އިންޑިއާ އިން މުދާ ގެންނަން ކާގޯ ފެރީން ދެކުނަށް ކޮންމެ 20 ދުވަހަކުން ދަތުރެއް

އިންޑިއާ އިން ކަނޑުމަގުން މުދާ ގެންނަން މޯލްޑިވްސް ސްޓޭޓް ޝިޕިން (އެމްއެސްއެސް) އިން ފަށާފައިވާ މަސައްކަތުގެ ދަށުން ކޮންމެ 20 ދުވަހަކުން ޓުޓިކޮރިން އިން ރާއްޖޭގެ އެންމެ ދެކުނަށް ދަތުރުތައް ބާއްވާ ގޮތަށް ހަމަޖައްސައިފި އެވެ.

އައްޑު އާއި ހުވަދު އަތޮޅު ހިމެނޭ ގޮތަށް މުދާ ގެންނަން ފެށި މަސައްކަތުގެ ތެރެއިން މިއަދު ހަވީރު "އެމްވީ ބޮންތި 2" ހިތަދޫ ސަރަހައްދީ ބަނދަރަށް ވަނުމާ އެކު، ސިފައިން ވަނީ ވޯޓަރ ސެލިއުޓެއް އަރުވައިފަ އެވެ. އެ ބޯޓު ރާއްޖެ އަންނަން އިންޑިއާ އިން ފުރީ މިދިޔަ ހޯމަ ދުވަހު އެވެ.

ފުރަތަމަ ކާގޯ ފެރީ އަށް މަރުހަބާ ކިޔަން ބޭއްވި ރަސްމިއްޔާތުގައި އެމްއެމްއެސްގެ މެނެޖިން ޑިރެކްޓަރު އަބްދުﷲ ސައީދާއި އެސްޓީއޯގެ މެނެޖިން ޑިރެކްޓަރު ހުސައިން އަމްރު އާއި އެމްޕީއެލްގެ މެނެޖިން ޑިރެކްޓަރު ޝާހިދު އަލީ އަދި އައްޑޫ މޭޔަރު އަބްދުﷲ ސޯދިގް (ސޯބެ) ވެސް ބައިވެރިވަޑައިގަތެވެ.

އެމްއެސްއެސް އިން ބުނީ ޓުޓިކޮރިން ދެކުނަށް މުދާ ހިފައިގެން އައި ފުރަތަމަ ދަތުރުގައި ފުރަތަމަ ކާގޯ ފެރީގައި، 2713.34 މެޓްރިކް ޓަނުގެ މުދާ ގެނެސްފައިވާ ކަމަށެވެ. އޭގެ ތެރޭގައި މޭވާ އާއި ތަރުކާރީގެ ބާވަތްތަކާއި އިމާރާތްކުރަން ބޭނުންކުރާ ސާމާނު ހިމެނެ އެވެ.

ސައީދު ވިދާޅުވި ގޮތުގައި ސީދާ އިންޑިއާ އިން ރާއްޖޭގެ އެންމެ ދެކުނަށް މުދާ ގެންދެވޭ ގޮތް ވުމަކީ ވިޔަފާވެރިންނަށް ލިބޭނެ ވަރަށް ބޮޑު ފަސޭހައެއްގެ އިތުރުން ކަސްޓަމަރުންނަށް ވެސް ކުރިއަށް އޮތް ތަނުގައި މިހާރަށް ވުރެ ހެޔޮ އަގުގައި މުދާ ލިބެން މަގުފަހިވާނެ ކަމެކެވެ. އެހެންވެ، ދެމެހެއްޓެނިވި ގޮތަކަށް ދަތުރުތައް ކުރާ ގޮތަށް ހަމަޖެހިފައިވާ ކަމަށް ވިދާޅުވި އެވެ.

އޭނާ ވިދާޅުވީ، މި ފެށުނު މަސައްކަތުގެ ތެރެއިން ދެކުނުގެ އިގުދިސާދަށް ވެސް ހެޔޮ ބަދަލުތަކެއް އަންނާނެ ކަމަށެވެ.

ޓުޓިކޮރިން އާއި ރާއްޖޭގެ އެންމެ ދެކުނު ކާގޯ ފެރީން ގުޅާލި އިރު އެމްއެސްއެސް އިން ކުރިން ވަނީ ކޮޗިން އާއި ހދ. ކުޅުދުއްފުއްޓާ ދެމެދު ވެސް ކާގޯ ފެރީގެ ހިދުމަތް ފަށައިފަ އެވެ. އެއީ މިދިޔަ ސެޕްޓެމްބަރު މަހުގެ ތެރޭގަ އެވެ.

އިންޑިއާ އިން ރާއްޖެ އަށް ކާގޯ ފެރީގައި މުދާ ގެންނަން ފެށުން ވާނީ ރާއްޖޭގައި ގާއިމުކޮށްފައިވާ ސަރަހައްދީ ބަނދަރުތަކުގެ ބޭނުން ވެސް ކުރިއަށް އޮތް ތަނުގައި އެކަށީގެންވާ ގޮތެއްގައި ހިފޭނެ ކަމަކަށެވެ. ސަރަހައްދީ ބަނަދުރު ގާއިމުކޮށްފައި ވަނީ އައްޑޫގެ އިތުރުން ކުޅުދުއްފުށީގަ އެވެ.