މިއީ ލާމަރުކަޒީ ނިޒާމު ރަން އަކުރުން ފެވިގެންދާ ދުވަހެއް: ރައީސް

މިދިޔަ މަހުގެ 10 ގައި ބޭއްވި ލޯކަލް ކައުންސިލްތަކުގެ އިންތިހާބުގައި އަލަށް ހޮވި ކައުންސިލަރުން މިއަދު ހުވާކުރެއްވުމަކީ ލާމަރުކަޒީ ނިޒާމުގެ ތާރީޚުގައި ރަން އަކުރުން ފެވޭނެ ދުވަހެއް ކަމަށާއި އާ ކައުންސިލަރުންގެ ތިން ބައިކުޅަ އެއް ބަޔަކީ އަންހެނުންނަށް ވުމަކީ ކުރީގެ އިންތިހާބުތަކާ މި ފަހަރު ތަފާތުވި ސަބަބު ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.

އާ ކައުންސިލަރުން މަގާމުގެ ހުވާކުރެއްވުމާ ގުޅިގެން، ގައުމާ މުހާތަބު ކުރައްވަމުން ރައީސް މިރޭ ވިދާޅުވީ، ތާރީޚީ ދުވަހަކަށް މިއަދު ވީ، ގާނޫނީ ގޮތުން ހަގީގީ ލާމަރުކަޒީ ނިޒާމުން، އަތޮޅުތަކާއި ސިޓީތަކާއި އަދި ރަށްތައް ހިންގަން ފެށުނު ދުވަސް ކަމަށް ވެފައި އަދި ފުރަތަމަ ފަހަރަށް ރައްޔިތުންގެ އާންމު ވޯޓަކުން އިންތިހާބުކުރި ރަށު ކައުންސިލްތަކުގެ ރައީސުންނާއި އަތޮޅު ކައުންސިލްތަކުގެ ރައީސުންނާއި ސިޓީތަކުގެ މޭޔަރުން އެ ބޭފުޅުންގެ މަގާމުގެ ޒިންމާތަކާ ހަވާލުވެވަޑައިގެންނެވި ދުވަސް ވުމުން ކަމަށެވެ.

"މިއަދު މި ހިނގަން ފަށާ ކައުންސިލްތަކުން، އެންމެ ބޮޑު އިސްކަމެއް ދޭންޖެހޭނީ، ގައުމީ ތަރައްގީގެ ޕްލޭނާ އެއްގޮތަށް، ރައްޔިތުންނަށް އެންމެ ފައިދާ ހުރި ގޮތަށް، ސިޓީތަކާއި ރަށްތައް ތަރައްގީ ކޮށްދިނުމަށް،" ރައީސް ވިދާޅުވި އެވެ.

"ސިޔާސީ ގޮތުންނާއި އިޖުތިމާއީ ގޮތުން އަންހެނުން ބާރުވެރިކުރުމާއި ގައުމީ ތަރައްގީގައި އަންހެނުންނަށް ހަމަހަމަ ފުރުސަތު ހޯދައިދިނުމާއި ރަށު ތަރައްގީގައި އަންހެނުން ބައިވެރި ކުރުމުގައި ވެސް، އައު ކައުންސިލަރުން ވަރަށް މުހިންމު ދައުރެއް އަދާކުރައްވަން ޖެހިވަޑައިގަންނަވާނެ."

ރައީސް ވިދާޅުވިގޮތުގައި، ލާމަރުކަޒީ ގާނޫނަށް ބަދަލުތައް ގެނައުމުގެ ކުރިން، ވަރަށް ފުޅާ ދާއިރާއެއްގައި ރައްޔިތުންގެ ހިޔާލާއި މަޝްވަރާ ހޯދި އެވެ. އެ މަޝްވަރާއާ އެއްގޮތަށް ގާނޫނު އިސްލާހުކޮށް، ލާމަރުކަޒީ ނިޒާމަށް ބަދަލުތައް ގެނައީ، ރައްޔިތުންގެ ބޭނުންވާ ބަދަލުތަކާ އެކުގައި ކުރިއަށް ދިއުމަށް އެ މަނިކުފާނު ވިދާޅުވި އެވެ.

އެހެންކަމުން ތަރައްގީގެ ޕްލޭންތައް ތައްޔާރުކޮށް،، އެ ޕްލޭނާ އެއްގޮތަށް ރަށްރަށާއި ސިޓީތައް ތަރައްގީ ކުރުމުގައި ހުރިހާ ކައުންސިލަރުން ވެސް ޚާއްސަ ސަމާލުކަމެއް ދެއްވާނެ ކަމަށް އުއްމީދު ކުރައްވާ ކަމަށް ރައީސް ވިދާޅުވި އެވެ..

"މީގެ ކުރިން މަރުކަޒީ ސަރުކާރުގައި ހުރި، އިދާރީ ވަރަށް ގިނަ ޒިންމާތަކާއި މަސްއޫލިއްޔަތުތަކެއް، މިހާރު އެ ހުރީ ކައުންސިލްތަކާ ހަވާލުކުރެވިފައި. ކައުންސިލަރުންނަށާއި ކައުންސިލްތަކަށް ވެސް ގާނޫނީ ބާރު ދީ، ރަށްރަށުގެ އިހްތިސާސް މިހާރު ކަނޑައަޅައިފި،" ރައީސް ވިދާޅުވި އެވެ.

މިހާރު ރާއްޖެ އަށް ކުރިމަތިވެފައިވާ ކޮވިޑް-19ގެ ދަތި އުނދަގުލުން އަރައިގަތުމަށްޓަކައި ކައުންސިލަރުންގެ އެހީތެރިކަން ވަރަށް ބޮޑަށް ބޭނުންވާ ކަމަށާއި އެ ބަލި ކޮންޓްރޯލް ކުރުމުގައި މިހާރަށް ވުރެ ވެސް ފުޅާ ދާއިރާއެއްގައި އެ ބޭފުޅުންގެ އެއްބާރުލެއްވުމަށް ރައީސް އުންމީދު ކުރައްވަ އެވެ.

މި ފަހަރުގެ ލޯކަލް ކައުންސިލްތަކުގެ އިންތިހާބުގައި ރާއްޖޭގެ ހަތަރު ސިޓީ އާއި ރަށްރަށުން އިންތިހާބުކުރި ބޭފުޅުން މިއަދު ވަނީ މަގާމުގެ ހުވާކުރައްވައިފަ އެވެ. ކޮވިޑާ ގުޅިގެން މޮނިޓަރިންގައި އޮތް ރަށްރަށުގައި ހުވާކުރުމުގެ ރަސްމިއްޔާތު ބޭއްވީ އޮންލައިންކޮށެވެ.

ހައި ކޯޓުން ނެރެފައިވާ އަމުރާ ގުޅިގެން ގއ. ކޮނޑޭ ކައުންސިލްގެ ރައީސް، ހއ. ފިއްލަދޫ ކައުންސިލްގެ ރައީސް، ލ. މާބައިދޫ ކައުންސިލްގެ ރައީސް އަދި ތ. ކަނޑޫދޫ ކައުންސިލް މެންބަރުން ހުވާކުރުމުގެ ރަސްމިއްޔާތު ވަނީ ފަސްކޮށްފަ އެވެ.