އިންޑިއާގެ ޓެކްނޮލޮޖީ ހޯދުންތައް ކައިރި ގައުމުތަކާ ހިއްސާކުރަން މަލީހު އެދިވަޑައިގެންފި

ސައިންސާއި ޓެކްނޮލޮޖީގެ ދާއިރާއިން އިންޑިއާގެ ހޯދުންތައް އަވަށްޓެރި ގައުމުތަކަށް ވާސިލްކޮށްދިނުމަށް، ސައިންސް އަދި ކޮމިއުނިކޭޝަން މިނިސްޓަރު މުހައްމަދު މަލީހް ޖަމާލް އެދިވަޑައިގަންނަވައިފި އެވެ.

އިންޑިއާގެ ކަލްކަތާގައި މިހާރު ކުރިއަށް ދާ އިންޑިއާ އިންޓަނޭޝަނަލް ސައިންސް ފެސްޓިވަލް ހުޅުވުމުގެ ރަސްމިއްޔާތުގައި ވާހަކަ ދައްކަވަމުން މަލީހް ވިދާޅުވީ ސައިންސާއި ޓެކްނޮލޮޖީގެ ދާއިރާއިން އެ ގައުމުން ބޮޑެތި ކުރިއެރުންތަކެއް ހޯދާފައިވާ ކަމަށާއި އެ ހޯދުންތައް އަވަށްޓެރި ގައުމުތަކަށް ވާސިލްކޮށްދިނުމަށް އެދޭ ކަމަށެވެ. އަދި އެ ދާއިރާއިން އިލްމު ހިއްސާ ކުރުމުގެ މުހިއްމުކަން ފާހަގަ ކުރައްވައި އެކަމަށް އޭނާ ގޮވާލެއްވި އެވެ.

އެ ރަސްމިއްޔާތުގައި މަލީހް ވަނީ، އިންޑިއާގެ އިންސްޓިޓިއުޝަންތަކާއި ރާއްޖެއާ އޮންނަ ގުޅުން ހަރުދަނާ ކުރުމާ ގުޅޭގޮތުން ވެސް ވާހަކަ ދައްކަވައިފަ އެވެ. އަދި ސައިންސާއި ޓެކްނޮލޮޖީ، އިންޖިނިއަރިން އާއި ހިސާބުގެ ދާއިރާތައް ރާއްޖޭގެ ތައުލީމުގެ މަންހަޖުގައި ހިމެނުމަށް މަސައްކަތް ކުރާއިރު، އެކަމަށް އިންޑިއާއިން ވެދެވޭނެ އެހީތެރިކަމާ ގުޅޭ ގޮތުން ވެސް ވާހަކަ ދެއްކެވި އެވެ.

މިއީ އިންޑިއާގެ ގިނަ ކޮލެޖްތަކާއި ޔުނިވަސިޓީތަކުން ބައިވެރިވާ ސައިންސް އަދި ޓެކްނޮލޮޖީ ފެސްޓިވަލެކެވެ. މިނިސްޓަރު ވަނީ މި ފަދަ އިންޓަނޭޝަނަލް ފެސްޓިވަލްތަކުގައި ދިވެހި ދަރިވަރުންނަށް ބައިވެރިވެވޭނެ ގޮތްތަކާ ގުޅޭގޮތުން ވެސް މަޝްވަރާކުރައްވައިފަ އެވެ.

މި ފެސްޓިވަލުގެ ބައެއްގެ ގޮތުން، މަލީހް ވަނީ އެސްއެންބޯސް އިންސްޓިޓިއުޓަށް ވަޑައިގެން، އެ މަރުކަޒުން ދިވެހި ދަރިވަރުންނަށް ތައުލީމާއި ތަމްރީނުގެ ފުރުސަތު ހޯދުމާ ގުޅޭގޮތުން ވާހަކަ ދައްކަވައިފަ އެވެ. އޭގެ އިތުރުން އިންޑިއާ އާއި ދުނިޔޭގެ ބޮޑެތި ގައުމުތަކުން ސައިންސްގެ ދާއިރާއިން މި ވަގުތު ކުރިއަށް ދާ ބޮޑެތި މެގަ ސައިންސް ޕްރޮޖެކްޓުތައް ބައްލަވާލައްވައި އޭގެ މައުލޫމާތު މިނިސްޓަރު ހޯއްދެވި އެވެ.