އައްޑޫގައި އަލަށް ހުޅުވާ އިސްމެހެލާހެރަ ރިސޯޓަށް މުވައްޒަފުން ހޯދަނީ

އައްޑޫގައި ތަރައްގީކުރަމުން އަންނަ ތިން ވަނަ ރިސޯޓް އިސްމެހެލާހެރަ އަށް މުވައްޒަފުން ހޯދުމުގެ މަސައްކަތް ފަށައިފި އެވެ.

ނިމުމަކާ ގާތަށް މިހާރު ގޮސްފައިވާ ރިސޯޓްގެ އެކި ދާއިރާތަކަށް ބޭނުންވާ މުވައްޒަފުން ހޯދުމަށް އައްޑު އާއި ފުވައްމުލަކުގައި އޯޕަން ޑޭތަކެއް ކުރިއަށް ގެންދަން ވަނީ ނިންމައިފަ އެވެ. މުވައްޒަފުން ހޯދާ ދާއިރާތަކުގެ ތެރޭގައި ރިސެޕްޝަން، ވޯޓަ ސްޕޯޓްސް، އެފްއެންޑްބީ، ޑައިވިން، ޖިމް، ކްލިނިކް އަދި ގިފްޓް ޝޮފް ފަދަ ދާއިރާތައް ހިމެނެ އެވެ.

މީދޫ ކައިރީގައި އޮންނަ އިސްމެހެލާހެރައިގައި ސައުތު ޕާމް ރިސޯޓް މޯލްޑިވްސްގެ ނަމުގައި ތަރައްގީކުރާ ރިސޯޓަށް އެތަން ތަރައްގީކުރާ ކުންފުނި ސައުތު ޕާތުން ކުރިއަށް ގެންދާ އޯޕަންޑޭތަކުގެ ތެރެއިން އައްޑޫގެ އޯޕަންޑޭތައް ކުރިއަށް ދާނީ މި މަހުގެ 29 އާއި 30 އަދި އަންނަ މަހުގެ 2 ގަ އެވެ.

މި މަހުގެ 29 ވަނަ ދުވަހު ހުޅުދޫ ސްކޫލްގައި އޯޕަންޑޭ ބޭއްވުމަށް ފަހު، 30 ވަނަ ދުވަހު ޝަރަފުއްދީން ސްކޫލްގައި އަދި އެޕްރީލް 2 ގައި ފޭދޫގައި ހުންނަ ސައުތު ޕާމްގެ އޮފީހުގައި އޯޕަންޑޭ ކުރިއަށް ގެންދާނެ އެވެ.

ފުވައްމުލަކުގައި އޯޕަންޑޭ ކުރިއަށް ދާނީ އަންނަ މަހުގެ 1 ގައި އެ ސިޓީގެ ޔޫތު ސެންޓަރުގަ އެވެ.

ތަރައްގީ ކުރުމުގެ އަމަލީ މަސައްކަތް 2017 ގައި ފެށި އިސްމެހެލާހެރައިގެ ފުރަތަމަ ފިޔަވަހީގައި ހަތަރު ތަރީގެ 130 ވިލާ ވަނީ ހަދައިފަ އެވެ. އަދި ދެވަނަ ފޭހުގައި ފަސްތަރީގެ 110 ވިލާ ހަދަން ވަނީ ނިންމައިފަ އެވެ.

މި މަޝްރޫއު އިއުލާން ކުރީ ކުރީގެ ރައީސް އަބްދުﷲ ޔާމީނުގެ ވެރިކަމުގައި އެޕްރީލް 28، 2015 ގަ އެވެ.

އައްޑޫގައި މި ވަގުތު ހިންގަނީ ދެ ރިސޯޓެވެ. އެއީ ޝަންގްރިއްލާ ވިލިގިލި ރިސޯޓް އެންޑް ސްޕާ އާއި ކެނަރީފް (ހެރަތެރަ) އެވެ.

ސައުތު ޕާމް ރިސޯޓް މޯލްޑިވްސް އަށް މުވައްޒަފުން ހޯދި ނަމަވެސް އަދި އެތަން ހުޅުވާނެ ތާރީހެއް ރަސްމީކޮށް އިއުލާނެއް ނުކުރެ އެވެ.