އައިލެންޑް އޭވިއޭޝަނުން ސިންގަލް ޔޫސް ޕްލާސްޓިކް ހުއްޓާލަނީ

އެއް ފަހަރު ބޭނުންކޮށް އުކާލާ ޕްލާސްޓިކް ބޭނުން ކުރުން އެއްކޮށް ހުއްޓާލުމުގެ މަސައްކަތް އައިލެންޑް އޭވިއޭޝަންގެ 19 ވަނަ އަހަރީ ދުވަހާ ދިމާކޮށް އެކުންފުނިން ފަށައިފި އެވެ.

އައިލެންޑް އޭވިއޭޝަންގެ ހެޑް އޮފީހުގައި ބޭއްވި ރަސްމިއްޔާތުގައި އެ ކުންފުނީގެ ޑެޕިއުޓީ މެނޭޖިން ޑިރެކްޓަރު އައިޝަތު ޖެނިފާ ވިދާޅުވީ، އެއްފަހަރު ބޭނުންކުރާ ޕްލާސްޓިކް ހުއްޓާލަން އަމާޒު ހިފާފައި ވަނީ 2020 ވަނަ އަހަރު އަންނަންވާ އިރަށް ކަމަށެވެ.

އެގޮތުން އެކުންފުނީގެ ކޮންމެ މުވައްޒަފަކަށް، ފެން އަޅާ ރީޔޫސަބަލް ފުޅި މިއަދު ހަދިޔާކޮށްފައިވާ އިރު ބޯޑު ރޫމުގައި ބިއްލޫރި ފުޅި ބޭނުންކުރަން ފަށަން ނިންމާފައިވާ ކަމަށް އޭނާ ވިދާޅުވި އެވެ.

"އަޅުގަނޑުމެންގެ ފްލައިޓުތަކުގައި އިންޓަނޭޝަނަލް ދަތުރުތައް މި ކުރާ ޑާކާއިން މާލެއަށް އަދި ޑާކާއިން ޗެންނާއީއަށް މިކުރާ ދަތުރުތަކުގައި އަޅުގަނޑުމެން ދެން ބޭނުން ކުރާނީ ވުޑަން ކަޓްލަރީތައް. މީގެ ކުރިން ބޭނުން ކުރަނީ ޕްލާސްޓިކް ކަޓްލަރީ،" އޭނާ ވިދާޅުވި އެވެ.

މިއީ އަދި ފެށުމެއް ކަމަށާއި ކުރިއަށް އޮތްތަނުގައި މޯލްޑިވިއަންގެ ހުރިހާ ދަތުރުތަކެއްގައި ވެސް މިފަދަ ޕްލާސްޓިކް އެއްކޮށް ހުއްޓާލެވޭނެ ކަަމަށް ޖެނިފާ ވިދާޅުވި އެވެ.

ސަރުކާރުގެ އެކި އިދާރާތަކުންނާއި އަމިއްލަ ބައެއް ކުންފުނިތަކުން ވެސް އަންނަނީ އެއްފަހަރު ބޭނުންކޮށް އުކާލާ ޕްލާސްޓިކް ބޭނުންކުރުން ހުއްޓާލަމުންނެވެ.