މާލޭގެ ޑެޕިއުޓީ މޭޔަރު އިންތިހާބުކުރާނީ ފަހުން

މާލޭގެ އާ މޭޔަރު ކުރީގެ ހައުސިން މިނިސްޓަރު ޑރ. މުހައްމަދު މުއިއްޒާއި މާލޭ ސިޓީ ކައުންސިލްގެ އާ ކައުންސިލަރުން މަގާމުގެ ހުވާ މިއަދު ކުރައްވާފައިވާއިރު، ޑެޕިއުޓީ މޭޔަރު އިންތިހާބުކުރުން ފަސްކޮށްފި އެވެ.

މާލޭ ސިޓީ ކައުންސިލްގެ އާ ދައުރުގައި ޑެޕިއުޓީ މޭޔަރު ކަމަށް މިހާތަނަށް ޝައުގުވެރިކަން ފާޅުކުރައްވާފައި ވަނީ ހުޅުމާލޭ ދާއިރާގެ މެމްބަރު އިބްރާހިމް ޝުޖާއު އާއި ވިލިމާލޭ ދާއިރާގެ މެމްބަރު ނަހުލާ އަލީ އަދި މާފަންނު މެދު ދާއިރާގެ މެމްބަރު އަހުމަދު ނަރީޝް އެވެ.

އާ ކައުންސިލްގެ ފުރިހަމަ އަޣުލަބިއްޔަތު ޕީޕީއެމަށް ލިބިފައިވާއިރު، އެ ޕާޓީ އަށް ނިސްބަތްވާ އެ ތިން ބޭފުޅުންގެ މެދުގައި ޑެޕިއުޓީ މޭޔަރަކަށް ވުމުގެ ވާދަވެރިކަން ވަރަށް ބޮޑެވެ.

ސިޓީ ކައުންސިލްގެ ހަތަރު ވަނަ ދައުރުގެ ފުރަތަމަ ޖަލްސާގައި، އިދިކޮޅު ޕީޕީއެމްގެ ނައިބު ރައީސްކަން ވެސް ކުރައްވާ މުއިއްޒު މިއަދު ވިދާޅުވީ، އާ ޑެޕިއުޓީ މޭޔަރު އިންތިހާބު ކުރުމަށް އެ ޖަލްސާގައި ވޯޓަށް އަހާ ގޮތަށް ހަމަޖެހިފައި ނުވާ ކަމަށެވެ.

އޭނާ ވިދާޅުވިގޮތުގައި، ލޯކަލް ގަވަމެންޓް އޮތޯރިޓީ (އެލްޖީއޭ) އިން ލަފާދެނީ ޑެޕިއުޓީ މޭޔަރު އިންތިހާބުކުރަން ޖެހޭނީ ހުރިހާ ކައުންސިލަރުން އެއް ތަނަކަށް ޖަމާވެ، ބާއްވާ ޖައްސާއެއްގަ އެވެ. އެކަމަކު ކޮވިޑް-19 އާ ގުޅިގެން، އާ ކައުންސިލްގެ ފުރަތަމަ ޖަލްސާ އޮންލައިންކޮށް ކުރިއަށް ގެންދާތީ ވޯޓަށް ނާހަން ނިންމީ އެވެ.

ކައުންސިލްތަކަށް ރައީސުންނާއި އަތޮޅު ކައުންސިލަރުން އަދި މޭޔަރުން ވެސް އިންތިހާބުކުރަނީ ރައްޔިތުންގެ ވޯޓުން ނަމަވެސް ޑެޕިއުޓީ މޭޔަރުންނާއި ނައިބު ރައީސުން އިންތިހާބުު ކުރަނީ ކައުންސިލަރުންގެ މެދުގައި ނަގާ ސިއްރު ވޯޓަކުންނެވެެ.

މާލޭގެ އާ ޑެޕިއުޓީ މޭޔަރުގެ އިންތިހާބު ބާއްވާނެ ދުވަހެއް އަދި ނުނިންމަ އެވެ.