ޓެރަރިސްޓް ހަމަލައެއް ރޭވުމުގެ ތުހުމަތަށް އިތުރު ދެ މީހަކު ހައްޔަރުކޮށްފި

ޓެރަރިސްޓް ހަމަލާއެއްދޭން ރޭވި ކަމަށް ތުހުމަތު ކުރެވިގެން މިމަހުގެ ކުރީކޮޅު ހައްޔަރުކުރި މީހުންނާ ގުޅުން ހުރި އިތުރު ދެ މީހަކު ތ. ތިމަރަފުށިން މިއަދު ހައްޔަރުކޮށްފި އެވެ.

އެނގިފައިވާ ގޮތުގައި ތިމަރަފުށިން ހައްޔަރުކުރީ އެ ރަށު އެއާޕޯޓުގައި މަސައްކަތްކުރާ އެހެން ރަށެއްގެ މީހަކާއި ތިމަރަފުށީ ސްކޫލްގެ ޓީޗަރެކެެވެ.

އެނގިފައިވާ ގޮތުގައި އެ ދެ މީހުން ހައްޔަރުކުރުމުގެ ކުރިން އެމީހުންގެ ފޯނު ފުލުހުން އިއްޔެ އަތުލި އެވެ.

ހަރުކަށި ފިކުރުގެ ބަޔަކު ދޭން ރާވަމުން ދިޔަ ހަމަލާއެއް ހުއްޓުވާފައިވާ ކަމަށް މިމަހު ކުރީ ކޮޅު ފުލުހުން ވަނީ ބުނެފަ އެވެ. ހަމަލާއެއް ދޭން އުޅުނުކަން އެނގުނީ ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން ކަމަށް ފުލުހުން އޭރު ބުންޏެވެ.

މި ތުހުމަތާ އެކު ބަޔަކު ހައްޔަރުކުރީ މާލެ އާއި ތިމަރަފުއްޓާއި ކަނޑުމަތީގައި ހިންގި ހާއްސަ އޮޕަރޭޝަނެއްގަ އެވެ.

އެ މައްސަލައިގައި ކުރިން ހައްޔަރުކޮށްފައި ވަނީ 20 އަހަރުގެ މީހަކާއި 21 އަހަރުގެ މީހަކާއި 29 އަހަރުގެ މީހެއްގެ އިތުރުން 18 އަހަރުގެ މީހަކާއި 31 އަހަރުގެ މީހެއް އަދި 34 އަހަރުގެ މީހެއް ކަމަށް ފުލުހުން ބުނެފައިވެ އެވެ.

މި މީހުންނަށް ތުހުމަތުކުރާ މައްސަލައިގައި މާބޮޑު ތަފްސީލެއް ފުލުހުން އަދި ހާމައެއް ނުކުރެ އެވެ.