ވަންޕްލަސް އިން 5ޖީ ތަރައްގީކުރަން 30 މިލިއަން ޑޮލަރު ހޭދަކުރަނީ

ވަންޕްލަސް މަރުކާގައި ދެން އޮތީ "ވަންޕްލަސް 8" އެވެ. ވަންޕްލަސް 8ގެ ހުރިހާ ފޯނެއްގައި 5ޖީ ފެންވަރު ހުންނާނެ ކަމަށް އެ ކުންފުނިން ވަނީ ކަށަވަރުކޮށްދީފަ އެވެ. އަނެއްކޮޅުން މިހާރު ދެކެވެނީ، 5ޖީ މޮބައިލް ނެޓްވޯލް ވަރުގަދަކޮށް، މި ޓެކްނޮލޮޖީ ހަރުދަނާކުރުމަށް، ވަންޕްލަސް އިން 30 މިލިއަން ޑޮލަރު ހޭދަކުރަން ނިންމި ވާހަކަ އެވެ.

ވަންޕްލަސް އަކީ ޗައިނާ ކުންފުންޏެކެވެ. ސްމާޓްފޯން އުފެއްދުމަށް މަޝްހޫރު ކުންފުންޏެކެވެ. މި ސިނާއަތުގައި އަދި ޅަ ކުންފުންޏެއް ނަމަވެސް، މުއްސަނދި ކުންފުންޏެކެވެ. އެހެންވެ، އާ ދިރާސާތަކަށް އަދި އާ އުފެއްދުންތަކަށް 30 މިލިއަން ޑޮލަރު ހޭދަކުރުމަކީ އެ މީހުންނަށް ބޮޑު ކަމަކަށް ވާނެހެން ހިއެއްނުވެ އެވެ.

ވަންޕްލަސް އިން ޚަރަދުކުރާނެ ކަމަށް ބެލެވެނީ "ކްލައުޑް ގޭމިން"، "ކްލައުޑް ވީޑިއޯ" އަދި "ކްލައުޑް ސްޓޯރޭޖް" ފަދަ ޓެކްނޮލޮޖީތައް ބާރުގަދަކުރުމަށެވެ. އެ މީހުންގެ މައިގަނޑު މަގުސަދަކީ، މި ޚިދުމަތްތައް ބޭނުންކުރާ މީހުން ކުރާ ތަޖުރިބާ އަށް ކުދިނުކިޔާ ވަރުކުރުމެވެ. ބެލެވޭ ގޮތުގައި، ވަންޕްލަސް އިން ކުރާ ހޭދައިގެ ބޮޑުބައި، ވަންޕްލަސް މަރުކާގެ ޑިވައިސްތައް ހަރުދަނާކުރުމަށް ކަނޑައަޅާނެ އެވެ.