ވަގުތުން ވަގުތަށް ބޭނުންކުރަން ހުރި ރިޒާވް ފަސް ޕަސެންޓް ދަށަށް ހިނގައްޖެ

ވަގުތުން ވަގުތަށް ބޭނުންކުރަން ހުންނަ ފައިސާ ނުވަތަ ޔޫޒަބްލް ރިޒާވް މިދިޔަ މާޗް މަހާ އަޅާބަލާއިރު ފަސް ޕަސެންޓް ދަށަށް ގޮސްފައިވާ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ތަފާސްހިސާބުތަކުން ދައްކައިފި އެވެ.

މަރުކަޒީ ބޭންކުން އިއްޔެ ނެރުނު އިގްތިސާދީ ރިވިއުގައި ބުނެފައި ވަނީ ޔޫޒަބްލް ރިޒާވްގެ ގޮތުގައި މިދިޔަ އޭޕްރިލް މަސް ނިމުނުއިރު ހުރީ 230.8 މިލިއަން ޑޮލަރު ކަމަށެވެ. އަދި އެއީ މިދިޔަ މާޗް މަހާ އަޅާބަލާއިރު ފަސް ޕަސެންޓް ދަށް އަދަދެކެވެ. ނަމަވެސް އަހަރުން އަހަރަށް ބަލާއިރު މިއީ 13 ޕަސެންޓުގެ އިތުރުވުމެކެވެ.

ޔޫޒަބްލް ރިޒާވަކީ ރަސްމީ ރިޒާވުން ކުރު މުއްދަތުގެ ބޭރުގެ ލައިބިލިޓީތައް އުނިކުރުމުން ބާކީ އޮންނަ އަދަދެވެ. ޔޫޒަބްލް ރިޒާވުން ދައްކައިދެނީ ބޭރު ފައިސާގެ އެކި މުއާމަލާތްތަކަށް ވަގުތުން ވަގުތަށް ބޭނުންކުރުމަށް ހުރި ފައިސާގެ އަދަދެވެ.

އިގްތިސާދީ ރިވިއުގައި ބުނެފައި ވަނީ މިދިޔަ އޭޕްރިލް މަސް ނިމުނުއިރު ރާއްޖޭގެ ރަސްމީ ރިޒާވްގައި ހުރީ 707.2 މިލިއަން ޑޮލަރު ކަމަށެވެ. އެ އަދަދު މިދިޔަ މާޗް މަހާ އަޅާބަލާއިރު ހަތް ޕަސެންޓް އިތުރުވިއިރު މިދިޔަ އަހަރުގެ އެ މުއްދަތާ އަޅާބަލާއިރު ހަ ޕަސެންޓް އިތުރުވެފައިވާ ކަމަށް އެ ރިވިއުގައި ބުނެފައިވެ އެވެ.