އެމްޑަބްލިއުއެސްސީން ހުޅުމާލޭގައި އިތުރު ފެން ޕްލާންޓެއް ބަހައްޓައިފި

އެމްޑަބްލިއުއެސްސީގެ ހުޅުމާލޭ އޮޕަރޭޝަން ސެންޓަރުގައި އިތުރު ފެން ޕްލާންޓެއް ބަހައްޓައިފި އެވެ.

އެމްޑަބްލިއުއެސްސީން ބުނީ އެ ކުންފުނިން ބެހެއްޓި މި ފެން ޕްލާންޓުން ދުވާލަކު 3،000 ޓަނުގެ ފެން އުފެއްދޭނެ ކަމަށެވެ. އެހެންކަމުން ހުޅުމާލޭގައި ކުރިން ބެހެއްޓި ފެން ޕްލާންޓާ އެކު ދުވާލަކަށް 7،500 ޓަނުގެ ފެން އުފެއްދޭނެކަމަށް އެ ކުންފުނިން ބުންޏެވެ.

ހުޅުމާލޭގައި ހުންނަ އޮޕްރޭޝަން ސެންޓަރުގެ މަސައްކަތް ފުޅާ ކުރުމަށް އިތުރު މަސައްކަތްތައް ވެސް އެމްޑަބްލިއުއެސްސީން އަންނަނީ ކުރަމުންނެވެ. އެގޮތުން މިހާރުގެ ޕްލާންޓުތައް އަޕްގްރޭޑް ކުރުމުގެ މަސައްކަތް ކުރަމުން އަންނަ ކަމަށް އެ ކުންފުނިން ބުންޏެވެ.

މީގެ އިތުރުން މި އަހަރުގެ ފަހުކޮޅު 3،000 ޓަނުގެ ފެން ޕްލާންޓަކާއި 10،000 ޓަނުގެ ފެން ރައްކާކުރާނެ ތާނގީއެއް ހުޅުމާލޭގައި ބަހައްޓާނެ ކަމަށް ވެސް އެމްޑަބްލިއުއެސްސީން ބުންޏެވެ.

އެމްޑަބްލިއުއެސްސީން ބުނީ ހުޅުމާލޭގައި އަލަށް ބެހެއްޓި ފެން ޕްލާންޓުގެ ސަބަބުން ހުޅުމާލޭގެ ރައްޔިތުންނަށް ރައްކާތެރި ސާފު ބޯފެން ދެމެހެއްޓެނެވި ގޮތެއްގައި ފޯރުކޮށްދިނުމުގެ ގާބިލްކަން ލިިބިފައިވާ ކަމަށެވެ.