އިންތިޚާބު ވެއްޖެ ނަމަ ހަނގުރާމައިގެ މައްސަލަތައް ނުބަލާނަން: ގޯޓާބޭ

ކޮލަމްބޯ (އޮކްޓޯބަރު 16) - ކުރިއަށް އޮތް ރިޔާސީ އިންތިޚާބު ކާމިޔާބު ކުރެވިއްޖެ ނަމަ، ބޭބޭފުޅު މަހިންދާ ރާޖަޕަކްސާގެ ވެރިކަމުގެ ދުވަސްވަރު ހިންގާފައިވާ ކަމަށް ބުނާ ހަނގުރާމައިގެ ޖަރީތައް ތަހުގީގު ނުކުރައްވާނެ ކަމަށް ރިޔާސީ ކެންޑިޑޭޓް ގޯޓާބޭ ރާޖަޕަކްސާ ވިދާޅުވެއްޖެ އެވެ.

މަހިންދާ ރާޖަޕަކްސާގެ ވެރިކަމުގައި، ލަންކާގެ ހަނގުރާމަ ނިމުމަކަށް ގެނައި އިރު، ޑިފެންސް ސެކްރެޓަރީގެ މަގާމުގައި ހުންނެވީ ގޯޓާބޭ އެވެ. ތަމަޅަ ޓައިގަރުންގެ މައްޗަށް ކާމިޔާބު ހޯދި ދުވަސްވަރު އާއްމުންގެ 40،000 މީހުން މަރާފައިވާ ކަމަށް ލަންކާ ސިފައިންގެ މައްޗަށް ތުހުމަތުކޮށްފައިވެ އެވެ.

ރާޖަޕަކްސާ އަށް ފަހު ވެރިކަމަށް އައި ސަރުކާރުން ވަނީ ހަނގުރާމައިގެ ޖަރީމާތަކުގެ މިނިވަން ތަހުގީގެއް ހިންގާނެ ކަމަށް އދ.ގެ އިންސާނީ ހައްގުތަކާ ބެހޭ ކޮމިޝަނަށް އަންގައިފަ އެވެ. ނަމަވެސް ތަހުގީގު ކޮމިޓީ އަދި މިހާތަނަށް އުފައްދައިފައެއް ނުވެ އެވެ.

ބޭބޭފުޅު މަހިންދާ ރާޖަޕަކްސާއާ އެކު ނޫސްވެރިންނާ ބައްދަލު ކުރައްވައި ގޯޓާބޭ އިއްޔެ ވިދާޅުވީ އިންސާނީ ހައްގުތަކާ ބެހޭ ކޮމިޝަނަށް ކުރީގެ ސަރުކާރުން ވައުދުވެފައިވާ ގޮތަށް އެ މައްސަލަތައް، އޭނާ އިންތިޚާބު ވެއްޖެ ނަމަ ނުބަލާނެ ކަމަށެވެ. އަދި ވިދާޅުވީ ރައްޔިތުން ބޭނުން ވަނީ ކުރިއަށް ދާން ކަމަށެވެ.

ހަނގުރާމައިގެ ދުވަސްވަރު ލަންކާ ސިފައިން ހިންގާފައިވާ އިންސާނިއްޔަތާ ޚިލާފު ޖަރީމާތަކާ ގުޅޭ ގޮތުން އޭއެފްޕީން ސުވާލު ކުރުމުން ގޯޓާބޭ ވަނީ މާޒީގެ ވާހަކަ އަބަދު ދައްކަނީ ކީއްވެތޯ އައްސަވައިފަ އެވެ.

"މާޒީގެ ކަންތައް ބާއްވާފައި ކުރިމަގާ ގުޅޭ ގޮތުން ސުވާލު ކުރައްވާ،" އުމުރުން 70 އަހަރުގެ ގޯޓާބޭ ވިދާޅުވި އެވެ. "އަޅުގަނޑު މިއުޅެނީ ސްރީ ލަންކާގެ ކުރިމަގުގެ ރައީސް އަށް ވާން. ކުރިމަގަށް ސަމާލުކަން ދީފި ނަމަ މާރަނގަޅު ވާނެ."

ގޯޓާބޭ ވިދާޅުވީ ތަމަޅައިން ވެސް ބޭނުން ވަނީ މާޒީގެ ވާހަކަތަކަށް ވުރެ ބޮޑަށް ވަޒީފާ އާއި ތައުލީމުގެ ފުރުސަތުތަކާއި އުމްރާނީ ތަރައްގީ ކަމަށެވެ.

ރާޖަޕަކްސާ ވިދާޅުވީ ހަނގުރާމައިގެ ފަހު ދުވަސްވަރު އާއްމުންގެ މީހުން ސަރުކާރު ސިފައިންގެ ހަމަލާތަކުގައި މަރާފައި ނުވާނެ ކަމަށެވެ. އަދި އިންސާނީ އައްޑަނައެއްގެ ގޮތުގައި އާއްމުން ބޭނުން ކުރީ ތަމަޅަ ޓައިގަރުން ކަމަށް ވެސް ވިދާޅުވި އެވެ.

ލަންކާގައި 1972-2009 އަށް ކުރި ދާޚިލީ ހަނގުރާމައިގައި ލައްކައެއްހާ މީހުން ވަނީ މަރުވެފަ އެވެ.

ހަނގުރާމައިގެ ޖަރީމާތައް ތަހުގީގު ނުކުރުމުން ރާޖަޕަކްސާގެ ސަރުކާރާ ދެކޮޅަށް ބައިނަލްއަގުވާމީ ގޮތުން ދަތިކުރުމުގެ ފިޔަވަޅު ނާޅައި ދިޔައީ ކިރިޔާ އެވެ. ފިޔަވަޅުތައް ނާޅައި އުޅެނިކޮށް ޖެނުއަރީ 2015 ގެ އިންތިޚާބުގައި ރާޖަޕަކްސާ އަށް ވަނީ ނާކާމިޔާބުވެވަޑައިގެންފަ އެވެ.

އަންނަ މަހު 16 ވަނަ ދުވަހު ލަންކާގައި ބާއްވާ ރިޔާސީ އިންތިޚާބުގައި 35 ކެންޑިޑޭޓުން ވާދަކުރެ އެވެ. ވޯޓު ލުމުގެ ހައްގު ލިބިފައިވާ މީހުންގެ އަދަދަކީ 16 މިލިއަނެވެ.