އަމީނީ މަގު ހެދުމުގެ މަސައްކަތަށް އިތުރު ސަރަހައްދެއް ބަންދުކޮށްފި

އަމީނީ މަގު ހެދުމުގެ މަސައްކަތަށް އެ މަގުގެ އިތުރު ބައެއް ބަންދުކޮށް، އިއްޔެ މަސައްކަތް ފަށައިފި އެވެ.

ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އިން މިއަދު ބުނީ އަމީނީ މަގުގެ ސެގްމަންޓް 2 ގެ މަސައްކަތަށް އެ މަގާއި އިރުދޭމާ ހިނގުން ގުޅޭ ހިސާބުން ފެށިގެން، ކަލާފާނު ހިނގުމާއި އަމީނީ މަގު ގުޅޭ ހިސާބަށް މަގު ބަންދުކޮށްފައިވާ ކަމަށެވެ. އެއީ އަމީނީ މަގުން ކަލާފާނު ސްކޫލުގެ ކަންމަތިން ފެށިގެން ކުޑަކުދިންގެ ބަގީޗާއާ ހަމައަށެވެ.

ބަންދުކުރި ސަރަހައްދަށް ވެހިކަލް ވެއްދުން މިހާރު ވަނީ މަނާކޮށްފަ އެވެ.

ނަމަވެސް، އެ މަގު ހަދަން އެންމެ ފުރަތަމަ ބަންދުކުރި ބޮޑުތަކުރުފާނު މަގާއި އަމީނީ މަގު ގުޅޭ ހިސާބުން ފެށިގެން އިރުދޭމާހިނގުމާއި އަމީނީ މަގު ގުޅޭ ހިސާބަށް ވެހިކަލް ވައްދަން ވަނީ ހުއްދަ ދީފައިވެ އެވެ. އެ ތަނުގައި އޮތީ ތާރު އެޅުން ފިޔަވައި އެހެން ހުރިހާ މަސައްކަތެއް ނިމިފަ އެވެ.

އަމީނީ މަގުގައި ތާރު އަޅައި ޒަމާނީ ފެންވަރަށް ހެދުމުގެ އަމަލީ މަސައްކަތް ފެށިތާ ތިން މަސް ދުވަސް ވާއިރު، އެ މަގުގެ އެއްވެސް ތަންކޮޅެއްގައި ތާރު އަޅާފައި އަދި ނުވާތީ، އާންމުންގެ ފާޑުކިޔުން ވަނީ ވަރަށް ބޮޑުވެފަ އެވެ.

އެ ފާޑުކިޔުންތަކާ ގުޅިގެން އާރްޑީސީން ބުނެފައިވާ ގޮތުގައި، އަމީނީ މަގުގައި ތާރު އަޅަން ޕްލޭންކޮށްފައި އޮތީ ދެ ބަޔަކަށް ބަހާލައިގެން ކަމަށެވެ. އެ މަގުގައި ތާރު އަޅަން ފަށާނީ ބިލަބޮންގް ސްކޫލް ހުންނަ ހިސާބަށް ޕޭވިންގެ މަސައްކަތްތައް ނިމުމުން ކަމަށް އެ ކުންފުނިން ބުންޏެވެ.

ތާރު އަޅަން ނުފެށިޔަސް، ޕޭވިންގެ މަސައްކަތް ނިމޭވަރަކުން އެ މަގަށް ވެހިކަލްތަކަށް ވަދެވޭ ގޮތް ހަދަން ވެސް އޮތީ ނިންމައިފަ އެވެ.

ޕްލޭނިން މިނިސްޓްރީން އަމީނީ މަގު ހަދަން ރޯޑް ޑިވެލޮޕްމަންޓް ކޯޕަރޭޝަނާ ހަވާލުކުރީ މި އަހަރު ޖުލައި މަހުގެ ތިނެއްގަ އެވެ. މިދިޔަ އޮގަސްޓް މަހު 30 ގައި އަމަލީ މަސައްކަތް ފެށި އެ މަގުގައި ތާރު އަޅައި ނިންމަން ދިނީ 10 މަސް ދުވަހުގެ މުއްދަތެކެވެ.

ދައުލަތުގެ ބަޖެޓުން 84 މިލިއަން ރުފިޔާ ހަރަދުކުރާ އެ މަޝްރޫއުގެ ދަށުން އަމީނީ މަގުގައި 1.7 ކިލޯމީޓަރުގެ ތާރު އަޅައި، ފެން ހިންދާ ނިޒާމެއް ވެސް ހަދާނެ އެވެ.