އިދާރާތަކުގެ އޮފިޝަލުންނަށް އިންޑިއާއިން ހިންގާ ތަމްރީނު ޕްރޮގްރާމްތަކެއް ފަށައިފި

ރާއްޖޭގެ އެކި އިދާރާތަކުގެ މުވައްޒަފުންނަށް އަމާޒުކޮށް އިންޑިއާއިން އޮންލައިން ކެޕޭސިޓީ ބިލްޑިން ޕްރޮގްރާމެއް ފަށައިފި އެވެ.

މި ޕްރޮގްރާމްގެ ދަށުން އިންޑިއާގެ އެކި އިންސްޓިޓިއުޓުތަކުން އަންނަނީ ކަސްޓަމްސް، އިލެކްޝަންސް ކޮމިޝަން، ސިއްހީ ހިދުމަތްތެރިން އަދި ޓީޗަރުން ތަމްރީނުކުރަމުންނެވެ. ސިވިލް ސާވިސްގެ މުވައްޒަފުން ތަމްރީނު ކުރުމުގެ ޕްރޮގްރާމެއް އަންނަ ފެބްރުއަރީ މަހު ފަށާނެ އެވެ.

އިންޑިއާގެ ނޭޝަނަލް އެކަޑެމީ އޮފް ކަސްޓަމްސް އިން ރާއްޖޭގެ ކަސްޓަމްސްގެ 24 އޮފިޝަލުންނަށް ވަނީ އިންޓްލިޖެންސް، އިންވެސްޓިގޭޝަން އެންޑް އިންފޯމޭޝަން ގެދަރިން، އެނަލިސިސް އެންޑް އެންފޯސްމެންޓާ ބެހޭ ސްޕެޝަލައިޒްޑް އޮންލައިން ޓްރެއިނިން ކޯހެއް އަންނަ ހުކުރު ދުވަހާ ހަމައަށް ފަށައިފަ އެވެ.

އެއް ހަފްތާގެ މުއްދަތަށް ގެންދާ މި ޕްރޮގްރާމަކީ އިންޑިއާގެ ބޮޑު ވަޒީރު ނަރެންދްރަ މޯދީ މިދިޔަ އަހަރުގެ ޖޫން މަހު ރާއްޖެ ވަޑައިގެންނެވި ރަސްމީ ދަތުރުފުޅުގައި ސޮއިކުރެވުނު އެއްބަސްވުމުގެ ދަށުން ހިންގާ ޕްރޮގްރާމެކެވެ. މިހާތަނަށް ކަސްޓަމްސްގެ 40 އޮފިސަރުން ވަނީ އެކި ދާއިރާތަކުން އިންޑިއާގައި ތަމްރީނު ކޮށްފަ އެވެ.

އިލެކްޝަންސް ކޮމިޝަން މުވައްޒަފުންނަށް ތަމްރީނު ދެމުން އަންނަނީ އިންޑިއާ އިންސްޓިޓިއުޓް އޮފް ޑިމޮކްރެސީ އެންޑް އިލެކްޝަން މެނޭޖްމެންޓާއި އިލެކްޝަން ކޮމިޝަން އޮފް އިންޑިއާ (އީސީއައި) ގެ ފަރާތުންނެވެ.

ޕާޓްނާ ޑިމޮކްރަސީތަކުގެ ތެރެއިން އެކި ގައުމުތަކުގެ ބައިވެރިން ހިމެނޭހެން އީ-އައިޓެކް ވޯޓާ ރެޖިސްޓްރޭޝަން (ވީއާރް) ކޯހެއް ހިންގަން ހަމަޖެހިފައި ވެ އެވެ. އޭގެ ސަބަބުން ވޯޓުލާ މީހުން ރަޖިސްޓްރީ ކުރަން ހިންގާ ކެމްޕެއިންތައް ރާވާ ހިންގުމަށް ބޭނުންވާ އުކުޅުތައް ދަސްކޮށްދެވި ކެޕޭސިޓީ ޑިވެލޮޕް ކުރެވިގެންދާނެއެވެ.

