ޕެންޝަން ފަންޑުން އެއްވެސް ކަމެއް ކުރަން ވާނީ ދިރާސާކޮށްގެން: މަނިކު

މޯލްޑިވްސް ރިޓަޔާމެންޓް ޕެންޝަން ސްކީމުން އެއްވެސް ކަމެއް ކުރަން ވާނީ ޓެކްނިކަލްކޮށް ވިސްނައި ދިރާސާކޮށްގެން ކަމަށް ޕެންޝަން އެޑްމިނިސްޓްރޭޝަން އޮފީހުގެ ސީއީއޯ މުހައްމަދު ހުސައިން މަނިކު މިއަދު ވިދާޅުވެއްޖެ އެވެ.

ރައްޔިތުންގެ އިޖުތިމާއީ ކޮމިޓީގައި މަނިކު ވިދާޅުވީ ދިރާސާ ނުކޮށް ކުއްލިއަކަށް ކަންތައްތައް ކުރުމުން ފަހުން އޭގެ ބުރަ ދައުލަތުން އުފުލަން ޖެހޭނެ ކަމަށެވެ. ނަމަވެސް އޭނާ ވިދާޅުވީ މީހުން ހައްޖަށް ދާން ޕެންޝަން ފަންޑުން ފައިސާ ދޫކުރަން ސަރުކާރުން މިހާރު ނިންމާފައިވާ ގޮތަށް އަމަލު ކުރުމުން ޕެންޝަން ފަންޑަށް އެހާ ބޮޑު އަސަރެއް ނުކުރާނެ ކަމަށެވެ.

"އެކަމަކު ޖުމްލަ ގޮތެއްގައި މި ފަންޑާ ދޭތެރޭގައި ވިސްނާ ވިސްނުން މިމޭރުމުން ބައްޓަން ކޮށްދެއްވުމަކީ އަޅުގަނޑުމެން އެދޭ ކަމެއް. މިއީ ކޮންޒަމްޕްޝަނަކަށް ނޫނީއްޔާ ބޭނުން ވުމުން[ ބޭނުން ކުރަން] ހުރި ފަންޑެއް ނޫނޭ މީ. ވަރަށް ދިގު މުއްދަތަކަށް ވިސްނައިގެން 65 އަހަރު ވުމުގެ ކުރިން ވަކި ކޮންޑިޝަންސްތަކެއް ފުރިހަމަކޮށް ޕެންޝަނެއްގެ ގޮތުގައި [ދޭން ހުރި ފަންޑެކޭ]،" މަނިކު ވިދާޅުވި އެވެ.

ނަމަވެސް ރިޓަޔާމެންޓް ޕެންޝަން ފަންޑުގެ މަފްހޫމް ނުގެއްލޭ ގޮތަށް މީހުންނަށް އެ ފަންޑުގެ ބޭނުން ކުރެވޭނެ ގޮތް ހެދުމަށް ޕެންޝަން އޮފީހުން ވެސް ބޭނުންވާ ކަމެއް ކަމަށް އޭނާ ވިދާޅުވި އެވެ. އެގޮތުން ކުރާ އެއް މަސައްކަތަކީ އޭނާ ވިދާޅުވި ގޮތުގައި ގެދޮރު ގަތުމަށް ބޭންކް ގެރެންޓީ ދިނުމުގެ ކަންތައް މިހާރަށް ވުރެ ފުޅާ ކުރުމެވެ.

"އެެއް ކަމަކީ މިހާރު އެނގިވަޑައިގަންނަވާނެ ހައުސިން ސްކީމަށް އަޅުގަނޑުމެން މިހާރު ވެސް ކޯޕަރޭޓްކޮށްފަ ވެއްޖެ މަފްހޫމް ނުގެއްލޭ ގޮތަށް އެމީހެއްގެ ފަންޑުގަ ހުރި އެއްޗެއް ބޭނުން ކޮށްގެން ގެދޮރު ގަތުމުގެ ޕްރޮގްރާމަކަށް. އެހެންވީމާ އޭ ވެސް އަޅުގަނޑުމެން އެކްސްޕޭންޑް ކުރުމުގެ ގޮތުން އެ ވިސްނުމުގައި މިހާރު ދިރާސާތަކެއް ކުރަމުން މި ދަނީ،" އޭނާ ވިދާޅުވި އެވެ.

މަނިކު ވިދާޅުވީ ގެދޮރު ގަތުމަށް ޕެންޝަން ފަންޑުން އެހީތެރިވުން ހަމައެކަނި މާލެ ސަރަހައްދަށް ހާއްސަކުރުމުން ގިނަ ބަޔަކު ޝަކުވާކުރަމުންދާ ކަމަށެވެ. އަދި އެފަދަ ޝަކުވާ އަށް އިޖާބަދޭން ޖެހޭނެ ކަމަށް ގަބޫލުކުރައްވާ ކަމަށް ވެސް އޭނާ ވިދާޅުވި އެވެ.

ޕެންޝަން ފަންޑުގައި މިހާރު 13 ބިލިޔަނަށް ވުރެ ގިނަ ރުފިޔާ ހުރި އިރު އެ ފަންޑުން ޕެންޝަން ފައިސާ މަހުން މަހަށް ދެމުން އަންނަނީ 1000 މީހަކަށެވެ. އެމީހުންނަށް މަހަކު ހަރަދުވަނީ އަށް މިލިޔަން ރުފިޔާ އެވެ. ޕެންޝަން ފަންޑަށް މަހަކު 90 މިލިޔަން ރުފިޔާ ޖަމާވެ އެވެ. މަނިކު ވިދާޅުވިގޮތުގައި އެ ފަންޑު އިތުރުވަމުން އަންނަނީ ރާއްޖޭގެ ޖީޑީޕީއަށް ވުރެ އަވަހަށެވެ.

އެހާ ވަރަށް ފަންޑަށް ފައިސާ އިތުރުވާ އިރު އެ ފައިސާ އިން އިންވެސްޓް ކުރެވެން އޮތް ދާއިރާ ހަނިވުމަކީ ގޮންޖެހުމެއް ކަމަށް ވެސް އޭނާ ވިދާޅުވި އެވެ.