ވަގުތު ބޭކާރު ކުރެވެން ނެތް ކަމަށް ވިދާޅުވެ ބައިޑަންގެ ތިމާވެށި ޓީމު އިއުލާންކޮށްފި

ވޮޝިންޓަން (ޑިސެމްބަރު 20) - ތިމާވެއްޓާ ދެކޮޅަށް މަސައްކަތް ކުރުމުގައި "ވަގުތު ބޭކާރު ކުރެވެން ނެތް" ކަމަށް ވިދާޅުވެ އެމެރިކާގެ ރައީސް ކަމަށް އިންތިޚާބުކޮށްފައިވާ ޖޯ ބައިޑަންގެ އުއްމީދީ ތިމާވެށި ޓީމު އިއުލާންކޮށްފި އެވެ.

ބައިޑަން ވަނީ އެމަނިކުފާނުގެ ރިޔާސީ ދައުރުގެ އެޖެންޑާގައި އެންމެ އިސްކަން ދޭ ކަންތައްތަކުގެ ތެރޭގައި ތިމާވެށީގެ މައްސަލަތައް ހިމަނާނެ ކަމަށް ވިދާޅުވެފަ އެވެ. ނަތީޖާއަކަށް ވެގެންދާނީ ރައީސް ޑޮނަލްޑް ޓްރަމްޕުގެ ސަރުކާރުގެ ވަރަށް ގިނަ ސިޔާސަތުތަކަށް ބަދަލު ގެނައުމެވެ.

"ތިމާވެށީގެ މައްސަލަތަކުގައި ވަގުތު ބޭކާރު ކުރެވޭކަށް ނެތް،" ބައިޑަން ވިދާޅުވި އެވެ.

ބައިޑަންގެ ސަރުކާރުގައި އެންވަޔަރަމެންޓަލް ޕްރޮޓެކްޝަން އެޖެންސީ (އީޕީއޭ) އެންމެ އިސް ވެރިކަށް ހަމަޖައްސާނީ ކަޅު ނަސްލަށް ނިސްބަތްވާ މައިކަލް ރެގަން އެވެ. ކައުންސިލް އޮފް އެންވަޔަރަމެންޓަލް ކޮލިޓީ ހިންގަވާނީ ބަރަކް އޮބާމާ ސަރުކާރުގައި ވެސް މަސައްކަތް ކުރައްވާފައިވާ ތިމާވެއްޓާ ބެހޭ ގާނޫނީ ވަކީލެއް ކަމަށްވާ ބްރެންޑާ މެލޮރީ އެވެ. އެނާޖީ ސެކްރެޓަރީގެ މަގާމަށް ހަމަޖައްސާފައި ވަނީ މިޝިގަންގެ ކުރީގެ ގަވަރުނަރު ޖެނިފާ ގްރެންހޮމް އެވެ. އެމެރިކާގެ އާ ސަރުކާރުގެ ތިމާވެއްޓާ ބެހޭ މަންދޫބެއްގެ ގޮތުގައި ބައިޑަން މިދިޔަ މަހު ވަނީ ކުރީގެ ފޮރިން ސެކްރެޓަރީ ޖޯން ކެރީ ހަމަޖައްސަވައިފަ އެވެ.

ބައިޑަން ވިދާޅުވީ ތިމާވެށީގެ ކަންކަމަށް އެމަނިކުފާން ހަމަޖައްސާފައި ވަނީ "ތޫނު ފިލި" ޓީމެއް ކަމަށެވެ.

"ކޮވިޑް-19 އިން ސަލާމަތްވުމަށް ގުޅިގެން މަސައްކަތް ކުރަން ޖެހޭ ގޮތަށް ތިމާވެށީގެ މައްސަލަތަކާ ދެކޮޅަށް ވެސް ގުޅިގެން މަސައްކަތް ކުރަން ޖެހޭ،" ބައިޑަން ވިދާޅުވި އެވެ.

ބައިޑަން ވަނީ ޓްރަމްޕް ސަރުކާރުގެ ތިމާވެށި ސިޔާސަތުތަކަށް ބަދަލު ގެންނާނެ ކަމަށް ވިދާޅުވެފަ އެވެ. އޭގެ ތެރޭގައި ޓްރަމްޕުގެ ވެރިކަމުގައި އެމެރިކާ ވަކިވި ޕެރިސް ތިމާވެށި އެއްބަސްވުމުގައި އަލުން ބައިވެރިވާނެ ކަމަށް ވިދާޅުވި އެވެ.