަށް މެމްބަރުން ނެންގެވީ، ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ 59 ވަނަ މާއްދާގެ (ހ) ގައި ބަޔާންކުރާ ގޮތުގެ މަތިންނެވެ.

އެ ބޯޑުގައި މިނިސްޓަރު އިމްރާންގެ އެއް ޒިންމާއަކީ އެލްޖީއޭއާ ގުޅޭގޮތުން ރައްޔިތުންގެ މަޖިލީހަށް ޖަވާބުދާރީވުމެވެ.

އެލްޖީއޭގެ ޗީފް އެގްޒެކެޓިވް އޮފިސަރު (ސީއީއޯ) ކަމަށް އައްޔަންކުރެއްވީ، އާ ކައުންސިލަރުން މަގާމާ ހަވާލުވަންދެން، މިހާތަނަށް އެކުލަވާލާފައި އޮތް ވަގުތީ ބޯޑުގައި ވެސް އެ މަގާމު ފުރުއްވަމުން ގެންދެވި ފާތިމަތު އަފްޝަން ލަތީފެވެ. އޭނާ އަކީ އެމްޑީޕީގެ ކުރީގެ ޑެޕިއުޓީ ސެކްރެޓަރީ ޖެނެރަލެވެ.

އާ އެލްޖީއޭގެ ބޯޑުގައި މާލީ ކަންކަމާ ގުޅޭ ވުޒާރާ ތަމްސީލު ކުރައްވާ ބޭފުޅެއްގެ ގޮތުގައި ރައީސް ކަނޑައެޅުއްވީ ފިނޭންސް މިނިސްޓްރީގެ ސްޓޭޓް މިނިސްޓަރު އަހްމަދު ޝަރީފެވެ.

އާ ކައުންސިލަރުން މަގާމުގެ ހުވާކުރައްވަންދެން މިހާތަނަށް އެލްޖީއޭ ހިންގަމުން އައީ ހާއްސަ ގާނޫނަކުން ބާރު ލިބިގެން ރައީސް އެކުލަވައިލައްވާފައިވާ ވަގުތީ ބޯޑަކުންނެވެ.

މި ފަހަރުގެ ލޯކަލް ކައުންސިލްތަކުގެ އިންތިހާބުގައި ރާއްޖޭގެ ހަތަރު ސިޓީ އާއި ރަށްރަށުން އިންތިހާބުކުރި ބޭފުޅުން މިއަދު ވަނީ މަގާމުގެ ހުވާކުރައްވައިފަ އެވެ. ކޮވިޑާ ގުޅިގެން މޮނިޓަރިންގައި އޮތް ރަށްރަށުގައި ހުވާކުރުމުގެ ރަސްމިއްޔާތު ބޭއްވީ އޮންލައިންކޮށެވެ.

ހައި ކޯޓުން ނެރެފައިވާ އަމުރާ ގުޅިގެން ގއ. ކޮނޑޭ ކައުންސިލްގެ ރައީސް، ހއ. ފިއްލަދޫ ކައުންސިލްގެ ރައީސް، ލ. މާބައިދޫ ކައުންސިލްގެ ރައީސް އަދި ތ. ކަނޑޫދޫ ކައުންސިލް މެންބަރުން ހުވާކުރުމުގެ ރަސްމިއްޔާތު ވަނީ ފަސްކޮށްފަ އެވެ.