މި ޕްރޮގްރާމުގައި ކިޔަވައިދޭ ބައިތަކުގެ ތެރޭގައި އިންޓްރޮޑަކްޝަން ޓު ވޯޓާ ރަޖިސްޓްރޭޝަން، ޓްރެއިނިން އޮން އިންފޮމޭޝަން އެންޑް ކޮމިއުނިކޭޝަން ޓެކްނޮލޮޖީ، ލޮޖިސްޓިކްސް އެންޑް އޮޕަރޭޝަންސް އަދި އޮޑިޓް އޮފް ވޯޓާ ރެޖިސްޓާސް ހިމެނެ އެވެ.

ރާއްޖޭގެ އީސީގެ 10 އޮފިޝަލުން ބައިވެރިވާ މި ޕްރޮގްރާމް ހިންގުމަށް ސޮއިކޮށްފައިވަނީ ޑިސެމްބަރު، 2019 ގަ އެވެ.

ސިއްހީ ހިދުމަތްތެރިންނަށް އަމާޒުކޮށް އިންޑިއާގެ ޑިޕާޓްމަންޓް އޮފް ބަޔޯޓެކްނޮލޮޖީ އާއި ދެކުނު އޭޝިއާގެ ގައުމުތަކުގެ ސިއްހަތާ ބެހޭ ވުޒާރާތައް ގުޅިގެން އަންނަނީ މިދިޔަ އޮކްޓޯބަރު މަހުން ފެށިގެން ތަމްރީނު ޕްރޮގްރާމްތަކެއް ހިންގަމުންނެވެ. ރާއްޖެއިން ވެސް ބައިވެރިވެފައިވާ މި ޕްރޮގްރާމްތަކުގައި ގުޑް ކްލިނިކަލް ޕްރެކްޓިސަސް އަދި ގުޑް ކްލިނިކަލް ލެބޯޓްރީ ޕްރެކްޓިސަސް ފަދަ މައުލޫމާތުތައް ހިމެނެ އެވެ. ތަމްރީނު ޕްރޮގްރާމްތަކުގައި ބައިވެރިވި ގައުމުތަކުގެ ސިއްހީ ދާއިރާތަކަށް ކޮވިޑްގެ ވެކްސިން ތައްޔާރުވެ އެޕްރޫވް ވުމާއެކު އެންމެ އެކަށީގެންވާ ގޮތެއްގައި ވެކްސިން އެއް ތަނުން އަނެއް ތަނަށް ފޯރުކޮށްދިނުމުގެ ގާބިލްކަން ލިބިގެންދާނެ އެވެ.

ދިވެހި ޓީޗަރުން ތަމްރީނުކުރުމުގެ ސްޕެޝަލައިޒްޑް ފަސް ކޯހެއް މިދިޔަ ހޯމަ ދުވަހު ވަނީ ފަށައިފަ އެވެ. ޗެންނާއިގައި ހުންނަ ނެޝަނަލް އިންސްޓިޓިއުޓް ފޯ ޓީޗާސް ޓްރެއިނިން އެންޑް ރިސާޗުން ހިންގާ ކޯސްތަކުގެ ތެރޭގައި ކޮލިޓީ އެޝުއަރެންސް އިން އޮންލައިން ޓީޗިން، ލާނިން މެނޭޖްމަންޓް ސިސްޓަމްސް، އޮންލައިން ޓީޗިން ޔޫސިން ކޮލަބޮރޭޓިވް ޓޫލްސް، މޮނިޓަރިން ފްރޭމް ވޯކްސް ފޯ އޮންލައިން ކޯސް އަދި އިންސްޓްރަކްޝަނަލް ޑިޒައިން ފޯ އޮންލައިން ކޯސް ހިމެނެ އެވެ.

ސިވިލް ސާވިސް މުވައްޒަފުންނަށް އަމާޒުކޮށް އިންޑިއާގެ ނެޝަނަލް ސެންޓަރ ފޯ ގުޑް ގަވަނެންސް އިން ހިންގާ ދެ ދުވަހުގެ ވޯކްޝޮޕް ތާވަލްކޮށްފައިވަނީ ފެބްރުއަރީ 2021 އަށެވެ.