Roadha Mihaaru
ރެޑް ނޯޓިސް ނެރެގެން ވިޔަސް އަލީގެ މައްސަލަ ކުރިއަށް

ރެޑް ނޯޓިސް ނެރެގެން ވިޔަސް އަލީ ވަހީދުގެ މައްސަލަ ކުރިއަށް ގެންދާނަން: ޕީޖީ

20 އެޕްރީލް 2021

ޖިންސީ ކުށުގެ ހަތް ދައުވާއެއް އުފުލާފައިވާ ކުރީގެ ޓޫރިޒަމް މިނިސްޓަރު އަލީ ވަހީދުގެ މައްސަލަ، އިންޓަޕޯލް ރެޑް ނޯޓިސް ނެރެގެން ވިޔަސް، ކުރިއަށް ގެންދަވާނެ ކަމަށް ޕްރޮސެކިއުޓާ ޖެނަރަލް ހުސެއިން ޝަމީމް ވިދާޅުވެއްޖެ އެވެ.

މާއިދާ މުހައްމަދު ރަޝާދު މާއިދާ މުހައްމަދު ރަޝާދު

ޖިންސީ ކުށުގެ ހަތް ދައުވާއެއް އުފުލާފައިވާ ކުރީގެ ޓޫރިޒަމް މިނިސްޓަރު އަލީ ވަހީދުގެ މައްސަލަ، އިންޓަޕޯލް ރެޑް ނޯޓިސް ނެރެގެން ވިޔަސް، ކުރިއަށް ގެންދަވާނެ ކަމަށް ޕްރޮސެކިއުޓާ ޖެނަރަލް ހުސެއިން ޝަމީމް ވިދާޅުވެއްޖެ އެވެ.

ވަޒީރުކަމުގައި ހުންނެވިއިރު، ޓޫރިޒަމް މިނިސްޓްރީގެ އަންހެން މުވައްޒަފުންތަކަކަށް ޖިންސީ ގޯނާކުރި ކަމުގެ ތުހުމަތުގައި މިދިޔަ އަހަރު މަގާމުން ވަކިކުރި އަލީ ވަހީދުގެ ޝަރީއަތް ހިނގަމުންދަނިކޮށް އޭނާ ވަނީ ރާއްޖެ ދޫކުރައްވައި ވަޑައިގެންފަ އެވެ.

ކޯޓު އަމުރެއްގެ ދަށުންް ހިފަހައްޓާފައި އޮތް އޭނާގެ ޕާސްޕޯޓް ދޫކޮށް، ފުރުން މަނާކުރުމުގެ އަމުރު ބާތިލުކުރީ ސިއްހީ ފަރުވާ އަށް ރާއްޖެ އިން ބޭރަށް ވަޑައިގަންނަވަން ޖެހުމުން އޭނާއާ ޖާމިނުވާނެ މީހަކު ވެސް ހުށަހަޅާފައިވާތީ އެވެ. އެއީ އަލީ ވަހީދުގެ ގާތް އެކުވެރިޔާ އަދި ޔޫތު އެންޑް ސްޕޯޓްސް މިނިސްޓްރީގެ ސްޓޭޓް މިނިސްޓަރު އަސްއަދު އަލީ (އަޑުބަރޭ) އެވެ.

އަލީ ވަހީދު، ރާއްޖެ އިން ބޭރަށް ވަޑައިގަޔުމުގެ ހުއްދަދީ، ޕާސްޕޯޓް ދޫކުރުމަށް ދަށު ކޯޓުން ކުރި އަމުރު ޕްރޮސެކިއުޓާ ޖެނަރަލްގެ ފަރާތުން ހައި ކޯޓުގައި އިސްތިއުނާފް ވެސް ކުރި އެވެ.

