ސިންގަޕޫރުގެ އެގްޒަމިނޭޝަން ބޯޑުން ބްރައިޓްވޭ ސްކޫލު އެކްރެޑިޓް ކޮށްފި

ސިންގަޕޫރުގެ އެގްޒަމިނޭޝަން އެންޑް އެސެސްމަންޓް ބޯޑުން، ރާއްޖޭގެ ބްރައިޓްވޭ އިންޓަނޭޝަނަލް ސްކޫލު އެކްރެޑިޓްކޮށްފި އެވެ.

އެކްރެޑިޓް ކުރިކަމުގެ ލިޔުން، ސިންގަޕޫރުގައި ބޭއްވި ރަސްމިއްޔާތެއްގައި ބްރައިޓްވޭ ސްކޫލު ހިންގާ ކޮލިޓޭޓް އެޑިއުކޭޝަނާ ވަނީ ހަވާލުކޮށްފަ އެވެ. އެ ސްކޫލު ވެގެންދާނީ، ތައުލީމީ ގޮތުން އެންމެ ކުރިއަރާފައިވާ އެއް ގައުމު ކަމަށްވާ، ސިންގަޕޫރުގެ އެގްޒަމިނޭޝަން ބޯޑުން އެކްރެޑިޓްކުރި ސައުތު އޭޝިޔާގެ ފުރަތަމަ ގައުމަށެވެ. އަދި އެއީ ސިންގަޕޫރުން ބޭރުގައި ގާއިމްވެގެންދިޔަ 19 ވަނަ ސެންޓަރެވެ.

ކޮލިޓޭޓް އެޑިއުކޭޝަންގެ މެނޭޖިން ޑިރެކްޓަރު މޫސާ ރަޝީދު ވިދާޅުވި ގޮތުގައި، އެކްރެޑިޓް ކުރުމަށް އެ ބޯޑުގެ އިސްވެރިން މިދިޔަ މަހުގެ 15-17 އަށް ސްކޫލަށް ޒިޔާރަތްކުރި ކަމަށެވެ. އެކަން ގަބޫލުކޮށްފައިވަނީ އޮޑިޓަށްފަހު ކަމަށް ވިދާޅުވި އެވެ.

"އޮޑިޓްކުރިއިރު ކްލާސްރޫމުގައި ކިޔަވައިދޭ ގޮތް އެސެސްކުރުމާއި ސްކޫލުގެ ވަސީލަތްތަކާއި އިންފްރާސްޓްރަކްޗާ އަދި ޓީޗަރުންގެ ގާބިލްކަމަށް ބަލާފައިވޭ،" މޫސަ ވިދާޅުވި އެވެ.

އޭނާ ވިދާޅުވީ ސިންގަޕޫރުގެ އެގްޒަމިނޭޝަން ބޯޑުން އެކްރެޑިޓް ކުރުމުން ސްކޫލުގެ މުވައްޒަފުންގެ ކުރިއެރުމަށް އެ ބޯޑުން ގެންދާ ޓްރެއިނިންގެ ފަހި ފުރުސަތުތައް ލިބިގެންދާނެ ކަމަށެވެ. އެއާއެކު ސްކޫލުގެ ފެންވަރު ރަނގަޅުވެގެންދާނެ ކަމަށް ވިދާޅުވި އެވެ.

"މިއީ ލިބުނު ވަރަށް ބޮޑު ކާމިޔާބީއެއް،"

ބްރައިޓްވޭ ސްކޫލުގައި ކިޔަވައިދެމުން އަންނަނީ ވެސް ސިންގަޕޫރުގެ އިރުޝާދު ޓްރަސްޓް ލިމިޓެޑާ ގުޅިގެންނެވެ. އެ ސްކޫލުގައި ބޭނުންކުރަނީ އެ ގައުމުގެ މަޝްހޫރު މާޝަލް އެންޑް ކެވެންޑިޝްގެ ފޮތްތަކެވެ.

ޖުމްލަ 10 މެމްބަރުން ހިމެނިވަޑައިގަންނަވާ ސިންގަޕޫރުގެ އެގްޒަމިނޭޝަން އެންޑް އެސެސްމަންޓް ބޯޑުގައި ތިއްބަވަނީ އެ ގައުމުގެ އެކި މިނިސްޓްރީތަކުގެ އިސް މަގާމުތަކުގައި ތިއްބެވި ބޭފުޅުންނެވެ. މީގެ 16 އަހަރު ކުރިން އެ ބޯޑު އުފެއްދީ ސިންގަޕޫރުގެ އެޑިއުކޭޝަން މިނިސްޓްރީގެ އިމްތިހާނާ ބެހޭ ޑިވިޝަނެއްގެ ގޮތުގަ އެވެ.