ދެ މައްސަލައިން ސަލާމަތްވިޔަސް ޝަޒައިލް އަދިވެސް ސަސްޕެންޝަނުގައި

އެންޓި ކޮރަޕްޝަން ކޮމިޝަން (އޭސީސީ) އަދި ފުލުހުން ބެލި މައްސަލައިން މޯލްޑިވް ގޭހުގެ މެނޭޖިން ޑިރެކްޓަރު ޝަޒައިލް ޝިޔާމް ސަލާމަތްވި ނަމަވެސް އޭނާ އަދި ވެސް ހުންނެވީ ސަސްޕެންޝަނުގައި ކަމަށް ރައީސް އޮފީހުން މިއަދު ބުނެފި އެވެ.

އެ އޮފީހުގެ ތަރުޖަމާނު މަބްރޫކް އަޒީޒް ވިދާޅުވީ ޝަޒައިލް ސަސްޕެންޝަނާ މެދު އަދި އިތުރު ގޮތެއް ނުނިންމާ ކަމަށެވެ. އިތުރު ތަފްސީލެއް އަދި ނުދެއްވަ އެވެ.

ކުރީގެ ރައީސް މައުމޫން އަބްދުލްގައްޔޫމްގެ އެމްއާރުއެމް ސްލޮޓުގައި އެމްޑީކަމަށް އައްޔަންކުރެއްވި ޝަޒައިލް މުސާރަ ނުލިބޭގޮތަށް ސަސްޕެންޑުކުރީ ކޮރަޕްޝަންގެ މައްސަލަތައް ހުށަހަޅަން ރައީސް އޮފީހުން ގާއިމްކޮށްފައިވާ ޕޯޓަލް އަށް ހުށަހެޅި ޝަކުވާތަކަކާ ގުޅިގެން އޮކްޓޯބަރު 15، 2019 ގަ އެވެ. އެއަށް ފަހު، ޝަޒައިލަށް ތުހުމަތުކުރާ ދެ މައްސަލައެއް އޭސީސީ އަދި ފުލުހުން ބެލި އެވެ.

އޭނާއާ ދެކޮޅަށް އޭސީސީއަށް ކުރިން ހުށަހެޅި ރިޝްވަތުގެ މައްސަލަ ސާބިތުނުވާ ކަމަށް އެ ކޮމިޝަނުން ވަނީ ބުނެފަ އެވެ.

އެސްޓީއޯގެ ސަބްސިޑަރީ ކުންފުންޏެއް ކަމަށްވާ މޯލްޑިވް ގޭސް އަށް ގެންނަ ގޭސް ސިލިންޑަރުތަކުން ޝަޒައިލް ރިޝްވަތު ނަގާކަމަށް ބުނެ އޭސީސީން އެ މައްސަލަ ބަލަނިކޮށް މަނީ ލޯންޑަރިންގެ މައްސަލައެއް ފާހަގަކުރެވިގެން އެކަން ބަލައިދިނުމަށް ފުލުހުންނަށް ހުށަހެޅީ ވެސް އެ ކޮމިޝަނުންނެވެ.

ނަމަވެސް މާޗު 10 ގައި ފުލުހުން ޝަޒައިލަށް ފޮނުވި ލިޔުމުގައި ބުނީ، މަނީ ލޯންޑަރިންގެ ތުހުމަތު ކުރެވޭ އަމަލެއް އޭނާގެ ފަރާތުން މިހާތަށް ފެނިފައިނުވާތީ މައްސަލަ ފައިލްކޮށްފައިވާ ކަމަށެވެ.