އޭދަފުށީގެ 15 މަގެއްގައި ތާރު އަޅަން 33 މިލިއަން ރުފިޔާގެ މަޝްރޫއެއް ފަށައިފި

ބ. އޭދަފުށީގެ ބޮޑެތި މަގުތައް ތާރު އަޅައިގެން ހެދުމަށް 33 މިލިއަން ރުފިޔާގެ މަޝްރޫއެއް މިއަދު ފަށައިފި އެވެ.

މޯލްޑިވްސް ރޯޑް ޑިވެލޮޕްމެންޓް ކޯޕަރޭޝަން (އެމްއާރުޑީސީ)ގެ ޑެޕިއުޓީ މެނޭޖިން ޑިރެކްޓަރު އަހްމަދު މަމްދޫހު ވިދާޅުވި ގޮތުގައި މި މަޝްރޫރުގެ ދަށުން ތާރު އަޅައިގެން އޭދަފުށީގައި 3.36 ކިލޯމީޓަރުގެ މަގު ހަދާނެ އެވެ.

އޭދަފުށީގެ 15 މަގެއްގައި ތާރު އަޅަން ނިންމާފައިވާ އިރު މިއަދު މަސައްކަތް ފެށީ މިރަށުގެ ބަނދަރުމަތީ މަގުންނެވެ.

މަމްދޫހު ވިދާޅުވީ ހައުސިން މިނިސްޓްރީގެ ބެލުމުގެ ދަށުން ކުރިއަށް ގެންދާ މި މަސައްކަތުގައި ފުރަތަމަ އޮންނާނީ މަގުތަކުގެ އަރިމަތީ ކާނުތައް ހެދުމާއި ކޭބަލްތައް ވަޅުލުން ފަދަ އެންމެ ބުރަ މަސައްކަތްތައް ކަމަށެވެ. މަގުތަކުގައި ތާރު އަޅާނީ އެއަށްފަހު އެވެ. އޭނާ ވިދާޅުވި ގޮތުގައި މި މަސައްކަތް އެއްކޮށް ނިމޭއިރު ހުންނާނީ މަގުތަކުގައި ސްޕީޑް ބްރޭކަރު ހަރުކުރެވި، ފެން ހިންދުމުގެ ނިޒާމު ގާއިމުކޮށް އަދި ޓްރެފިކް ނިޝާންތައް ވެސް ކުރަހައިފަ އެވެ.

މި މަސައްކަތް ނިންމުމަށް އެމްއާރްޑީސީ އަށް ދިނީ އެއް އަހަރެވެ. މަމްދޫހު ވިދާޅުވީ މި މަސައްކަތް ހަލުވިކަމާއެކު ކުރިއަށް ގެންދާނަމަ، އަންނަ އަހަރުގެ ސެޕްޓެމްބަރުގެ ކުރިން މަޝްރޫއު ނިންމުމަށް މަސައްކަތް ކުރާނެ ކަމަށެވެ.

ދުއްވާ އެއްޗެހި ގިނަ މި ރަށުގެ މަގުތައް ވަރަށް ބޮޑަށް އަޑިގުޑަންވެ، ހަލާކުވުމުގެ ސަބަބުން ވެހިކަލްތަކަށް ގެއްލުން ލިބުން ފަދަ ކަންތައްތައް ކުރިމަތިވެ އެވެ. އަދި ވާރޭ ވެހޭ ދުވަސްތަކުގައި މަގުތަކުގައި ފެންގަނޑު ބޮޑުވުމުގެ ސަބަބުން ހިނގާ ބިގާވެ އުޅުމަށް ދަތިތައް ކުރިމަތިވެ އެވެ.

އޭދަފުށީ ކައުންސިލުގެ ރައީސާ ނާޒްނީނާ ޔޫސުފް ވިދާޅުވީ އަތޮޅުގެ ގިނަ ބަޔަކު ތަފާތު އެކި ބޭނުންތަކުގައި ކޮންމެ ދުވަހަކު ކަހަލަ ގޮތަކަށް ޒިޔާރަތްކުރާ މިރަށުގެ މަގުތައް ރަނގަޅު ފެންވަރަކަށް ހެދުމަކީ، އިޖުތިމާއީ ގިނަ ފަސޭހަތަކެއް ރައްޔިތުންނަށް ލިބިގެންދާނެ ކަމެކެވެ. އަދި މި ރަށަކީ ވަރަށް ގިނަ ވެހިކަލްތައް ދުއްވާ ރަށެއްކަމުން މަގުތައް ހެދުމާ އެކު ރައްޔިތުންނަށް ލުއި ފަސޭހަތަކެއް ލިބިގެންދާނެ ކަމަށްވެސް ނާޒުނީނާ ވިދާޅުވި އެވެ.

ރާއްޖޭގެ އެކި ހިސާބުތަކުގައި މިހާރުވެސް ގެންދަނީ މަގު ހެދުމުގެ ބޮޑެތި މަޝްރޫއުތައް ހިންގަމުންނެވެ.