މަސްވެރިންނަށް މި މަހު 17 މިލިއަން ރުފިޔާ ޖަމާކޮށްފި

މިފްކޯއަށް މަސްކިރި މަސްވެރިންނަށް މި މަހު 17 މިލިއަން ރުފިޔާ ސަރުކާރުން ޖަމާކޮށް ދީފި އެވެ.

މިފްކޯއިން ބުނީ މިދިޔަ މަހު 24 އިން ފެށިގެން މި މަހުގެ 25 ގެ ނިޔަލަށް މިފްކޯއަށް ކިރި މަހުގެ ޖުމްލަ އަގަކީ 17,350,903ރ. ކަމަށެވެ. ސަރުކާރުން އެ ފައިސާ މަސްވެރިންނަށް އިއްޔެ ޖަމާކޮށްދީފައިވާ ކަމަށް އެ ކުންފުނިން ބުންޏެވެ.

އިއްޔެ ޖަމާކޮށްދިން ފައިސާއާ އެކު މަސްވެރިންނަށް މިހާރު ވަނީ 879 މިލިއަނަށް ވުރެ ގިނަ ރުފިޔާ މި ސަރުކާރުން ޖަމާކޮށް ދީފަ އެވެ.

މަސްވެރިން ބާނާ މަސް ގަތުމަށް ފަހު 48 ގަޑިއިރުގެ ތެރޭގައި ފައިސާ ދިނުމަކީ ރައީސް ޑރ. މުހައްމަދު މުއިއްޒުގެ ވައުދެކެވެ. އެކަމަކު، މި ސަރުކާރު އައިރު މަސްވެރިންނަށް ކުރީގެ ސަރުކާރުން ގިނަ އަދަދެއްގެ ފައިސާ ނުދީ ހުރުމުން ފައިސާ ދިނުމުގައި ބޮޑެތި ގޮންޖެހުންތައް ކުރިމަތިވި އެވެ. އެ ގޮންޖެހުންތަކާ އެކު، ސަރުކާރުން ވަނީ މަސްވެރިންގެ ގިނަ އަދަދެއްގެ ފައިސާ ދޫކޮށްފަ އެވެ.

ފައިސާ ލިބުން ލަސްވާ ކަމަށް ބުނެ، މިދިޔަ ހަފުތާ ބަންދުގައި ގއ. ދެއްވަދު އަށާއި ގދ. ދާންދުއަށް ދިޔަ ފިޝަރީޒް މިނިސްޓްރީގެ ޓީމަކަށް އެ ރަށްރަށުގެ ބައެއް މަސްވެރިން ވަނީ ހުރަސްއަޅައިފަ އެވެ. އެ ޓީމުން އެ ރަށްތަކަށް ދިޔައީ މަސްދޯނިތަކުގައި މަސް ފިނި ކުރާ އާރްއޯ ޕްލާންޓް އެޅުމަށް ދޫކުރާ ލޯނާ ގުޅޭ މައުލޫމާތު ދިނުމަށެވެ.