ވީޑިއޯ ގޭމުން ނަފްސާނީ ދުޅަހެޔޮކަން އިތުރުވޭ

ގިނައިރު ވީޑިއޯ ގޭމް ކުޅުމުން ނަފުސަށް ހަމަޖެހުން ގެނެސް އުފާވެރިކަން އިހުސާސްކޮށްދޭ ކަމަށް ދިރާސާއެއްގައި ބުނެފި އެވެ.

އިނގިރޭސިލާތުގެ އޮކްސްފޯޑް އިންޓަނެޓް ރިސާޗް އިންސްޓިޓިއުޓުން މި ދިރާސާ ހަދާފައި ވަނީ އާންމުކޮށް ދެ ގޭމެއް ކުޅޭ މީހުންނަށް ނަފުސުގެ ދުޅަހެޔޮ ކަމަށް އަންނަ ބަދަލުތައް ވަޒަންކޮށްގެންނެވެ. އެ ދެ ގޭމަކީ ނިންޓެންޑޯގެ "އެނިމަލް ކްރޮސިން" އާއި އިލެކްޓްރޯނިކް އާޓްސް (އީއޭ) ގެ "ޕްލާންޓްސް ވާސަސް ޒޮންބީސް" އެވެ.

ދިރާސާ ހަދާފައި ވަނީ އާންމުކޮށް ވީޑިއޯ ގޭމް ކުޅޭ 18 އަހަރުން މަތީގެ 3،274 މީހުންގެ މައުލޫމާތަށް ބިނާކޮށެވެ. އެގޮތުން އެ މީހުންނާ ގޭމް ކުޅުމުން އަމިއްލަ ނަފުސަށް ކުރެވޭ އިހުސާސްތަކާ ބެހޭ ގޮތުން ސުވާލު ކޮށްފައިވެ އެވެ. އޭގެ ތެރެއިން ގިނަ މީހުން ބުނެފައިވާ ގޮތުގައި ގިނައިރު ވަންދެން ވީޑިއޯ ގޭމް ކުޅުމަކީ އެ މީހުންނަށް އުފާވެރިކަމާއި ހިތްހަމަޖެހުން ގެނުވައިދޭ ކަމެކެވެ.

ދިރާސާގައި ވަނީ ގޭމް ނުކުޅޭ މީހުންގެ އިހުސާސްތައް ވެސް ހުރި ގޮތް ބަލައިފަ އެވެ. އެގޮތުން ފާހަގަކުރެވުނު ކަމަކީ ވީޑިއޯ ގޭމް ނުކުޅޭ މީހުންނަށް ވުރެ ގޭމް ކުޅޭ މީހުންގެ ނަފްސާނީ ދުޅަހެޔޮކަން ބޮޑުކަމެވެ.

ދިރާސާ ޓީމްގައި އިސްކޮށް މަސައްކަތްކުރެއްވި ޕްރޮފެސަރު އެންޑްރޫ ރިބިލްސްކީ ވިދާޅުވީ މިއީ ހައިރާންކުރުވަނިވި ނަތީޖާއެއް ކަމަށެވެ. ސަބަބަކީ މީގެ ކުރިން ވީޑިއޯ ގޭމް ކުޅެން ހޭދަކުރާ ވަގުތުން ނުރަނގަޅު އަސަރުތަކެއް ކުރާ ކަމަށް ބުނެފައިވުމެވެ.

"އަހަރެމެންނަށް ފާހަގަކުރެވުނީ ކޮންމެ ދުވަހަކު މަދުވެގެން ހަތަރު ގަޑިއިރު ގޭމް ކުޅޭ މީހުން، ގޭމް ނުކުޅޭ މީހުންނާ އަޅާބަލާއިރު މާ ބޮޑަށް ވެސް އުފާވެރިކަން،" އޭނާ ވިދާޅުވި އެވެ.

އެންޑްރޫ ވިދާޅުވި ގޮތުގައި މިގޮތަށް ދިމާވަނީ ގޭމްތަކުގައި ސޯޝަލް ފީޗާތަކާ އެކު އޭގައި ހުންނަ ކެރެކްޓަތަކާއި ގޭމް ކުޅޭ މީހާއާ ދެމެދު އުފެދޭ "ހާއްސަ ގުޅުމެއް" ގެ ސަބަބުންނެވެ.

"މިސާލަކަށް، ކެރެކްޓާތަކަށް އިންޓަރެކްޓްކުރެވޭ ކަހަލަ ސޯޝަލް ފީޗާތަކެއް ހުރި ނަމަ އެ ގޭމަކުން ކުރާ އަސަރު ބޮޑުވޭ،" އޭނާ ވިދާޅުވި އެވެ. "އަދި ފާހަގަކުރެވޭ މައިގަނޑު އެއް ކަމަކީ ގޭމެއް ކުޅެގެން އުފާވެރިކަން ހަމަޖެހުމެއް ނުލިބޭ ނަމަ އެފަދަ އެއްޗަކަށް މީހަކު ޝައުގުވެރި ވެސް ނުވާނެކަން."

އެންޑްރޫ ވަނީ ވީޑިއޯ ގޭމަކީ "ޑިޖިޓަލް ވޯޓަ ކޫލަރެއް" ގެ ގޮތުގައި ވެސް ސިފަކުރައްވައިފަ އެވެ. އޭނާ ވިދާޅުވީ ވީޑިއޯ ގޭމް ކުޅުމުން އެހެން މީހުންނާ އޮންލައިންކޮށް މުއާމަލާތްކުރަން ވެސް ދަސްކޮށްދޭ ކަމަށެވެ.

"އެހެންވީމާ އެބަޖެހޭ އަދި ތަންކޮޅެއް ފުޅާކޮށް ވީޑިއޯ ގޭމްތަކާ ބެހޭ ދިރާސާ ހަދަން. ގިނަ ގޭމްތަކާއި ގޭމް ކުޅޭ ގިނަ މީހުންނާއި ގޭމަށް ހޭދަކުރާ ވަގުތާ ބެހޭ އިތުރު ދިރާސާތަކެއް ހެދުމަކީ ވަރަށް މުހިއްމު ކަމަކަށް ވާނެ،" އެންޑްރޫ ވިދާޅުވި އެވެ.

ވީޑިއޯ ގޭމް ކުޅުމަކީ ވަރަށް ގިނަ ބަޔަކު ޝައުގުވެރިވާ ކަމެކެވެ. ހާއްސަކޮށް ޒުވާނުންގެ މެދުގައި މިއީ ފޯރިގަދަ ކަމެކެވެ. ނަމަވެސް ވީޑިއޯ ގޭމްތަކަށް ދެވިނުހިފާ ވަރަށް ގޭމް ކުޅުން ބުއްދިވެރި އެވެ. ދުނިޔޭގެ ސިއްހަތު ޖަމިއްޔާ ޑަބްލިއުއެޗްއޯ އިން ވަނީ 2017 ގައި ވީޑިއޯ ގޭމަށް ދެވިހިފުމަކީ ނަފުސާނީ ބައްޔެއްގެ ގޮތުގައި ކަނޑައަޅައިފަ އެވެ.