މަރުވެފައިވާ އަނބިމީހާ ކޮނޑަށް ލައިގެން ފިރިހެނަކު 10 ކިލޯ މީޓަރަށް ހިނގައިފި

އިންޑިއާގެ އެންމެ ފަގީރު އެއް ޑިސްޓްރިކްޓް ކަމަށްވާ އޮޑިޝާގައި ފިރިހެނަކު އޭނާގެ މަރުވެފައިވާ އަނބިމީހާގެ ހަށިގަނޑު ހޮސްޕިޓަލުން ގެޔަށް ގެންދަން ކޮނޑަށް ލައިގެން 10 ކިލޯމީޓަރަށް ވުރެ ދުރަށް ހިނގައިފި އެވެ. އޭނާއާ އެކު 12 އަހަރުގެ އަންހެންދަރިފުޅު ރޮމުން ހިނގާފައި އަންނަ މަންޒަރު ވެސް ފެނެ އެވެ.

ދާނާ މާޖީ ކިޔާ މީހާ ބުނި ގޮތުގައި އަނބިމީހާގެ ފުރާނަ ނެތް ހަށިގަނޑު ކޮނޑުގައި އުފުލަން ޖެހުނީ ހޮސްޕިޓަލުން އެމްބިއުލާންސެއް ހަމަޖައްސައި ނުދިނުމުންނެވެ. އަދި ވެހިކަލެއް ކުއްޔަށް ހިފަން ފައިސާ ވެސް ނެތުމުންނެވެ.

ޓީބީ ޖެހިގެން އަންހެނުން މަރުވީ އެމީހުން ދިރިއުޅޭ އަވަށާ 60 ކިލޯމީޓަރު ދުރުގައިވާ ސަރުކާރުގެ ހޮސްޕިޓަލެއްގަ އެވެ.މަރުވި 42 އަހަރުގެ އަނބިމީހާ ގެޔަށް ގެންދަން ހަށިގަނޑު ބެޑްޝީޓަކަށް ލައި އޮޅައިލުމަށް ފަހު ކޮނޑަށް ލައިގެން މާޖީ ދަތުރުފެށީ އެވެ.

"އަހަރެން ހޮސްޕިޓަލުގައި ބުނިން އަހަންނަކީ ވަރަށް ބޮޑު ފަގީރެކޭ. ހަށިގަނޑު ގެންދާނެ ވެހިކަލެއް އަހަންނަކަށް ނުހޯދޭނޭ. ނަމަވެސް އެމީހުން އަހަންނަށް އެހީތެރިކަމެއް ނުދިން،" އެންޑީޓީވީގެ ނޫސްވެރިންނާ ވާހަކަ ދައްކަމުން މާޖީ ބުނެފައިވެ އެވެ.

ނޫސްވެރިންނަށް އެ ފިރިހެންމީހާ ފެނިފައި ވަނީ އަނބިމީހާގެ މަރުވެފައިވާ ހަށިގަނޑު ކޮނޑަށް ލައިގެން 10 ވަރަކަށް ކިލޯ މީޓަރަށް ހިނގި ފަހުންނެވެ. ނޫސްވެރިން ވަނީ އެ މީހާ އަށް އެމްބިއުލާންސެއް ހޯދައިދީފަ އެވެ.ނަމަވެސް ހޮސްޕިޓަލުން ބުނަނީ ފިރިހެން މީހާ ދޮގު ހަދަނީ ކަމަށާއި ރޭގަނޑު ދަންވަރުގެ ވަގުތުގައި މާޖީ އޭނާގެ އަންހެނުން ހަށިގަނޑު ވަގަށް ގެންދިޔައީ ކަމަށެވެ. އޭނާ އެހީތެރިކަމަށް އެދުނު ނަމަ އެހީތެރިކަން ފޯރުކޮށްދޭނެ ކަމަށް ވެސް ބުނެފައިވެ އެވެ.