ފަގީރަކު ނެތުމުން ދެ ރަށެއްގެ ޒަކާތު ފައިސާ އެހެން ރަށަކަށް

ބ. ކެންދު އާއި އެ އަތޮޅު ގޮއިދޫގައި މި އަހަރު ފަގީރަކު ނެތުމުން، ފިތުރު ޒަކާތުގެ ގޮތުގައި އެ ދެ ރަށުން ލިބުނު ފައިސާ އެ އަތޮޅު ތުޅާދޫގެ ފަގީރުންނަށް ހަދިޔާކޮށްފި އެވެ.

ތުޅާދޫ ކައުންސިލްގެ ރައީސް އަހުމަދު ރަޝީދު ވިދާޅުވި ގޮތުގައި ކެންދޫން ޒަކާތުގެ ގޮތުގައި ލިބުނު 18،341.23 ހަދިޔާކޮށްފައިވާއިރު ގޮއިދޫން ލިބުނު 10،298.56 ވަނީ އެ ރަށަށް ހަދިޔާކޮށްފަ އެވެ.

ތުޅާދޫން ޒަކާތު ފައިސާގެ ގޮތުގައި ލިބުނީ 32،570ރ. އެވެ.

ތުޅާދޫގަައި މިއަހަރު ފަގީރުންގެ ގޮތުގައި 33 މީހަކު އެބަ ތިއްބެވެ. ޒަކާތު ފައިސާގެ ގޮތުގައި ލިބުނު ޖުމްލަ 61،209ރ. އެ އެންމެންގެ މެދުގައި ބެހެމުން ބޮލަކަށް ޖެހެނީ 1854ރ. އެވެ.

ކެންދު އާއި ގޮއިދޫން ވެސް މި އަހަރުގެ ފަގީރުންގެ ލިސްޓުގައި ޖެހުމަށް އެކަކު ފޯމު ލާފައިވެ އެވެ. އެކަމަކު އިސްލާމިކް މިނިސްޓްރީންް ބަލާ މިންގަނޑުތަކަށް ބެލުމަށް ފަހު، އެ މީހުންނަކީ ފަގީރުން ކަމަށް ކަނޑައަޅައިފައި ނުވާ ކަމަށް ދެ ރަށު ކައުންސިލުން ބުނެފައިވެ އެވެ.

ރަށުގައި ފަގީރުން ނެތުމުން ކެންދޫ އާއި ގޮއިދޫން ޒަކާތުގެ ގޮތުގައި ލިބުނު ފައިސާ ތުޅާދު އަށް ހަދިޔާކުރިިއިރު މީގެ ކުރިން ވެސް އެ އަތޮޅުގެ ބައެއް ރަށްތަކުގައި ފަގީރުން ނެތިމުން މިގޮތަށް ލިބޭ ފައިސާ އެހެން ރަށްރަށަށް ހަދިޔާކޮށްފައިވެ އެވެ.