ބެންކޮކުގައި ބޮންތަކެއް ގޮއްވާލައި، ހަތަރު މީހުން ޒަޚަމް

ބެންކޮކް (އޮގަސްޓް 2) - ތައިލެންޑުގެ ވެރިރަށް ބެންކޮކުގައި ބޮންތަކެއް ގޮއްވާލައި ހަތަރު މީހުން މިއަދު ޒަޚަމްކޮށްލައިފި އެވެ.

ބެންކޮކުގެ އެކި ހިސާބުތަކުގައި ބޮންތަކެއް ގޮއްވާލާފައި މި ވަނީ އާސިއާންގެ ގައުމުތަކުގެ ޚާރިޖީ ވަޒީރުންގެ ބައްދަލުވުން ކުރިއަށް ދަނިކޮށެވެ. އާާސިއާންގެ ސަމިޓަަށް އެމެރިކާގެ ޚާރިޖީ ވަޒީރު މައިކް ޕޮމްޕެއޯ ވެސް އުޅުއްވަނީ ބެންކޮކަށް ވަޑައިގެންނެވެ.

ތައިލެންޑުގެ ބޮޑު ވަޒީރު ޕްރަޔުތު ޗަން-އޮ-ޗާ ވިދަޅުވީ ބޮމުގެ ހަމަލާ ދިނީ ހަމަނުޖެހުން ހިންގާ، ގައުމުގެ ހައިބަތު ނަގާލަން ބޭނުންވާ ބައެއް ކަމަށެވެ. އަދި ރައްޔިތުން ބިރު ނުގަތުމަށާއި ގައުމުގެ ހުރިހާ ހިސާބެއްގައި ސަލާމަތީ ފިޔަވަޅުތައް ވަރުގަދަކޮށްފައިވާ ކަމަށް އޭނާ ވިދާޅުވި އެވެ.

ޓޭބަލް ޓެނިސް ބޯޅައެއްގެ ސައިޒުގެ ބޮންތައް ގޮއްވާލި ނަމަވެސް ސަމިޓް ބާއްވާ ސަރަހައްދާ ކައިރީގައި އެއްވެސް ހަމަލާއެއް ދީފައެއް ނުވެ އެވެ.

ތައިލެންޑުގައި އެންމެ ފަހުން އާސިއާން ސަމިޓް ބޭއްވި 2009 ވަނަ އަހަރު ވެސް ވަނީ ހަމަނުޖެހުންތަކެއް ހިންގައިފަ އެވެ.