މަސްވެރިން: މިޔަރު ގިނަވެ، އުނދަގުލަކަށް ވެއްޖެ!

މީގެ އަށް އަހަރު ކުރިން މިޔަރު ބޭނުން ރާއްޖޭގައި މަނާކޮށް ހިމާޔަތްކުރުމުން އޭގެ ރަނގަޅު އަސަރު މިޔަރުގެ އާބާދީއަށް ވަނީ ކޮށްފަ އެވެ. އެކަމަކު މިޔަރު ގިނަވެ އޭގެ އުނދަގޫ މަސްވެރިކަމަށް ފޯރާފައިވާ ކަމުގެ ޝަކުވާ މަސްވެރިން ކުރަން ފަށައިފި އެވެ.

ބައެއް މަސްވެރިން ބުނަނީ އައިންމަތީ މިޔަރު ގިނަވެ، ބާނާ މަސް ކާލުމުގެ އުނދަގޫ ބޮޑު ކަމަށެވެ. އެގޮތުން މަސް އޮޑިއަށް ނަގާ ވަގުތު އޭގެ އެއް ބައި މިޔަރު އޮންނަނީ ކާލައިފައި ކަމަށް، އެ މީހުން ބުނެ އެވެ.

"މިހާރު މިޔަރު އެބަ އޮތް އިންތިހާއަށް. މިޔަރު އައިންތައް. އެކަމަކާ ހުރެ މަސްވެރިކަން ކުރެވޭ ވަރެއް ނޫން،" ކަންނެލީގެ މަސްވެރިކަން ކުރާ މަސްވެރިއަކު ބުންޏެވެ.

އެން ދަމާ ދަލަށް އަރައި ދާ ހަލާކު ކުރުން ފަދަ ކަންކަން ވެސް ގިނަވެފައިވާ މިޔަރުތަކުގެ ސަބަބުން ދިމާވެ އެވެ.

"އެހެރަ ބޮޑެތި މަސް އަރުވާއިރު މިއޮންނަނީ އެއްބުރި ކާލައިފައި. ހަމައެކަނި މަހެއް ނޫން. އެތައް ބުޅިއެއް، ނަނެއް ކަނޑައިފި،" މަސްވެރިޔަކު ކިޔައިދިނެވެ.

ބައެއް މަސްވެރިން ބުނާ ގޮތުގައި މިޔަރުގެ އާބާދީ މިހާރު ބޮޑުވަމުން އަންނަ ގޮތަށް ބަލާއިރު ކުރިއަށް އޮތް ތަނުގައި މޫދަށް އެރި އުޅެން ވެސް ބިރަކަށް ވެދާނެ އެވެ.

މިޔަރުގެ މަސްވެރިކަމަކީ 2010 ވަނަ އަހަރާ ހަމައަށް ރާއްޖޭގައި ވަރަށް ފުޅާކޮށް ކުރަމުން އައި ކަމެކެވެ. މިޔަރުގެ އުރަހަ އާއި ތެޔޮ ވިއްކުން ފަދަ އެތައް ކަމަކުން އާމުދަނީ ހޯދި އެވެ. އެކަމަކު މީގެ އަށް އަހަރު ކުރިން މިޔަރު މަސްވެރިކަން ރާއްޖޭގައި މަނާކުރީ އޭގެ އާބާދީ ނެތި ހިނގައިދާނެ ކަމުގެ ބިރު އޮތުމުންނެވެ.

މިޔަރު ބާނަން ހުއްދަ ދޭކަށް ނުފެނޭ

މަސްމަހާމެހީގެ ތަޖުރިބާކާރެއް ކަމަށް ވާ އަހުމަދު ހާފިޒް ވިދާޅުވީ މަސްވެރިންނަށް މިޔަރުގެ ސަބަބުން ބައެއް ދަތިތަކާ ކުރިމަތި ނަމަވެސް އޭގެ މަސްވެރިކަމަށް އަލުން ހުއްދަ ދިނުން ރަނގަޅު ނޫން ކަމަށެވެ. ރާއްޖެއަކީ ޓޫރިޒަމް ފުޅާވެފައިވާ ގައުމަކަށް ވާއިރު މިޔަރު ގިނަވުމުގެ ފައިދާ އެ އިންޑަސްޓްރީއަށް އޮންނާނެ ކަމަށް ވެސް އޭނާ ވިދާޅުވި އެވެ.

"ޑައިވް ކުރާ ސަރަހައްދުން މިޔަރު ފެންނަލެއް އިތުރު. އޭގެ ސަބަބުން ޑައިވިންނަށް ދާ މީހުންނަށް ރާއްޖޭގެ ކަނޑުގެ ދިރުމުގެ މުއްސަނދިކަން އެނގޭނެ،" ފިޝަރީޒް މިނިސްޓްރީގެ ޑެޕިއުޓީ މިނިސްޓަރުކަން ކުރިން ކުރެއްވި ހާފިޒް ވިދާޅުވި އެވެ.

މެރިން ރިސާޗް ސެންޓަރާ ހަވާލުވެ ދާދި ފަހަކާ ޖެހެންދެން ހުންނެވި، އަދި މިހާރު ފިޝަރީޒް މިނިސްޓްރީގެ ޑިރެކްޓަ ޖެނެރަލް، ޑރ. ޝިހާމް އާދަމް ވިދާޅުވީ މިޔަރަކީ ވަރަށް ލަހުން އޭގެ އާބާދީ ބޮޑުވާ ބާވަތުގެ މަހަކަށް ވާތީ އަދިވެސް އެ މަސް ހިމާޔަތް ކުރަން ޖެހޭ ކަމަށެވެ.

"މިޔަރަކީ ވަރަށް މައިގްރޭޓްވާ ބާވަތެއް. އެއް ހިސާބުން އަނެއް ހިސާބަށް. އެއް ގައުމުން އަނެއް ގައުމަށް ވެސް. އަދި ވިހާ ނިސްބަތް މަދު،" މިޔަރު ހިމާޔަތް ކުރަން ޖެހޭ ސަބަބު ޝިހާމް ވިދާޅުވި އެވެ.

އޭނާ ވިދާޅުވި ގޮތުގައި އާދަޔާ ހިލާފަށް މިޔަރު ގިނަވާކަން ދިރާސާތަކުން ނުދައްކަ އެވެ. އަދި މިޔަރު ގިނަވެ އުނދަގޫ ވެގެން އެހެން ގައުމުތަކުގެ މީހުން ނޫޅޭ ކަމަށް ވެސް އޭނާ ވިދާޅުވި އެވެ.