ހާހަކަށް ވުރެ ގިނަ ޓޫރިސްޓުންނާ އެކު މިއަދަކީ ރަޝިޔާ ސަރަހައްދުގެ ރެކޯޑެއް

ރަޝިޔާ އާއި ޔުކްރެއިނުން މިއަދު ތިން ފްލައިޓެއްގައި ހާހަކަށް ވުރެ ގިނަ ޓޫރިސްޓުން އަންނާނެ ކަމަށް އެ ޓޫރިސްޓުން ގެންނަ ލޯކަލް އެޖެންޓް ބުނެފި އެވެ. މިިއީ ކޮވިޑަށް ފަހު އެއް ސަރަހައްދަކުން އެންމެ ގިނަ ޓޫރިސްޓުން އަންނަ ދުވަހެވެ. އަދި މިއީ ރާއްޖޭގެ ޓޫރިޒަމް ހަޔާތުގައި ވެސް އެ ސަރަހައްދުން އެއްފަހަރާ އެންމެ ގިނައިން ޓޫރިސްޓުން އަންނަ ދުވަސް ވެސް މެ އެވެ.

ލޯކަލް އެޖެންޓް، ރިސޯޓް ލައިފްގެ ވެރިޔާ މުހައްމަދު ޝާޒް ވަލީދު ވިދާޅުވީ، މިއަދު ރަޝިޔާގެ އެއް ފްލައިޓާއި ޔޫކްރެއިންގެ ދެ ފްލައިޓެއް އަންނާނެ ކަމަށެވެ. މިތިން ފްލައިޓުން ޖުމްލަ 1160 ޓޫރިސްޓުން އަންނާނެ އެވެ.

މީގެ އިތުރުން މިއަދަކީ ވެލާނާ އެއާޕޯޓަށް ވަރަށް ބާރު ބޮޑު ދުވަހެކެވެ. ސަބަބަކީ ކްރިސްމަސް ޗުއްޓީ އާއި އާ އަހަރަށް އާންމު ގޮތެއްގައި ވެސް ރާއްޖޭގެ ރިސޯޓުތަކާއި ގެސްޓްހައުސްތައް ފުރޭތީ އެވެ. މިއަހަރު ވެސް މިދުވަސްވަރު އޮތީ ރިސޯޓުތަކާއި ގެސްޓްހައުސްތައް އޯވާ ބުކްވެފަ އެވެ.

ވަލީދު ވިދާޅުވީ، ކޮވިޑަށް ފަހު ރަޝިޔާ ސަރަހައްދަކީ އެންމެ ބޮޑަށް ރާއްޖޭގެ މަގްބޫލް ކަން އިތުރުވެފައިވާ ސަރަހައްދު ކަމަށެވެ. އެގޮތުން ޔޫކްރެއިން އާއި ކަޒަގިސްތާނު ފަދަ ގައުމުތަކުން އަންނަ ޓޫރިސްޓުން ވަނީ ވަރަށް ބޮޑަށް އިތުރުވެފަ އެވެ.

"މިއަދު ތިން ފްލައިޓު އަންނަ އިރު އަންނަ ޖެނުއަރީ މަސް ނިމެންދެން ކޮންމެ ހަފްތާއަކު ޔޫކްރެއިންގެ ތިން ފްލަިއޓް ވެސް ރާއްޖެ އަންނާނެ،" އޭނާ ވިދާޅުވި އެވެ.

މިއަހަރު ވަކިވަކި ގައުމުތަކުގެ ތެރެއިން އެންމެ ގިނަ ޓޫރިސްޓުން އައިސްފައިވަނީ ވެސް ރަޝިޔާއިންނެވެ. އެ ގައުމުން 46،000 ޓޫރިސްޓުން އައިސްފައިވެ އެވެ.

މި މަހުގެ ބާކީ ފަސް ދުވަސް އޮތް އިރު މި މަހުގެ ތެރޭގައި މިހާރު ވެސް 69،000 ޓޫރިސްޓުން ވަނީ ރާއްޖެ އައިސްފަ އެވެ. މިއީ ކޮވިޑަށް ފަހު ޓޫރިސްޓުން އެންމެ ގިނައިން އައި މަހެވެ. މިދިޔަ މަހު ރާއްޖެ އަށް އައީ 35،000 ޓޫރިސްޓުންނެވެ.

ރާއްޖޭގެ ބޯޑަރު ޖުލައި މަހު ހުޅުވައިލި ފަހުން ޓޫރިޒަމް ދާއިރާ އަނެއްކާ ވެސް ހިނގައިގަންނަން ފަށައިފައިވާ އިރު މިގޮތުގައި ހިފަހައްޓާލެވިއްޖެ ނަމަ އަންނަ އަހަރީ ޓޫރިޒަމް ދާއިރާ އަށް ކާމިޔާބު އަހަރަކަށް ހެދޭނެ ކަމަށް ދާއިރާގައި މަސައްކަތް ކުރާ ފަރާތްތަކުން ބުނެ އެވެ. މި އަހަރު ސަރުކާރުގެ އަމާޒަކީ 540،000 ޓޫރިސްޓުން ގެނައުމެވެ. އޭގެ ތެރެއިން މިހާރު 97 ޕަސެންޓް މިވަނީ ހާސިލުވެފަ އެވެ. މި އަމާޒަށް ދިޔުމަށް ބާކި މިއޮތް ފަސް ދުވަހު ރާއްޖެއަށް އަންނަން ޖެހޭނީ 12،000 ޓޫރިސްޓުންނެވެ.