ރަށްރަށުގައި އެކްޓިވް ކޭސް ގިނައީ ކަރަންޓީނަށް ފަރުވާކުޑަކުރާތީ: އެޗްއީއޯސީ

މީގެ ކުރިން ނުފެންނަ ވަރަށް ރަށްރަށުން މި ވަގުތު ކޮވިޑް-19ގެ އެކްޓިވް ކޭސްތައް ފެންނަ ކަމަށާއި އެ އަދަދު އިތުރުވެފައި ވަނީ ކަރަންޓީން އުސޫލާ ހިލާފުވާތީ ކަމަށް ހެލްތު އިމަޖަންސީ އޮޕަރޭޝަން ސެންޓަރު (އެޗްއީއޯސީ) އިން މިރޭ ބުނެފި އެވެ.

އެޗްއީއޯސީން ބޭއްވި މީޑިއާ ބްރީފިންގައި އެޓޮލް ޕްރިޕެއަޑްނެސް ޓީމުގެ ފަރާތުން އަބްދުﷲ މައުރޫފް ވިދާޅުވީ މި ވަގުތު މާލެ ސަރަހައްދުން ގިނަ ކޭސްތަކެއް ފެންނަމުންދާ އިރު، އަތޮޅުތެރޭގައި ވެސް ގިނަ ކޭސްތަކެއް ފެންނަ ކަމަށެވެ. އަދި ރަށްރަށުން ކޭސްތައް އިތުރުވެގެން ދިޔައީ މާލެއާ އެކުއެކީގައި ކަމަށް ފާހަގަކުރެވޭ ކަމަށެވެ.

"އޭގެ ނަތީޖާއަކަށް ވުން އެކަށީގެންވާ އެއް ސަބަބަކީ ފުރަބަންދަށް ދަތުރުކުރާ ފަރާތްތައް، ދަތުރުކުރުމުގައި ނުވަތަ ފުރަބަންދު ކަރަންޓީން މުއްދަތުގައި، އަޅުގަނޑުމެން އެޗްޕީއޭ އިން ހަދާފައިވާ އުސޫލްތަކާ އެއްގޮތަށް ނުވަތަ ގައިޑްލައިނާ އެއްގޮތަށް އަމަލުތައް ބެހެއްޓިފައި ނުވުން،" އޭނާ ވިދާޅުވި އެވެ.

މިވަގުތު ރަށްރަށުގައި ކޮވިޑަށް ފަރުވާ ހޯދާ 207 މީހުން ތިބި ކަމަށް މައުރޫފް ވިދާޅުވި އެވެ. އެކްޓިވް ކޭސްގެ ޖުމްލަ އަދަދަކީ 2،436 އެވެ.

މާލޭގެ އިތުރުން 10 ރަށަކުން ބޮޑެތި ކްލަސްޓާތައް ފާހަގަކުރެވިފައިވާ ކަމަށް މައުރޫފް ވިދާޅުވި އެވެ. އެއީ ހއ. ބާރަށާއި ހއ. ދިއްދު އާއި ހދ. ކުޅުދުއްފުއްޓާއި ނ. ޅޮއްސާއި ނ. ފިލަންދު އާއި ރ. އުނގޫފާރާއި އއ. ތޮއްޑު އާއި އދ. ފެންފުށީގެ އިތުރުން ދ. ކުޑަހުވަދޫ އަދި ދ. މީދޫ އެވެ.

އެންމެ ބޮޑު ކްލަސްޓާއެއް އޮތީ ބާރަށުގައި އެވެ. އެ ރަށުން މިހާތަނަށް 36 މީހަކު ކޮވިޑަށް ޕޮޒިޓިވްވެފައިވެ އެވެ. ކުޑަހުވަދޫގެ އެއާޕޯޓު މުވައްޒަފުންތަކެއް ޕޮޒިޓިވްވުމާ ގުޅިގެން ކޮންޓެކްޓް ޓްރޭސިން މަސައްކަތް ކުރުމަށްޓަކައި، އެ ރަށުން ދަތުރުކުރި ފަރާތްތައް އެޗްޕީއޭ އަށް އަންގަން އެ އިދާރާ އިން ވަނީ މިދިޔަ ބުދަ ދުވަހު އެދިފަ އެވެ. ކުޑަހުވަދޫން ދަތުރުކުރި މީހަކު އެ އަތޮޅު މީދޫން ކޮވިޑަށް ޕޮޒިޓިވްވި ކަމަށާއި އޭނާގެ 60 ކޮންޓެކްޓުން ތިބި ކަމަށް ފާހަގަކުރެވުނު ކަމަށް ވެސް މައުރޫފް ވިދާޅުވި އެވެ.

"މިއީ ވަރަށް ހިތާމަވެރި ކަމެއް، އެންމެ ފަރުދެއް އިހުމާލު ވުމުން މުޅި ރަށް އެބަދޭ ބިރުވެރިކަމެއްގެ ތެރެއަށް،" މައުރޫފް ވިދާޅުވި އެވެ.