ބްރައިޓްވޭގެ ކުދިންތަކެއް ސިންގަޕޫރުގެ އައިޕީއެސްއެލް އިމްތިހާނުގައި ބައިވެރިވެއްޖެ

ރާއްޖޭގެ ބްރައިޓްވޭ އިންޓަނޭޝަނަލް ސްކޫލުގެ ކުދިންތަކެއް، ސިންގަޕޫރުގެ އިންޓަނޭޝަނަލް ޕްރައިމަރީ ސްކޫލު ލީވާސް އިމްތިހާނު (އައިޕީއެސްއެލްއީ) ގައި ބައިވެރިވެއްޖެ އެވެ.

ސިންގަޕޫރުގެ މުގައްރަރަށް ކިޔަވައިދޭ ސްކޫލުތަކަށް އަމާޒުކޮށް، އެ ގައުމުގެ އެގްޒަމިނޭޝަން ބޯޑުން މި މަހުގެ 3-11 އަށް އިންތިޒާމުކުރި އިމްތިހާނުގައި ބްރައިޓްވޭގެ ގްރޭޑު ހައެއްގައި ކިޔަވަމުން އަންނަ 30 ދަރިވަރުން ބައިވެރިވި އެވެ. ސިންގަޕޫރުން ބޭރުގައި 19 ސްކޫލެއްގެ ދަރިވަރުން އެ ޓެސްޓުގައި ބައިވެރިވެފައި ވެ އެވެ.

އެ ގައުމުގެ ގްރޭޑު 6 ނިންމާ ކުދިންނަށް ދެނީ ޕްރައިމަރީ ސްކޫލު ލީވާސް އެގްޒަމިނޭޝަނެވެ. ސިންގަޕޫރުން ބޭރުގެ ދަރިވަރުންނަށް ދެނީ އިންޓަނޭޝަނަލް ޕްރައިމަރީ ސްކޫލު ލީވާސް އިމްތިހާނެވެ.

ހުޅުމާލޭގައި ހިންގާ ބްރައިޓްވޭ އަކީ، ސިންގަޕޫރު އެގްޒަމިނޭޝަން ބޯޑުން އެކްރެޑިޓް ކޮށްފައި ހުރި ސައުތު އޭޝިޔާގެ ހަމައެކަނި ސްކޫލެވެ. އެސެސް ކުރުމަށް ފަހު، ސިންގަޕޫރުގެ އެގްޒަމިނޭޝަން ބޯޑުން ބަލައިގަތް ކަމުގެ ލިޔުން ދީފައިވަނީ މިދިޔަ ފެބްރުއަރީ މަހު އެވެ.

ބްރައިޓްވޭ ހިންގާ ކޮލިޓޭޓް އެޑިއުކޭޝަންގެ މެނޭޖިން ޑިރެކްޓަރު މޫސާ ރަޝީދު ވިދާޅުވީ، އެ އިމްތިހާނު ދީފައި ވަނީ އިނގިރޭސި އާއި ސައިންސާއި ހިސާބު މާއްދާ އިން ކަމަށެވެ. މި މަހުގެ ފަހުކޮޅު ޓެސްޓުތަކުގެ ނަތީޖާ ލިބޭނެ ކަމަށް އުއްމީދު ކުރައްވާ ކަމަށް އޭނާ ވިދާޅުވި އެވެ. އެ ޓެސްޓުތައް އެންމެ ފުރަތަމަ ތާވަލުކުރީ، އެހެން އަހަރުތެކޭ ވެސް އެއްގޮތަށް މިދިޔަ ޖޫން މަހަށެވެ. ނަމަވެސް ކޮވިޑް-19 އާ ގުޅިގެން މި މަހަށް ފަސްކުރީ އެވެ. ޖުމުލަ 10 މެމްބަރުން ހިމެނިވަޑައިގަންނަވާ ސިންގަޕޫރުގެ އެގްޒަމިނޭޝަން އެންޑް އެސެސްމަންޓް ބޯޑުގައި ތިއްބަވަނީ އެ ގައުމުގެ އެކި މިނިސްޓްރީތަކުގެ އިސް މަގާމުތަކުގައި އުޅުއްވާ ބޭފުޅުންނެވެ. މީގެ 16 އަހަރު ކުރިން އެ ބޯޑު އުފެއްދީ ސިންގަޕޫރުގެ އެޑިއުކޭޝަން މިނިސްޓްރީގެ އިމްތިހާނާ ބެހޭ ޑިވިޝަނެއްގެ ގޮތުގަ އެވެ.