މާދަމާ މިއަށް ވުރެ ބޮޑަށް ވިއްސާރަކުރުން ކައިރި: މެޓް

މާލެ އާއި ރާއްޖޭގެ އެހެން ބައެއް ސަރަހައްދުތަކަށް ރެއިން ފެށިގެން ކުރަމުން އަންނަ ވިއްސާރަ، ކުރިއަށް އޮތް 24 ގަޑިއިރު އިތުރަށް ގޯސްވުމުގެ ފުރުސަތު އޮތް ކަމަށް، މެޓުން ލަފާކޮށްފި އެވެ.

އުތުރާއި މެދު ރާއްޖެތެރެއަށް ބޮޑަށް ކުރަމުން ދާ ވިއްސާރައިގައި، މާލޭގެ އިތުރުން ބައެއް އެހެން ރަށްރަށުގައި ވެސް ފެން ބޮޑުވެ، ސިފައިން އަންނަނީ އެހީތެރިކަން ފޯރުކޮށްދެމުންނެވެ. އެގޮތުން މާލޭގައި އެސްޓީއޯގެ ކާޑު ގުދަންތައް ހުރި ސަރަހައްދުގެ މަގުތަކުގައި ބޮޑުވެފައި އޮތް ފެންގަނޑު، ޕަމްޕް ބޭނުންކޮށްގެން ހިންދުމުގެ މަސައްކަތް ސިފައިން ކުރިއަށް އެބަ ގެންދެ އެވެ.

މެޓް އޮފީހުގެ އެސިސްޓަންޓް މީޓިއޮރޮލޮޖިސްޓް އަބްދުﷲ ހާފިޒް "މިހާރު" އަށް ވިދާޅުވީ އުތުރާއި މެދު ރާއްޖެތެރެއަށް ކުރިއަށް އޮތް 24 ގަޑިއިރު ގުގުރުމާ އެކު ބޯކޮށް ވާރޭ ވެހޭނެ ކަމަށެވެ.

"މާދަމާ އުތުރަށް މިއަށް ވުރެ ވެސް ބޮޑަށް ވިއްސާރަކުރާނެ ކަމަށް ލަފާކުރެވޭ،" ހާފިޒް ވިދާޅުވި އެވެ.

އޭނާ ވިދާޅުވި ގޮތުގައި މިއީ ރާއްޖޭގެ އިރުމަތީ ސަރަހައްދުގައި އުފެދިފައިވާ ސާކިއުލޭޝަނެއްގެ ސަބަބުން ކުރަމުން ދާ ވިއްސާރައެކެވެ.

ކުރިއަށް އޮތް 24 ގަޑިއިރު ދެކުނާއި މެދުތެރޭ އަތޮޅުތަކަށް ވައި ގަދަވެ، ކަނޑު ވެސް ގަދަވާނެ ކަމަށް ލަފާކުރެ އެވެ. އެ ސަރަހައްދަށް ގަޑިއަކު 10-20 މޭލުގެ ބާރު މިނެއްގައި ވައި ޖެހޭނެ ކަމަށް ބެލެވޭތީ، މެޓުން އެދެމުން އަންނަނީ ކަނޑު ދަތުރުކުރާ ފަރާތްތަކުން އެކަމަށް ސަމާލުވުމަށެވެ.

މެޓުން ބުނާ ގޮތުގައި ވިލާގަނޑުގައި 40 މޭލަށް ވައި ބާރުވުމުގެ ފުރުސަތު އެބަ އޮތެވެ.

"އުތުރުގެ އަތޮޅުތަކަށް ޖުމްލަކޮށް ވައި މަޑުވާނެ. ނަމަވެސް ވިލާގަނޑާ އެކު ވައި ގަދަވާނެ،" ހާފިޒް ވިދާޅުވި އެވެ.

ރާއްޖެ މިހާރު ގިނަމުން މި އަންނަނީ އިރުވައި މޫސުމުގެ ދުވަސްތަކެވެ. އެގޮތުން މިއީ އިރުވައި މޫސުގެ ތިން ވަނަ ނަކަތް ކަމަށްވާ އުތުރު ހަޅަ އެވެ. އާންމު ގޮތެއްގައި މި ނަކަތުގައި ވަޔާއި ކަނޑު ގަދަވިޔަސް އުޑުމަތި ސާފުވާނެ އެވެ.