އެ މައްސަލައާ ގުޅޭ ގޮތުން ޕީއެސްއެމްގެ "ރާއްޖެ މިއަދު" ޕްރޮގްރާމުގައި ޕީޖީ ޝަމީމް ރޭ ވިދާޅުވީ އަލީ ވަހީދު މިހާރު އުޅުއްވާ ވަކި އެޑްރެހެއް ކޯޓުގައި ބުނެދެވިފައި ނުވާތީ ޗިޓް ރައްދުކުރާނެ ގޮތެއް ނެތުމުން، މައްސަލަ ހައި ކޯޓުގައި ހުއްޓިފައިވާ ކަމަށެވެ.

ބޭރަށް މީހުން ފުރައިގެން ދިއުމުން، އެ މީހުން އުޅޭ އެޑްރެސް ނޭނގޭ ހާލަތްތަކުގައި ފުރިހަމަ ކުރަންޖެހޭ އިޖުރާއަތްތައް ވެސް ހައިކޯޓުން ފުރިހަމަކޮށްފައި ނުވާ ކަމަށް ވިދާޅުވެ، އެކަމުގައި ޝަމީމް ވަނީ ކަންބޮޑުވުން ފާޅުކުރެއްވި އެވެ.

"އޭނާގެ އެޑްރެސް ނޭނގެންޏާ ފުލުހުންނަށް އަމުރެއް ނެރެގެން ބަންދުގަ ބަހައްޓައިގެން ހާޒިރުކުރުން. މިކަމާ ބެހޭ ގޮތުން އޮވޭ ހައި ކޯޓު ގަވާއިދުގައި ވެސް ޝަރީއަތް ކުރުމާ ބެހޭ ޖިނާއީ އިޖުރާއަތުގެ ގަވާއިދުގައި ވެސް އުސޫލުތަކެއް ކަނޑައަޅާފައި. އެ ޕްރޮސެސްތައް ހިންގަވައިފައި ނެތް ކަމަށް އަޅުގަނޑުމެންނަށް ފެނުނީ ހައި ކޯޓުން މައްސަލަ ނިންމެވިއިރުގައި--- ޕީޖީ ޝަމީމް

އޭނާ ވިދާޅުވިގޮތުގައި، އެ މައްސަލަ މިހާރު ސުޕްރީމް ކޯޓުގައި ވަނީ އިލްތިމާސް ކުރައްވައިފަ އެވެ. ނަމަވެސް އެ ކޯޓުން އެކަމުގައި ވަކި ގޮތެއް ނުނިންމާ ކަމަށް ޝަމީމް ވިދާޅުވި އެވެ.

އޭނާ ވިދާޅުވީ މީހެއްގެ އެޑްރެސް ނޭނގޭ ފަދަ ހާލަތެއްގައި ފުލުހުންނަށް އަމުރުކޮށް، ބަންދެއްގައި ބަހައްޓައިގެން ހާޒިރު ކުރެވޭނެ ކަމަށެވެ.

"އޭނާގެ އެޑްރެސް ނޭނގެންޏާ ފުލުހުންނަށް އަމުރެއް ނެރެގެން ބަންދުގަ ބަހައްޓައިގެން ހާޒިރުކުރުން. މިކަމާ ބެހޭ ގޮތުން އޮވޭ ހައި ކޯޓު ގަވާއިދުގައި ވެސް ޝަރީއަތް ކުރުމާ ބެހޭ ޖިނާއީ އިޖުރާއަތުގެ ގަވާއިދުގައި ވެސް އުސޫލުތަކެއް ކަނޑައަޅާފައި. އެ ޕްރޮސެސްތައް ހިންގަވައިފައި ނެތް ކަމަށް އަޅުގަނޑުމެންނަށް ފެނުނީ ހައި ކޯޓުން މައްސަލަ ނިންމެވިއިރުގައި،" އަމުރުގެ މައްސަލައިގައި ހައްލެއް ލިބޭނެ ކަމުގެ ޔަގީންކަން އޮތްކަން ފާހަގަކުރައްވައި، ޝަމީމް ވިދާޅުވި އެވެ.

