ޓީޗަރުން ސަލާމްބުނަނީ ބަލިވެގެން، މައްސަލަ ހައްލުވެއްޖެ: މިނިސްޓްރީ

ބ. ކެންދޫގައި ޓީޗަރުން ސަލާމް ބުނަނީ ބަލިވެގެން ކަމަށާއި އިއްޔެ ޖެހުނު މައްސަލަ މިހާރު ހައްލުވެއްޖެ ކަމަށް އެޑިއުކޭޝަން މިނިސްޓްރީން މިއަދު ބުނެފި އެވެ.

އެ ރަށު ސްކޫލު ޓީޗަރުން ސަލާމް ބުނާ ކަމަށް ބުނެ އެ ރަށުގެ ބައެއް ބެލެނިވެރިން ނިކުމެ ސްކޫލުގައި ތަޅުއެޅުވި އެވެ. ގާތްގަނޑަކަށް 200އެއްހާ ދަރިވަރުން ކިޔަވާ އެ ސްކޫލު ބެލެނިވެރިން ބަންދުކުރީ ހެނދުނު ސެޝަނުގެ ކިޔެވުން ފެށުމުގެ ކުރިން، ސްކޫލު ދޮށަށް ގޮސް މުޒާހަރާ ކުރުމަށް ފަހު އެވެ.

އެޑިއުކޭޝަން މިނިސްޓްރީގެ އޮފިޝަލަކު ވިދާޅުވީ ޓީޗަރުންނާއި ސްކޫލުގެ މެނޭޖްމަންޓާ ވާހަކަދައްކައިގެން އިއްޔެ އެ މައްސަލަ ހައްލުކޮށްފައިވާ ކަމަށާއި ކިޔެވުން ކުރިއަށްގެންދާ ކަމަށެވެ.

"އެ ރަށުގައި ހުމެއް އެބަ ފެތުރޭ. މިނިސްޓްރީން ބެލި ބެލުމުން ޓީޗަރުން ސަލާމް ބުނެފައި ވަނީ ބަލިވެގެން. ދަރިވަރުންގެ ތެރެއިން ވެސް ތިރީހަކަށް ދަރިވަރުން ސަލާމްބުނެފައިވޭ،" އޮފިޝަލް ވިދާޅުވި އެވެ.

އިއްޔެ މުޒާހަރާ ކުރި ބެލެނިވެރިއަކު ބުނީ ޓީޗަރުން ގިނަގިނައިން ސަލާމް ބުނާއިރު، ގެއްލޭ މާއްދާތައް އެހެން ޓީޗަރުން ކިޔަވައިނުދޭ ކަމަށެވެ.