މުހައްމަދު ހަސަނާ އެކު ހަތަރު ދިވެއްސެއް އިންޑޮނީސިއާއިން ހިފަހައްޓައިފި

މަކްތަބާ ސަލަފިއްޔާގެ ނަމުގައި ރާއްޖޭގައި ހަރަކާތްތެރިވާ ދީނީ ޖަމިއްޔާގައި އިސްކޮށް އުޅޭ މުހައްމަދު ހަސަނާ އެކު ހަތަރު ދިވެއްސަކު އިންޑޮނީސިއާއިން ހިފެހެއްޓުމަށް ފަހު ދޫކޮށްލައިފި އެވެ.

ފުލުހުން ބުނީ މިދިޔަ ބުރާސްފަތި ދުވަހު މެލޭޝިޔާ މަގުން އިންޑޮނީޝިއާއަށް ދިޔަ ހަތަރު ދިވެހިން ހިފެހެއްޓި ކުރިކަމުގެ މައުލޫމާތު ފުލުހުންނަށް ލިބިފައިވާ ކަމަށެވެ. އިންޑޮނީސިއާ އިން ހިފެހެއްޓީ 46 އަހަރާއި، 39 އަހަރާއި، 36 އަހަރާއި އަދި 34 އަހަރުގެ ދިވެހި ފިރިހެނުންކަމަށް ކަމާ ބެހޭ އިދާރާތަކުން ދިވެހި ފުލުހުންނަށް އަންގާފައިވާ ކަމަށް ވެސް ފުލުހުން ބުންޏެވެ.

ފުލުހުން ބުނި ގޮތުގައި ހަތަރު މީހުން ދޫކޮށްލުމުން އިއްޔެ އެމީހުން އެނބުރި ރާއްޖެއަށް އައިސްފައިވާ ކަމަށެވެ. ފުލުހުން އަންނަނީ އެ މައްސަލަ ބަލަމުންނެވެ.

އިންޑޮނީސިއާއިން ހައްޔަރުކުރި ހަތަރު ދިވެހިންގެ ތެރެއިން މުހައްމަދު ހަސަންގެ ދީނީ ނަސޭހަތުގައި ހަރުކަށި ގޮތްތަކަށް ބާރުއެޅުމާއި ޚިޔާލުތަފާތުވާ ކަންކަމުގައި ވަކި ގޮތަކަށް ކަންކުރަން ވާހަކަ ދައްކާތީ އޭނާގެ ނަސޭހަތް ދިނުމުގެ ހުއްދަ އިސްލާމިކް މިނިސްޓްރީން ވަނީ ހިފަހައްޓައިފަ އެވެ.