މާދަމާ ހިފާ އިރުކޭތަ ގިނައިރުތަކެއް ވަންދެން ފެންނާނެ

މާދަމާ ހެނދުނު ހިފާ އިރުކޭތަ ގިނަ އިރުތަކެއް ވަންދެން ރާއްޖެ އަށް ފެންނަން ހުންނާނެ ކަމަށް ޖައްވީ ކަންކަން ދިރާސާ ކުރާ ދިވެހި ޖަމިއްޔާ، މާސްއިން ބުނެފި އެވެ.

ސުނާމީ ކާރިސާ އަށް 15 އަހަރު ފުރުން ފާހަގަ ކުރާ ދުވަހު މާލެއަށް އިރުކޭތަ ހިފާނީ ހެނދުނު 7:38 އިން 10:32 އަށެވެ. އުތުރުގެ ރަށްތަކަށް އެ ވަގުތަށްވުރެ ފަސް މިނެޓް ކުރިން އިރުކޭތަ ހިފާއިރު ދެކުނުގެ ރަށްތަކަށް އިރުކޭތަ ހިފާނީ މާލެއަށް ވުރެ ފަސް މިނެޓް ލަހުން ކަމަށް މާސްއިން ބުނެ އެވެ.

"އެންމެ ގަދަޔަށް އިރުކޭތަ ހިފާފައި ހުންނަނީ 8:56 ގައި،" މާސްގެ ފައުންޑާ ހަމްދޫން އަނީޝް ބުންޏެވެ.

އޭނާ ބުނިގޮތުގައި އެންމެ ބޮޑަށް އިރު ގެއްލިފައިވަނިކޮށް ރާއްޖެ އަށް ފެންނާނީ އުތުރުގެ ރަށްތަކަށެވެ. އެ ހިސާބުތަކަށް އިރުގެ 75 ޕަސެންޓް ގެއްލިފައިވަނިކޮށް ފެންނާނެ ކަމަށާއި މާލެއަށް ފެންނާނީ އިރު 67 ޕަސެންޓަށް ގެއްލިފައި ވަނިކޮށް ކަމަށް ހަމްދޫން ބުންޏެވެ. އަދި ދެކުނުގެ ރަށްތަކަށް ފެންނާނީ އިރު 58 ޕަސެންޓަށް ގެއްލިފައި ވަނިކޮށް ކަމަށް އޭނާ ބުންޏެވެ.

އެންމެ ބޮޑަށް އިރުކޭތަ ހިފުމުން އިރު ފެންނާނީ އަނގޮއްޓިއެއްހެން ވަށްކޮށެވެ. އެގޮތަށް އިރުކޭތަ ހިފާފައިވަނިކޮށް މިފަހަރު ފެންނާނީ އިންޑިއާގެ ބައެއް އަވަށްތަކަށާއި ލަންކާގެ ޖަފްނާގެ އިތުރުން އިންޑޮނޭޝިއާ އާއި ސިންގަޕޫރުގެ އަވަށްތަކަށެވެ.

އިރުކޭތަ ހިފަނީ ވަށާ ދަތުރުކުރާ ދުނިޔެ އާއި އިރާ ދޭތެރެއަށް ހަނދު ވަނުމުންނެވެ. އެންމެ ފަހުން ރާއްޖެ އަށް އިރުކޭތަ ހިފާފައިވަނީ 2017 ވަނަ އަހަރު އެވެ. އަދި އަންނަ އަހަރުގެ ޖޫން މަހުގެ 23 ވަނަ ދުވަހު ވެސް އިރުކޭތަ ހިފާނެ އެވެ. ނަމަވެސް އެ ފަހަރު ކޭތަ ހިފާނީ ވަރަށް ކުޑަކޮށް ކަމަށް މާސްއިން ބުނެ އެވެ.

އިރުކޭތަ ހިފާވަގުތު އެއްވެސް ހުރަހެއް ނެތި އިރަށް ބެލުމަކީ ލޮލަށް ގެއްލުންވާ ކަމެކެވެ. އިރަށް ބަލަން ހާއްސަ އައިނު މާލޭގައި ވެސް ވިއްކަން ހުރެ އެވެ.