މިފްކޯ އަށް މިހާތަނަށް ބިލިއަން ރުފިޔާގެ ގެއްލުންވި: އަމްރު

މިފްކޯއަށް މިދިޔަ އަހަރުތަކުގައި ބިލިއަނެއްހާ ރުފިޔާގެ ގެއްލުން ވެފައިވާ އިރު ފައިދާ ލިބޭ ކުންފުންޏަކަށް އެތަން ބަދަލުކުރެވޭނީ ބާނާ ހުރިހާ މަހެއް ބޭނުންކުރެވިގެން ކަމަށް އެސްޓީއޯގެ މެނޭޖިން ޑިރެކްޓަރު ހުސައިން އަމްރު އިއްޔެ ވިދާޅުވެއްޖެ އެވެ.

ރާއްޖޭގެ މަސްވެރިކަން ތިޔާގިވެ، ބާނާ މަސް އިތުރުވި ދަނޑިވަޅުގައި، މަސްވެރިން ބޭނުންވާ ހަލުވި މިނުގައި ކިރޭނެ ފުރުސަތު ކުޑަވެ، ޝަކުވާ ބޮޑުވެފައި ވަނިކޮށް، ނޫސްވެރިންނާ އެކު ފެލިވަރަށް ކުރެއްވި ދަތުރުގައި އަމްރު ވިދާޅުވީ ހާލަތުގެ ގޮތުން ނުއަގުގައި މިފްކޯ އިން ބޭރަށް މަސް ވިއްކާ ކަމަށެވެ.

އޭގެ ތަފުސީލު ދެއްވަމުން އޭނާ ވިދާޅުވި ގޮތުގައި މިފްކޯއިން ދުވާލަކަށް އެވްރެޖްކޮށް 150 ޓަނު މަސް ގަތަސް ފެކްޓަރީގައި ޕްރޮސެސްކުރެވެނީ އެންމެ 50 ޓަނެވެ. ބާކީވާ 100 ޓަނު، ޓަނަކުން 400 ޑޮލަރު ގެއްލުވާ ގޮތަށް ވިއްކަނީ ތައިލެންޑަށް ކަމަށް އޭނާ ވިދާޅުވި އެވެ.

"ރާއްޖޭގައި އަޅުގަނޑުމެން ބަންދުކުރާ މަހަށް ދައްކާ އަގު ބޮޑު. ރާއްޖެއިން ތައިލެންޑަށް މަސް ވިއްކާލީމަ، ތައިލެންޑް ފެކްޓްރީތަކުން ދަޅުގައި އެ މަސް ބަންދުކުރަނީ. އަދި ރާއްޖޭގެ މަހުގެ ގޮތުގައި ވިއްކަނީ،" އަމްރު ވިދާޅުވި އެވެ.

އެ ފެކްޓަރީތަކުން ވެސް ދަޅު މަސް ވިއްކަނީ، އަމްރު ވިދާޅުވި ގޮތުގައި، ޔޫރަޕްގެ ކުންފުނިތަކަށެވެ. އެކަމަކު ރާއްޖެ އަށް ވުރެ ހެޔޮ އަގުގައި މަސް ބަންދުކުރާ ކުންފުނިތަކާ ވާދަކުރަން މިފްކޯއަށް އުނދަގޫ ކަމަށް އޭނާ ވިދާޅުވި އެވެ.

އަމްރު ވިދާޅުވީ މަސްވެރިން ބާނާ ހުރިހާ މަހެއް ކިރުމުގައި ދިމާވާ ދަތިތަކަށް އަވަސް ހައްލެއް ބޭނުންވާ ކަމަށެވެ. އެކަމަށް ސަރުކާރުން އަވަސް ފިޔަވަޅުތަކެއް އަޅާ ކަމަށް ވެސް އޭނާ ވިދާޅުވި އެވެ.

"ހަގީގަތަކީ މަސް ކިރާ ބޯޓެއްގެ ކެޕޭސިޓީއަކީ 30 ޓަނު. މިއަދު [އެންމެ] މަސް ދޯންޏަކުން އެބަ ގެނޭ 30 ޓަނު،" އަމްރު ވިދާޅުވި އެވެ.

އެސްޓީއޯގެ ސަބްސިޑަރީ ކުންފުންޏަކަށް މިފްކޯ ބަދަލުކުރީ، ކުރީގެ ރައީސް އަބްދުﷲ ޔާމީންގެ ވެރިކަމުގައި 2016 ގަ އެވެ. އެކުންފުނި އިނދަޖެހި ބަނގުރޫޓުވުމުގެ ބިރާ އެކު ސަރުކާރުން އޭރު ވަނީ މިފްކޯގެ 300 މިލިއަން ރުފިޔާގެ ދަރަންޏާ ވެސް ހަވާލުވެފަ އެވެ.

އޭގެ ފަހުން އެސްޓީއޯގެ ދަށުން ސަރުކާރުގެ މަސް ކުންފުނި ހިންގަމުން އަންނަތާ ތިން އަހަރު ވަނީ އެވެ.