ދިރާގުން ބަދަލު ދޭން ކުރި ހުކުމް އިސްތިއުނާފްކޮށްފި

ފޯނެއް ގަންނަން ދިރާގަށް އޯޑަރު ދިން މީހަކަށް ފޯނު ނުލިބުމުން ބަދަލުގެ ގޮތުގައި 160،000ރ. ދޭން ދިރާގުގެ މައްޗަށް ސިވިލް ކޯޓުން ކުރި ހުކުމް އެ ކުންފުނިން ހައި ކޯޓުގައި އިސްތިއުނާފްކޮށްފި އެވެ.

ދުރާލާ އޯޑަރު ނަގައިގެން އައިފޯން "އެސް އީ" ވިއްކަން މިދިޔަ މާޗް މަހު ދިރާގުން ފެށި ޕްރޮމޯޝަންގައި އޭގެ ފޯނަކަށް އޯޑަރު ދީ، ފުރަތަމަ ޕޭމަންޓްގެ ގޮތުގައި ދައްކަން ޖެހޭ 5،800ރ. ދެއްކުމުން ވެސް އެ މީހާއަށް ފޯނު ނުލިބުނު މައްސަލާގައި ބަދަލު ނަގައިދިނީ އޭނާގެ ފަރާތުން ކޯޓަށް ހުށަހެޅުމުން މިދިޔަ އޮގަސްޓް މަހު އެވެ.

ފޯނު ނުލިބުމުން އެ މީހާއަށް ކުރިމަތިވި ލަދުވެތިކަމާއި އުފުލަން ޖެހުނު ތަކުލީފުތަކާއި އެފަދަ ކަންކަން ތަކުރާރު ވިޔަ ނުދޭން ބަދަލުގެ ގޮތުގައި ނަގައިދިނީ އެއް ލައްކަ ރުފިޔާ އެވެ. އޭގެ އިތުރަށް ވަކީލުންގެ ފީގެ ގޮތުގައި ޚަރަދުވި 50،000ރ. އާއި އޭނާ ދިރާގަށް ދެއްކި 5،800ރ. އާއި އެ ފޯނު ނުލިބުމުން އާ ފޯނެއް ގަންނަން ހޭދަކުރި 4،500ރ. ވެސް ދިރާގުން ދޭން ކޯޓުން ވަނީ ހުކުމްކޮށްފަ އެވެ.

އެ މައްސަލަ ދިރާގުން އިސްތިއުނާފްކުރީ މީގެ ދުވަސްކޮޅެއް ކުރިން ކަމަށް އެނގިފައިވެ އެވެ. އެކަމަކު އެ މައްސަލަ ބަލައިގަތުމާ މެދު ހައި ކޯޓުން ގޮތެއް ނިންމިކަމެއް އަދިއެއް ނޭނގެ އެވެ.