"އަމީރު" ކަމަށް އައްޔަންކޮށް އައިސިސް އިން ލިޔުން ދީފައިވާ މީހަކު ތިމަރަފުށިން ހައްޔަރުކުރި

ޓެރަރިޒަމްގެ އަމަލުތަކެއް ހިންގަން އުޅުމުގެ ތުހުމަތަށް މިދިޔަ އަހަރު ތ. ތިމަރަފުށިން ހައްޔަރުކުރި މީހުންގެ ތެރޭގައި ހިމެނޭ އަބްދުﷲ ޝަރީފަކީ ޓެރަރިސްޓް އައިސިސް ޖަމާއަތުން އަމީރުކަމުގެ މަގާމަށް އައްޔަންކޮށް އެކަމުގެ ލިޔުން ވެސް ދީފައިވާ މީހެއް ކަމަށް ފުލުހުން ބުނެފި އެވެ.

ރާއްޖޭގައި ހަރުކަށި ފިކުރު ފަތުރައި އެކި ތަންތަނުގައި ހަމަލާ ދޭން ރާވަމުން ދަނިކޮށް ފުލުހުން ވަނީ އަށް މީހަކު ހައްޔަރުކޮށްފަ އެވެ. އެ މީހުންގެ މައްޗަށް ދައުވާކުރަން ފޮނުވައި އެ މީހުންނާ ބެހޭ ގޮތުން ފުލުހުން މިއަދު ނެރުނު ބަޔާނުގައި ބުނީ ތިމަރަފުށީ ފެހިވިދުވަރުގޭ އަބްދުﷲ ޝަރީފް، 34، އަކީ އައިސިސް އިން ކަނޑައެޅި އަމީރު (މުސްލިމުންގެ ވެރިޔާ) ކަމަށް ބުނާ ލިޔުން ފެނުނީ ހައްޔަރުކުރި މީހެއްގެ ފޯނުން ކަމަށެވެ.

ފުލުހުން ބުނި ގޮތުގައި އަބްދުﷲ ޝަރީފަކީ އައިސިސްގެ ޚޮރާސަން ޕްރޮވިންސްގެ ފަރާތުން ކަނޑައެޅި އަމީރެކެވެ. ތިމަރަފުށީގައި ހަރަކާތްތެރިވަމުން ދިޔައީ ޚޮރާސަން އިން މި ސަރަހައްދަށް ކަނޑައަޅާފައިވާ ގޮފީގެ މީހުން ކަމަށް އެނގިފައިވެ އެވެ.

އަމީރު ކަމަށް އައްޔަންކޮށްފައިވާ މީހާ އަށް، އޭނާގެ ފިކުރަށް ތަބާވާ މީހުން ވަރަށް ބޮޑަށް އިހުތިރާމުކޮށް ކިޔަަމަންވާ ކަމަށްވެ އެވެ.

އަމީރުގެ ގޮތުގައި އެންމެ އިސްކޮށް އުޅުނު މީހާގެ އިތުރުން ދެން ހައްޔަރުކޮށްފައިވަނީ އަހްސަން މުހައްމަދު، ތ. ތިމަރަފުށި/ކެނެރީގެ، އަލީ މުނީޒު، ތ.ތިމަރަފުށި/ކެނެރީގެ، މުހައްމަދު އާސިރު، ތ. ތިމަރަފުށި/އަސުރުމާގެ، އަލީ އަރުހަމް މުހައްމަދު، ރ. ކަނދޮޅުދޫ/ފެހިވިލާ، ޝަމާހް ޝަރީފް، ތ. ތިމަރަފުށި/ސައިމާ، އިބްރާހިމް ލޫތު، ނ.ކުޑަފަރި/ރޯޒްމީޑް އަދި އަބްދުﷲ އިމާދު، ރ. މަޑުއްވަރި/ބީޗް ހައުސް އެވެ.

ފުލުހުން ބުނި ގޮތުގައި މި މީހުންގެ އަތުން ވަނީ އައިސިސްއާ ގުޅުން ހުރި އެކި ތަކެއްޗާއި ގޮވާތަކެތި ހަދާނެ ގޮތުގެ މެނުއަލްތަކާއި އެފަދަ އެއްޗެހި ހަދަން ބޭނުންކުރެވޭނެ އާލާތްތައް ވެސް ފެނިފަ އެވެ. މި މީހުން އުޅުނު ދޯނިންނާއި ދޯނިން އުކާލާފައި ވަނިކޮށް ކަނޑު އަޑިން ވެސް ވަނީ މިފަދަ ބައެއް ތަކެތި ފެނިފައި ކަމަށް ފުލުހުން ބުންޏެވެ.