ގުރައިދޫ ކޯޓުގެ މެޖިސްޓްރޭޓް ކުއްލިގޮތަކަށް އަވަހާރަވެއްޖެ

ކ. ކުރައިދޫ ކޯޓުގެ އިސް މެޖިސްޓްރޭޓް، އެރަށު ކުދިރުވާގޭ އަލްއުސްތާޒް މުހައްމަދު މޫސާ ކުއްލި ގޮތަކަށް މިއަދު ހެނދުނު އަވަހާރަވެއްޖެ އެވެ.

މެޖިސްޓްރޭޓް ކަމުގައި 29 އަހަރު ހޭދަކުރެއްވި މުހައްމަދު މޫސާއަކީ 34 އަަހަރަށް ވުރެ ދިގު މުއްދަތެއްގައި ދައުލަތަށް ހިދުމަތް ކުރެއްވި ބޭފުޅެކެވެ. އޭނާ ދައުލަތަށް ހިދުމަތް ކުރައްވަން ފެއްޓެވީ 1984 ވަނަ އަހަރު އެވެ. އޭނާ އަދާކުރެއްވި މަގާމުތަކުގެ ތެރޭގައި މެޖިސްޓްރޭޓްކަމުގެ އިތުރުން ފުލުސް ކޯޓްގެ ކާތިބުކަމާއި ރ. ކަނދޮޅުދޫ ކަތީބުކަން ހިމެނެ އެވެ.

އުމުރުފުޅުން 55 އަހަރުގައި އޭނާ އަވަހާރަވި އިރު އަނބިކަނބަލަކާއި ދެ ބޭފުޅުން އެބަތިއްބެވި އެވެ.

މުހައްމަދު މޫސާ އަވަހާރުވުމުގެ ހިތާމައިގައި މާދަމާ އިން ފެށިގެން ތިން ދުވަސް ވަންދެން ރާއްޖޭގެ ހުރިހާ ކޯޓްތަކެއްގެ ދިދަ ބައިދަނޑި އަށް ތިރިކުރަން އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ ވަނީ ނިންމަވައިފަ އެވެ.