ސައުދީ ވަލީ އަހުދަށް ރަން ޕްލޭޓްލީ ބަޑިއެއް ހަދިޔާކޮށްފި

އިސްލާމްއާބާދު (ފެބްރުއަރީ 18) - ސައުދީ އަރަބިއާގެ ވަލީ އަހުދު ޕްރިންސް މުހައްމަދު ބިން ސަލްމާނަށް ޕާކިސްތާނުގެ ސެނެޓުގެ ވަފުދަކުން ރަން ޕްލޭޓްލީ ބަޑިއެއް މިއަދު ހަދިޔާކޮށްފި އެވެ.

ދެ ދުވަހުގެ ދަތުރުފުޅެއްގައި ޕާކިސްތާނަށް ވަޑައިގެންނެވި ޕްރިންސް މުހައްމަދަށް ބަޑި ހަވާލުކޮށްދެއްވީ ސެނެޓުގެ ޗެއާމަން ސާދިގު ސަންޖްރާނީ އެވެ. ބަޑިއާ އެކު ވަނީ ޕްރިންސްގެ ފޮޓޯފުޅެއް ވެސް ހަދިޔާކޮށްފަ އެވެ.

ޕްރިންސް މުހައްމަދަށް ޕާކިސްތާނުން މިއަދު ވަނީ އެ ގައުމުގެ އެންމެ މަތީ މަދަނީ ޝަރަފް ވެސް އަރުވައިފަ އެވެ. ނިޝާނީ ޕާކިސްތާނުގެ ލަގަބް ޕްރިންސް މުހައްމަދަށް އެރުވީ ޕާކިސްތާނުގެ ރައީސް ޑރ. އާރިފް އަލްވީ އެވެ. ޕްރިންސް މުހައްމަދަށް ޕާކިސްތާނުން މި ޝަރަފް އެރުވީ ދެ ގައުމުގެ ގުޅުން ދެމެހެއްޓުމަށް އެމަނިކުފާން ކުރައްވާ މަސައްކަތުގެ ރަމްޒެއްގެ ގޮތުންނެވެ.

ޕްރިންސް މުހައްމަދުގެ ދަތުރުގައި ދެ ގައުމުން ވަނީ 20 ބިލިއަން ޑޮލަރުގެ އެއްބަސްވުންތަކުގައި ސޮއިކޮށްފަ އެވެ. ޕާކިސްތާނަށް މިހާރު ދިމާވެފައިވާ މާލީ ދަތި ކަމަށް ހައްލު ހޯދުމުގެ ގޮތުން ސައުދީން މިހާތަނަށް ވަނީ ހަ ބިލިއަން ޑޮލަރުގެ ލޯނު ދީފަ އެވެ.