ގެއްލުން ލިބުނު ރަށްތަކުގެ ހާލަތު މިދަނީ ބަލަމުން: ޑިޒާސްޓާ

މިހާރު ރާއްޖެއަށް ކުރަމުންދާ ވިއްސާރާގައި ގެއްލުން ލިބުނު ރަށްތަކުގެ ހާލަތު މޮނީޓާ ކުރަމުންދާ ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފި އެވެ.

މިހާރު ކުރަމުންދާ ވިއްސާރާގައި ދެކުނުގެ އަތޮޅުތަކުގެ ބައެއް ރަށްރަށަށް ވަނީ ގެއްލުންތައް ލިބިފަ އެވެ. އެގޮތުން ފުރާޅު އެއްލާލުމުގެ ހާދިސާތަކާއި ގަސްތައް ވެއްޓުމުގެ ހާދިސާތައް ވަނީ ހިނގައިފަ އެވެ.

އެންޑީއެމްއޭ އިން ބުނީ ގެއްލުން ލިބުނު ރަށްރަށުގެ ހާލަތު އެ އޮތޯރިޓީން މޮނީޓާ ކުރަމުންދާ ކަމަށާއި ފުރާޅު އެއްލާލި ގެތަކުގެ ފުރާޅު އެޅުމުގެ މަސައްކަތް ކައުންސިލްތަކާއި ފުލުހުންނާއި ސިފައިން ގުޅިގެން ކުރަމުންދާ ކަމަށެވެ. މިހާތަނަށް އައްޑޫ ސިޓީގެ 24 ގެއަކާއި ފުވައްމުލަކު ސިޓީގެ 15 ގެއެއްގެ ފުރާޅަށް އެކިވަރުގެ ގެއްލުންތައް ލިބިފައިވާ ކަމަށް އެންޑީއެމްއޭ އިން ބުންޏެވެ.

މީޓިއޮރޮލޮޖިކަލް ސާވިސް (މެޓް އޮފީސް) އިން ބުނެފައިވާ ގޮތުގައި މިއަދާއި މާދަމާ ވެސް ރާއްޖޭގެ ބޮޑު ބަޔަކަށް ވިއްސާރަކޮށް، ގުގުރުމާ އެކު ބޯކޮޮށް ވާރެ ވެހޭނެ ކަމަށް ލަފާ ކުރެވެ އެވެ. އަދި ދެކުނު އަތޮޅުތަކަށް ވައި ގަދަވެ، ކަނޑުތައް ވެސް ގަދަވާނެ ކަމަށް ލަފާ ކުރެވޭތީ މޫސުމަށް ސަމާލުވުމަށް މެޓް އޮފީހުން އެދެ އެވެ.