ސައުދީގައި ޝޯ ދެނިކޮށް ސްޓޭޖަށް އަަރައި ހަމަލާ ދިން މީހާ އަށް މަރުގެ ހުކުމް

ރިޔާޒް (ޑިސެމްބަރު 31) - ސައުދީ އަރަބިއާގެ ވެރިރަށް ރިޔާޒުގައި މިދިޔަ ނޮވެމްބަރު މަހު ލައިވްކޮށް ޝޯއެއް ދެނިކޮށް ސްޓޭޖަށް އަރައި ވަޅިން ހަމަލާ ދިން ޔަމަން މީހާގެ މައްޗަށް މަރުގެ ހުކުމް އިއްވާފައިވާ ކަމަށް އެ ގައުމުގެ ރަސްމީ ޓީވީ އަލް އަޚްބާރިއްޔާ އިން ބުނެފި އެވެ.

ރިޔާޒުގެ ކިންގް އަބްދުﷲ ޕާކުގައި ނޮވެމްބަރު 11 ވަނަ ދުވަހު ބޭއްވި ޝޯގައި ބައިވެރިވި ބޭރުގެ ނެށުންތެރިންނަށް ހަމަލާދިން 33 އަހަރުގެ ޔަމަނު މީހާ ވަނީ ވަގުތުން ހައްޔަރުކޮށްފަ އެވެ. ހަމަލާގައި ވަނީ ސްޕޭނުގެ ތިއޭޓާ ގްރޫޕުގެ ދެ ފިރިހެނުންނާއި އަންހެނަކު ޒަޚަމްވެފަ އެވެ.

ހަމަލާ ދިން މީހާ އަށް މަރުގެ ހުކުމް އިއްވި އިރު އެކަމުގައި އޭނާ އަށް އެހީތެރިވެދިން މީހަކު ވަނީ 12 އަހަރަށް ޖަލަށްލާން ހުކުމްކޮށްފަ އެވެ. އެ މީހާއާ ބެހޭ މައުލޫމާތު އަލް އަޚްބާރިއްޔާ އިން ގެނެސްދީފައެއް ނުވެ އެވެ.

ނޮވެމްބަރު 11 ވަނަ ދުވަހު ޝޯ ދެނިކޮށް ދުވެފައި ގޮސް އެ މީހާ ސްޓޭޖަށް އަރައި ހަމަލާ ދެނިކޮށް އެހެން މީހަކު އޭނާ ފަހަތުން ދުއްވައިގަތުމުން ހަމަލާ ދިން މީހާ ސްޓޭޖް މަތިން ވެއްޓެ އެވެ. ހަމަލާ ދިނުމާ އެކު ސްޓޭޖުގައި ނަށަން ތިބި މީހުން ދުވެފައި ގޮސް ސަލާމަތްވާ މަންޒަރު ސައުދީގެ ރަސްމީ ޓީވީން ދައްކާފައިވެ އެވެ.

ކިންގް އަބްދުﷲ ޕާކުގައި ވަނީ ދެ މަސް ދުވަހަށް މުނިފޫހިފިލުވުމުގެ ފެސްޓިވަލްގެ ހަރަކާތްތައް ބާއްވައިފަ އެވެ.

އެއީ ސައުދީގައި ޝޯތައް ފެށި ފަހުން ދިން އެ ބާވަތުގެ ފުރަތަމަ ހަމަލާ އެވެ. އަލް އަޚްބާރިއްޔާ އިން މިދިޔަ ހަފުތާގައި ބުނި ގޮތުގައި، އެ މީހާ ހަމަލާ ދިނީ ޔަމަނުގައި ހަރަކާތްތެރިވާ އަލް ގައިދާ ޖަމާއަތުގެ ލީޑަރުގެ އަމުރަށެވެ.

ސައުދީގައި ސްޓޭޖް ޝޯތައް ބޭއްވުން ކުރިން މަނާ ނަމަވެސް ވަލީ އަހުދު މުހައްމަދު ބިން ސަލްމާންގެ އިސްނެންގެވުމާ އެކު މިހާރު ވަނީ އެ ގައުމުގައި މުނިފޫހިވުލުމުގެ ހަރަކާތްތައް ބާއްވަން ފަށައިފަ އެވެ. ޖެނެރަލް އެންޓަޓެއިންމަންޓް އޮތޯރިޓީން މިހާރު ވަނީ މުނިފޫހިފިލުމުގެ އިންޑަސްޓްރީ އަށް ކުރިއަށް އޮތް 10 އަހަރު 64 ބިލިއަން ޑޮލަރު ހޭދަކުރަން ނިންމައިފަ އެވެ.