ވަގަށް ނެގި ފޯނާ ކުޅެން ނޭނގުމުން ވެރިމީހާއާ ހަވާލުކޮށްފި

އިންޑިއާގައި މީހަކު ވަގަށް ނެގި ސްމާޓްފޯނަކާ ކުޅެން ނޭނގުމުން ފޯނުގެ ވެރިމީހާއާ އެ ހަވާލުކޮޮށްފި އެވެ.

މީޑިއާތަކުން ބުނީ ބިހާރު ސްޓޭޓްގެ ޖަމަލްޕޫރް ޑިސްކްރިޓްގައި ފޮނިކާތަކެތި ވިއްކާ ސްޓޯލެއްގެ ކައުންޓަރު މަތީގައި 45،000 ރުޕީސްގެ ފޯނު ބާއްވާފައި ވެރިމީހާ އަށް ދެވުނީ މިދިޔަ ހޯމަ ދުވަހު ކަމަށެވެ. ފޯނު ގެއްލުނުކަން އެނގުމާ އެކު ފުލުހުންނަށް ރިޕޯޓްކުރުމުން ފޯނު ޓްރޭސްކުރަން މަސައްކަތްކުރި އެވެ. އެކަމަކު ނިއްވާލާފައި އޮތުމުން ޓްރޭސްކުރެވޭ ގޮތެއް ނުވި އެވެ.

ފޯނު ވަގަށް ނެގި މީހާ އެ ހަވާލުކުރީ އަންގާރަ ދުވަހު އެވެ.

ފޯނުގެ ވެރިމީހާ ބުނީ އެހެން ނަމްބަރަކުން ފޯނަށް ގުޅި ނަމަވެސް ފޯނު ނިއްވާލާފައި އޮތުމުން ގުޅޭ ގޮތެއް ނުވި ކަމަށެވެ.

"ދެން އަންގާރަ ދުވަހު އަހަރެން ގުޅަން މަސައްކަތްކުރަނިކޮށް ގުޅިއްޖެ. ވާހަކަ ދެއްކި މީހާ ބުނީ ތިމަންމަނައޭ ސްޓޯލުން ފޯން ވަގަށް ގެންދިޔައީ. މިއާ ކުޅޭ ގޮތެއް ވެސް ނޭނގެއޭ. އެހެންވެ ބޭނުމޭ ހަވާކުލުކުރަން،" ފޯނުގެ ވެރިމީހާ ބުންޏެވެ.

އޭނާ ބުނީ އެ ކޯލާ އެކު ވަގުތުން އަނެއްކާ ވެސް ފުލުހުންނަށް ގުޅައި ފުލުހުންގެ އޮފިސަރުންތަކެއް ގޮވައިގެން، ފޯނު ވަގަށް ނެގި މީހާ ބުނި ތަނަށް ދިޔައީ ކަމަށެވެ.

"ދެން އޭނަ ފޯނު ދިނީ. ވަރަށް ދެރަވެފައި ބުނީ މިއަކާ ކުޅޭކަށް ވެސް ނޭނގުނޭ. ވަރަށް ބޮޑަށް މާފަށް އެދެމޭ ފޯނު ވަގަށް ނެގުނީތީ،" ފޯނުގެ ވެރިމީހާ ބުންޏެވެ.

ފޯނު ވަގަށް ނެގީ 22 އަހަރުގެ ޒުވާނެކެވެ. އޭނާ އަމިއްލަ އަށް ފޯނު ހަވާލުކޮށްފައިވާތީ ފުލުހުން އެއްވެސް ފިޔަވަޅެއް ނާޅަ އެވެ.