ކޮންމެ ދުވަހެއްގެ ހެނދުނު 8-2 އަށް ހަތަރު ފުރޮޅުލީ އުޅަނދުތަކަށް މަޖީދީ މަގު ވަންވޭ ކުރަނީ

މުދާ އުފުލާ ވަގުތުތަކާއި ސްކޫލްތައް ނިމޭ ގަޑިއާ ދިމާވެ، މާލޭގެ މަޖީދީ މަގުގެ ޓްރެފިކަށް ބާރު ބޮޑުވާތީ މާދަމާ އިން ފެށިގެން އެ މަގުގައި ކޮންމެ ދުވަހެއްގެ ހެނދުނު 8 ން މެންދުރު 2 އަށް ހަތަރު ފުރޮޅުލީ އުޅަނދު ދުއްވޭނީ ހަމައެކަނި ހުޅަނގުން އިރަށް ކަމަށް ފުލުހުން މިއަދު ހަމަޖައްސައިފި އެވެ.

އެ ނިންމުމާ އެކު، ރޯދަ މަސް ނިމެންދެން، ހެނދުނު 8 ން މެންދުރު 2 އަށް، މާލޭގެ އެންމެ ބާރު ބޮޑު މަގުގައި ހަތަރު ފުރޮޅުލީ އުޅަނދު ދުއްވޭނީ މާފަންނު ރަސްފަންނުން ފެށިގެން ހެންވޭރު އާޓިފިޝަލް ބީޗާ ވީ ކޮޅަށެވެ.

މި ރޯދަ މަހު މާލޭގައި މުދާ އުފުލަން ކަނޑައަޅާފައި ވަނީ ހެނދުނު 9:00 އިން މެންދުރު ފަހު 3:00 އަށް އަދި ރޭގަނޑު 9:00 އިން އަނެއް ދުވަހުގެ ހެނދުނު 6:00 އާ ދެމެދުގެ ވަގުތުތަކުގަ އެވެ.

މާލޭގެ މަގުތަކުގެ ރައްކާތެރިކަމަށްޓަކައި މި ރޯދަ މަހު ފުލުހުން އަންނަނީ ހާއްސަ އޮޕަރޭޝަންތަކެއް ހިންގަމުންނެވެ. އެގޮތުން ފުލުހުން މިހާރު ވަނީ މާލޭގައި ޓްރެފިކް ތޮއްޖެހޭ 15 ސަރަހައްދެއް ފާހަގަކޮށް، އެ ތަންތަން ބަލަހައްޓަން ފަށައިފަ އެވެ.