ފެނުން ހަކަތަ އުފައްދާ މަތިންދާބޯޓު މަޝްރޫއަށް އެހީ ލިބެނީ

ހައިޑްރޮޖެން-އިލެކްޓްރިކް ޓެކްނޮލޮޖީ ނުވަތަ ފެނުން އުފައްދާ ހަކަތައިން އުދުހޭ މަތިންދާބޯޓް ހަގީގަތަކަށް ހަދަން މަސައްކަތްކުރާ އިނގިރޭސިވިލާތުގެ "ޒީރޯއޭވިއާ" އަށް ބޮޑެތި ކުންފުނިތަކާއި މަހުޖަނުންގެ ފަރާތުން ވެސް ފައިސާގެ އެހީ ލިބެން ފަަށައިފި އެވެ.

އެ ކުންފުނިން ބުދަ ދުވަހު އާންމުކުރި ބަޔާނެއްގައި ބުނީ އެ މީހުންގެ މަސައްކަތްތަކަށް އެމެޒޯން އާއި އިނގިރޭސި ތެޔޮ ކުންފުނި ޝެލް އާއި ބްރިޓިޝް އެއާވޭޒްގެ އިތުރުން ބިލް ގޭޓްސްގެ ބްރޭކްތުރޫ އެނަޖީ ވެންޗާޒް އިން ފަންޑުގެ ގޮތުގައި 21.4 މިލިއަން ޑޮލަރު ލިބިފައިވާ ކަމަށެވެ. އެ ކުންފުނިތަކުން ލިބުނު އެހީތަކަށް "ޒީރޯއޭވިއާ" އިން ވަނީ ވަކިވަކިން ޓްވީޓްކޮށް ޝުކުރު އަދާކޮށްފަ އެވެ.

ފެނުން އުފައްދާ ހަކަތައިން އުދުހޭ މަތިންދާބޯޓް މަޝްރޫއަށް އިނގިރޭސި ސަރުކާރުން ވެސް 16.3 މިލިއަން ޑޮލަރުގެ ބަޖެޓެއް ހަމަޖައްސާފައިވެ އެވެ، "ޒީރޯއޭވިއާ" އިން ބުނި ގޮތުގައި މިހާތަނަށް ވަނީ ޕްރޮޖެކްޓަށް ވަރަށް ކުރު މުއްދަތެއްގެ ތެރޭގައި 37.7 މިލިއަން ޑޮލަރުގެ ފަންޑް ލިބިފަ އެވެ.

މިކަމާ ބެހޭ ގޮތުން އެ ކުންފުނީގެ ސީއީއޯ ވަލް މިފްތަކޯވް ވިދާޅުވީ ވައިގެ ދަތުރުފަތުރުގެ ދާއިރާ އަށް އިންގިލާބީ ބޮޑު ބަދަލެއް ގެންނަން ކުރާ މަސައްކަތަކަށް ފަންޑް ލިބެމުން ދިއުމަކީ ކާމިޔާބީއެއް ކަމަށެވެ.

"މި ކާމިޔާބީގެ އަސްލު ނަތީޖާއަކަށް ވާނީ ވައިގެ ދަތުރުތަކުން އަހަރެމެން މިހާރު ދުނިޔޭގެ ޖައްވަށް ދޫކުރާ ވިހަ ގޭސްތައް މަދުވުން. ނުވަތަ ކޮންޓްރޯލްވުން،" އޭނާ ވިދާޅުވި އެވެ. "މީގެ ހަގީގީ ޓާގެޓަކީ ވައިގެ ދަތުރުފަތުރުގެ ދާއިރާ އަކީ މުސްތަގުބަލުގައި މުޅިން އެއްކޮށް ސާފު ހަކަތަ ބޭނުންކުރާ ދާއިރާއަކަށް ހެދުން."

"ޒީރޯއޭވިއާ" އިން ބުނި ގޮތުގައި ޒީރޯ-އެމިޝަން ކޮމާޝަލް ވައިގެ ދަތުރުތަކަށް ކުރިމަގުގައި އޮތް އެންމެ ރަނގަޅު ހައްލަކީ ފެނުގެ ހަކަތައިން ބޯޓުތައް އުދުއްސުއްކަން މިހާރު އޭވިއޭޝަން ދާއިރާ އާއި ފައިނޭންޝަލް މާކެޓް ވެސް ގަބޫލުކުރާ ކަމަށެވެ.

"އެހެންވީމަ މިކަމަށް ލޯ ހުޅުވުމަކީ އަމާޒަށް ވާސިލުވާން ލިބޭ ހިތްވަރެއް." މިފްތަކޯވް ވިދާޅުވި އެވެ.

މިދިޔަ ސެޕްޓެމްބަރު މަހުގެ ތެރޭގައި "ޒީރޯއޭވިއާ" އިން ވަނީ ދުނިޔޭގެ ފުރަތަމަ ހައިޑްރޮޖެން-އިލެކްޓްރިކް ކޮމާޝަލް ދަތުރެއް ތަޖުރިބާ ވެސް ކޮށްފަ އެވެ. ހަ މީހުންގެ ޖާގައިގެ އެ ފްލައިޓްގެ ޓެސްޓްތައް ކުރިއަށް ގެންދިޔައީ އިނގިރޭސިވިލާތުގެ ކްރޭންފީލްޑްގައި ހުންނަ "ޒީރޯއޭވިއާ" ގެ ރިސާޗް އެންޑް ޑިވެލޮޕްމަންޓް ފެސިލިޓީގަ އެވެ.

އަމާޒަކީ މިފަދަ ފްލައިޓްތަކުގެ ދަތުރުތައް 2023 ހިސާބުގައި ތައާރަފުކުރުމެވެ.

"ޒީރޯއޭވިއާ" އިން ބުނި ގޮތުގައި މިކަމަށް ޝައުގުވެރިވެގެން މިހާރު ވެސް 10 އެއާލައިނަކުން އޮތީ ފެނުގެ ހަކަތައިން އުދުހޭ މަތިންދާބޯޓްތަކުގައި ދަތުރުތައް ކުރަން ހުށަހަޅައިފަ އެވެ.