އޭނާ ވިދާޅުވި ގޮތުގައި ޖިންސީ ކުށުގެ މައްސަލަތައް ކުރިއަށް ގެންދިއުމަށް ވެސް މަަސައްކަތް ކުރައްވާނެ އެވެ. އެގޮތުން އެ މައްސަލައިގައި ޗިޓް ހަވާލުކޮށް، ކޯޓަށް ހާޒިރުނުވެއްޖެ ނަމަ އަމުރެއް ނެރެގެން ވިޔަސް، ހާޒިރުކުރެވޭނެ ކަމަށް ވިދާޅުވި އެވެ.

"އަމުރު ނެރޭއިރުގައި ހަމައެކަނި ރާއްޖެއަކު ނޫން އަމުރު ނެރެވޭނީއެއް. އިންޓަޕޯލް ރެޑްނޯޓިސްއާ އެ ކަހަލަ ބައިވަރު އިންޓަނޭޝަނަލް ކަންކަން ވެސް އެބަހުރި އަޅުގަނޑުމެނަށް ކުރެވެން. އެހެންވީމާ އެ ހުރިހާ އެވެނިއުއެއް އަޅުގަނޑުމެން އެކްސްޕްލޯ ކުރާނަން މައްސަލަ ކުރިއަށްދާއިރު،" ޝަމީމް ވިދާޅުވި އެވެ.

އަލީ ވަހީދަށް ރާއްޖެ އިން ބޭރަށް ވަޑައިގަތުމަށް ފުރުސަތު ދިނުމުން އެކަމުގައި އެތައް ބަޔަކު ވަނީ ނުރުހުން ފާޅުކޮށްފަ އެވެ.

އަލީ ވަހީދުގެ ޖިންސީ ފުރައްސާރަ ކުރިމަތިވި ކަމަށް ބުނާ މުވައްޒަފުންގެ އަދަދު 13 އަށް ވުރެ ގިނަ އެވެ. އޭނާގެ މައްޗަށް އުފުލާފައިވަނީ ޖިންސީ އަނިޔާ ކުރުމުގެ ދައުވާއަކާއި ޖިންސީ ގޯނާ ކުރުމުގެ ދައުވާ އާއި ޖިންސީ ގޯނާކުރަން އުޅުމުގެ ދައުވާ އާއި ރޭޕް ކުރަން އުޅުމުގެ ކުށުގެ ދައުވާ އާއި ބޭ އަދަބީ ގޮތުގައި ޖިންސީ ގުނަވަން ހާމަކުރުމުގެ ދައުވާ އާއި ހުއްދަ ނޫން ޖިންސީ މުއާމަލާތެއް ހިންގަން އެދުމުގެ ދެ ދައުވާ އެވެ. ނަމަވެސް އެ ތުހުމަތުތަކަށް އޭނާ އިންކާރު ކުރައްވަ އެވެ. ޖާމިނުވާނެ ފަރާތެއް ހުށަހެޅުއްވުމުން އަލީ ވަހީދުގެ ޕާސްޕޯޓް ކްރިމިނަލް ކޯޓުން ދޫކޮށްލީ، ޕާސްޕޯޓްގެ ބަދަލުގައި ބޭހަށް ބޭރަށް ވަޑައިގަތުމަށް ވަގުތީ ލިއުމެއްގެ ދަށުން ފުރުއްވުމުގެ ހުއްދަ ދޭން ފެންނަ ކަމަށް ޕީޖީން ކޯޓުގައި އެދިފައި އޮއްވަ އެވެ. އޭނާ ބޭރަށް ވަޑައިގަންނަވާ ސަބަބެއް ކަމަށް އެދިވަޑައިގެންފައި އޮތީ ބަދައިގެ އޮޕަރޭޝަނަކަށެވެ.